Hanenty ty anatiny ao

Ho amy fizarà anatiny any

Vavolombelo Jehovah

Vezo

Fanampea ty Tanora mba Tsy Hatahotsy Mpanerisery An-dakilasy Any

Fanampea ty Tanora mba Tsy Hatahotsy Mpanerisery An-dakilasy Any

Mipetraky a Grande-Bretagne any Hugo, mpamaraky raiky folo tao. Nahazo mari-pankasitraha tamy fikambana raiky mpanao asa soa ie betibety, satria nanampy ajà tan-dakilasy any mba tsy hatahotsy mpanerisery sasy.

Hoy ty asany: “Tsy ho nahazo mari-pankasitraha iny aho laha tsy teo video hoe Ahoana no Hanoherana ny Mpampijaly Nefa Tsy Hamono Azy? Tsy ho nahay nanampy ajà reo tsy hatahotsy mpanerisery aho laha tsy nanenty any video io tamy jw.org ao.”

‘Ajà maro amy tany toy iaby ro misy mpanerisery, sanandro. Fe misy raha azonao atao mba hiatreha raha zay.’ (Nalà bakamy video hoe Ahoana no Hanoherana ny Mpampijaly Nefa Tsy Hamono Azy?)

Natoro Hugo tamy mpampianatsy an-drozy iny tse video mikasiky kiserisery iny. Tean-drozy raha iny ka nataony ze hahavy ty mpianatsy iaby hahita jw.org. Maro henanizao ty ajà valo zisiky amy folo tao ro lasa tea mampiasa jw.org an-dakilasin-dry Hugo any. Nivola rozy fa tsy nanampy an-drozy hiatriky probolemo amy mpanerisery avao tranonkala io, fa nanampy an-drozy hahita ty valy fanontanea maro koa, ohatsy hoe: Manao Akory ty Hahazoako Nama Soa?

Mahazo tombony ty tanora

Nampijalijalỳ ty mpanerisery an-dakilasy Elijah, ajà ampela valo tao, a Grande-Bretagne any. Nanenty video hoe Ahoana no Hanoherana ny Mpampijaly? ie noho ty fianakaviany, bakeo nataon-drozy fampisehoa ty raha tao mba ho hay Elijah ty raha hovolany noho hatao lafa misy mpanerisery. Nanjary natoky tena ie, ka vitany ty niatriky raha sarotsy iny. Nisy herinandro raiky natoka hialia amy faneriserea tafara atoy, ka natoro direkteran-dry Elijah iny video kiserisery iny.

Tsy a Grande-Bretagne any avao ro misy mpanerisery fa amy tany toy iaby, ka manampy ty tanora video hoe Ahoana no Hanoherana ny Mpampijaly Nefa Tsy Hamono Azy? iny.

Mipetraky Etazonia any Ivie, ajà ampela folo tao. Nijaly avao ty ainy satria nisy ajà ampela raiky mpanerisery azy an-dakilasin-drozy any. Fe nanjary tsy natahotsy any ajà ampela io sasy ie lafa baka nanenty video hoe Ahoana no Hanoherana ny Mpampijaly? Niresaky tamy mpampianatsy azy koa ie ka nahazo fanampea. Niala tsiny tamy Ivie ajà ampela mpanerisery azy iny, le mifankahazo soa rozy henanizao.

Manao ze hahasoa ty tanora zahay Vavolombelo Jehovah. Mbo hampiboaky torohevitsy mahasoa avao zahay mba hanampy an-drozy hiatriky raha sarotsy amy ty fiainan-drozy andavanandro, manahaky kiserisery iny.