Hanenty ty anatiny ao

Ho amy fizarà anatiny any

Vavolombelo Jehovah

Vezo

Mpamono Afo Nanarombaky Ain’olo Tamy Fotoa Tsy Fiasà

Mpamono Afo Nanarombaky Ain’olo Tamy Fotoa Tsy Fiasà

Nandeha bisy hamonjy fivoriambeni-Vavolombeloni-Jehovah anilani-Paris a Fransy any Serge Gerardin, tamy 5 Zanviè 2014. Nahita aksidàn namparihy ie tamy zay. Hoy ie: “Nidofotsy tamy sisini-pont iny tomabily raiky zay le niakatsy nananabo any bakeo nipaiky tamy pont iny draiky, sady nirehitsy noho nivaliky ambony ambany.”

Fa 40 tao mahery Serge ro mpamono afo, sady Sefoni-ekipa mpamono afo, ka fa zatsy manao raha lafa vo misy loza. Hoy ty asany: “Nampijanoniko soferani-bisy nanday anay iny, ndre tampitani-lala bevata iny teny aza ty nisy anay. Nilay namony ani-tomabily nirehitsy iny aho bakeo.” Naharè olo nanao vonjeo Serge. Hoy ie: “Kostara noho Kravaty ty nanaovako tamin’io sady tsy nisy fitaova fandesy manavotsy olo tamiko teny. Fe haiko hoe misy olo mbo azo avota ao kanao misy mikaiky vonjeo.”

Nahita pasazy raiky Serge lafa niodikodiky tamy tomabily iny teo. Mbo tsy aminy pasazy io soa ty ainy, ka nandesini-Serge tamy pilasy mba azo antoky ie. Hoy Serge: “Nivola tamiko ie hoe mbo misy olo roe tavela anaty tomabily ao. Fa maro tomabily nijano teo tamy zay sady fa tsy saky niharinia tomabily iny satria fa niroaroa marè ty afo taminy eny.”

Bakeo, nisy mpanday kamion vitsivitsy niavy teo sady nanday fitoava famonoa afo. Nampitifirini-Serge an-drozy tamy fitaova nandesin-drozy rey tomabily may iny, le mba nihafahafa afo iny, fe tsy nimaty soa. Paky tambanini-tomabily iny tao sofera iny, ka nonjonini-Serge miaraky tamin’olo teo rey tomabily iny, le nalan-drozy bakao sofera iny.

Hoy Serge: “Nanomboky nirehetsy ndraiky afo iny tamy zay.” Fe mbo nisy pasazy raiky nihato tamy sentirani-tomabily iny tao.” Nisy mpamono afo hafa niavy teo, le akanjo fandesini-mpanday môtô ro nanaovany. Tsy niasa koa ie tamy fotoa io. Hoy Serge: “Nivolaniko rozy hoe fa hipoaky tomabily io. Nirambesinay tamy sirakiny pasazy raiky tavela iny, le naboakinay baka ao.” Tsy ampy minity raiky tafarani-zay, le nipoaky tomabily iny.

Lafa niavy ty mpamono afo noho ty mpitsabo, le nikarakaran-drozy pasazy naratsy rey sady nivonoan-drozy afo iny. Nahazo fitsaboa sarombaky Serge satria nimay noho naratsy ty tanany. Maro ty olo nilay namonjy ani-Serge mba hisaotsy azy, lafa nandeha amy bisy handehanany hamonjy fivoriambe iny eny ie.

Faly biby Serge satria afaky nanavotsy ain’olo. Hoy ie: “Tsapako hoe mana adidy amy Jehovah Ndranahariko aho. Tena afa-po aho fa afaky nanao ze vitako mba hanavota ain’olo.”