Hanenty ty anatiny ao

Ho amy fizarà anatiny any

Vavolombelo Jehovah

Vezo

Manasoa Fiaina ty JW.ORG

Manasoa Fiaina ty JW.ORG

Olo maro amy tany toy iaby ro mahazo tombony baka amy jw.org. Maro ty taratasy fisaora niazony foibe ty Vavolombelo Jehovah, talohany Mey 2014. Retoa ty sisany amy raha rezay:

Manampy ty ajà

“Mana anakilahy mbo kelikely aho sady fa mianatsy ie. Tozoro manday fitaova namany an-dakilasy any avao ie saky moly, ohatsy hoe crayon, fisà, misy aza solomaso mihintsy. Fa hazavaninay aminy matetiky hoe halatsy raha ataony io sady raty mangalatsy zao. Fe tsy nisy ho azy anatsinay rey. Farany nalànay tamy jw.org ao ty video hoe Ratsy ny Mangalatra. Nisy vokany taminy raha iny sady tena tandrify azy. Ta hampoliny amy ty tompony raha nalàny rey lafa baka nanenty video iny ie satria takatsiny hoe tsy tea Ndranahary ty mangalatsy. Nanampy anay vatany tranonkala iny!”—D. N., Afrika.

‘Mandaitsy vatany video hoe Ratsy ny Mangalatra iny sady tandrify any anakilahinay iny mihintsy’

Tea anako iny tranonkala iny. Alàn-drozy video ao reo, ka manampy an-drozy hahay ty torolala amy Baiboly ao mikasiky ty vandy noho ty halatsy. Mianatsy toetsy soa hafa mahasoa an-drozy amy ty fiainan-drozy koa rozy. Manjary olo ilà amy fiaraha monina eo rozy vokatsy raha zay.”—O. W. Antilles.

Manampy ty mpianatsy

“Enta mavesatsy ty fahitako fianara zao taloha, sady fa nieritseritsy hiboaky fianara aho. Fe namaky lahatsoratsy raiky baka amy jw.org ao aho. Ho zao lohateny lahatsoratsy io: ‘Tokony Tsy Hianatra Intsony ve Aho?’ Lasa takatsiko tarafarany namakiako raha io hoe tena ilà ty fianara. Mampiofana ahy hiatriky ty hoavy raha zay sady manampy ahy ho olo vano.”—N. F., Afrika.

‘Nanampy ahy ho soa fandaisam-bata an-dakilasy any avao ty torohevitsy ho ahy ty tanora, amy tranonkala toy’

“Ty torohevitsy ho ahy ty tanora amy tranonkala iny ro nahavy ahy ho soa fandaisam-bata tan-dakilasy any. Nianarako koa hoe ino ty hanampy ahy hifantoky amy fianarako fa tsy ho tandrena amy raha hafa.—G., Afrika.

“Nitaray mpiara-miasa amiko zay hoe sereseren’olo avao ty anakampelany an-dakilasy any, sirtò ajà ampela raiky zay, le tena tea manerisery azy. Nisy vokatsiny tamy anakiny iny raha zay satria nanjary nitseky ie, ka tsy nahefa nianatsy tanaty ty andro maromaro. Nivolaniko tamy mpiara-miasa amiko iny ty hevitsy sisany tamy kisarisary hoe Ahoana no Hanoherana ny Mpampijaly Nefa Tsy Hamono Azy? tamy jw.org ao. Azoazony soso-kevitsy hoe soa laha mba mahay misomonga, amy zay tsy hahavola mpanerisery rey. Nivolaniny tamy anakampelany iny raha zay. Nanjary natoky tena anakampelany iny lafa nandeha nianatsy. Fa tsy nisy nanerisery azy sasy koa tan-dakilasy any lafa nandeha ty fotoa, ndre ajà ampela tea manerisery azy iny aza nanjary namany.”—V. K., Eoropa Antinana.

Manampy ty tanora

“Misaotsy anareo bevata tamy lahatsoratsy hoe ‘Fa Maninona Aho no Lasa Mampijaly Tena?’ Fa probolemoko liany nainay raha io. Nieritseritsy aho hoe zaho raiky avao ro tratsy ty raha manahaky zay, ka ndre hivola amin’olo aho, le tsy ho takatsin’olo mihintsy ty raha mahazo ahy. Tena nanampy ahy, ohatsy, tamy lahatsoratsy iny tao rey. Mba kely misy mahatakatsy avao kay ty mahazo ahy!”—Somonjara raiky an’Aostralia any.

“Tena nanampy ahy, ohatsy, tamy lahatsoratsy iny tao rey. Mba kely misy mahatakatsy avao kay ty mahazo ahy!”

“Manamora ty fomba ahitako torohevitsy mikasiky ty raha manahira mpahazo ty tanora jw.org io. Nanampy ahy ohatsy lahatsoratsy raiky zay mba hahay hoe manao akory mpanadala ampela zao. Le lasa haiko hoe homby aho koa mba fa mpanao raha zay. Nanjary haiko koa ty tokony hataoko lafa misy manadala ahy.”—T. W., Antilles.

Manampy ty baba noho reny

“Tsy hay atao anakilahiko zay. Tsy hitako mihintsy kindraiky ty hanaovako azy satria miovaova ty toetsiny sady tsy ampoizinao ty fihetsikiny. Farany lasa tsy nahay nifampiresaky soa zahay. Ndraiky andro aho nilitsy tamy jw.org ao, le nilitsy tamy fizarà ho ahy ty mpivaly noho ty baba noho reny. Nahita lahatsoratsy sankarazany mety amiko noho nanampy ahy hahay hiresaky soa amy anako aho tao. Ndre ie koa aza mba nahazo tombony baka amy tranonkala io. Mifankahazo soa zahay moroanaky henanizao sady tsy misalasala miresaky ty raha teany noho ty raha mampiasa loha azy amiko ie.”—C. B., Afrika.

“Matetiky ro amy fotoa ilànay azy iny ty isehoa lahatsoratsy rey amy jw.org ao, ka lasa hitanay ty raha tokony hatao mba hanampea ty anakinay hiatriky raha sarotsy”

“Teanay mana anaky ty jw.org, satria misy fomba soasoa ahafahanay mampianatsy ty anakinay. Nanampy ty anakinay ohatsy kisarisary mikasiky tena namana iny. Nanjary hain-drozy hoe manao akory ty nama soa tokony hinamà. Le mahay mifily nama hitariky an-drozy hanao raha soa rozy. Matetiky ro amy fotoa ilànay azy ty isehoa lahatsoratsy rey amy jw.org ao, ka lasa hitanay ty raha tokony hatao mba hanampea ty anakinay hiatriky raha sarotsy. Maro vatany ty torohevitsy hita ao!”—E. L., Eoropa.

Manampy ty mpivaly

“Fa eny tao zay ty nifanambalianay. Mitovy amy mpivaly iaby io zahay ka samby nana ty fomba firesaky nahazatsy anay samby hafa ty fomba fahità raha. Fe nahakinto ahy lahatsoratsy tamy jw.org ao manao ho zao iny hoe, ‘Henoy Tsara ny Vadinao.’ Volaniny ao hoe manao akory ty atao mba hahaiza mijanjy olo. Vinakiko lahatsoratsy iny bakeo nitantaraniko tamy valiko. Niezaky nanoriky torohevitsy tao rey zahay.”—B. B., Antilles.

“Tranonkala io, ro nanavotsy ty tokantranoko”

Tao raiky zay ty nifandrambesako tamy Vavolombelo Jehovah sady isaorako an-drozy bevata jw.org io. Maro ty raha nianarako baka amy tranonkala io ao, nianarako bakao ty fomba itanjaha heloky noho ty hoe akory ty hahavy ahy ho valy vano sady ho baba soa fanahy. Tsy avory ty vandy fa tranonkala io, ro nanavotsy ty tokantranoko.”—L. G., Antilles.

Manampy ty mareny

“Nanampy ahy hahazo tavy ty fiainako ndraiky ty jw.org. Nihanahay safà atao amy tana aho lafa nanenty any video amy Safà Atao amy Tana Amerikanina rey. Nieritseritsy avao aho bakany zay hoe fa tsy misy raha kendrè sasy amy ty fianako. Fe nidosiky ty foko video hoe Efa Misy Amin’ny Fiteniko ny Tenin’Andriamanitra, sady vomaiky aho tapa-kevitsy hifantoky amy lafisoan-draha amy ty fiainako.”—J. N., Afrika.

“Nanampy ahy hahazo tavy ty fiainako ndraiky ty jw.org”

‘Soa biby tranonkala iny. Manampy mareny ty asako sirtò ty tanora mareny. Maro ty raha amy safà atao amy tana amy tranonkala iny ao, ka lasa nihanahay safà atao amy tana aho. Afaky manoro hevitsy ze olo ta hanasoa ty fiainam-pianakaviany noho ty fifandrambesany amy ty namany rey koa aho henanizao.’—K. J., Antilles.

Manampy ty jiky

“Mahazo tombony baka amy jw.org zahay jiky satria mahazo fanazavà maro bakao aho. Ambolany fanazavà rey vo avy amiko atoy laha alefa posta. Nanasoa ty fiainam-pianakavianay tranonkala iny sady ahafahako manampy ty manodidy ahy. Lafa misy fanazavà azony namako tsy jiky reo, le mba fa mahazo koa aho.”—C. A., Amerika Antimo.

“Nanasoa ty fiainam-pianakavianay tranonkala iny sady ahafahako manampy ty manodidy ahy”

“Manampy vatany jw.org io sirtò ho ahin’olo tsy mahay mamaky soratsy braille na tsy manan-drala hiviliana boky amy soratsy braille. Manjary maharaky ty vaovao farany ty jiky, lafa mijanjy raha nalà feo amy jw.org ao rey. Natao ho ahin’olo iaby vatany tranonkala io. Manjary mahatsapa misy dikany noho mba miaraky amin’olo iaby avao koa zahay ndre jiky.”—R. D., Afrika.

Manampy ty olo ta hahay a Ndranahary

“Maro safà sarotsy azo ty tranonkala ara-pivavaha hafa, ka ty mpitariky fivavaha avao ro mahazo ty teany hambara. Fe tsy ho zay tranonkalanareo toy. Tsy fanazavà maro tsy misy dikany ty hita ao. Tsotra sady mivanta ty raha volany amy tranonkalanareo toy ato. Tsy be kabary na hoe feno filozofỳ ty ao. Ataony ze hahatsapànao fa tsy sarotsy miezaky hanam-pinoa zao, fa afaky manao ho zay iaby ty olo iaby ndre ty olo tsotra aza.”—A. G., Azia.

‘Tsotra sady mivanta ty raha volany amy tranonkalanareo. Ataony ze hahatsapànao fa tsy sarotsy miezaky hanam-pinoa zao, fa afaky manao ho zay iaby ty olo iaby ndre ty olo tsotra aza’

“Tsy hay ty niafarako laha tsy teo ty jw.org. Sahala jiro azoko arehitsy amy tontolo maìky ara-panahy toy eto tranonkala io. Avy le afaky mamaky noho mijanjy lahatsoratsy manazava ty hevitsy Ndranahary aho ao, sady mahay ty valiny fanontanea mikasiky ty fiaina.”—J. C., Antilles.

‘Faly aho fa mbo mahazo fanampea hahafahako mifandramby amy Ndranahary avao ndre anaty ala be atoy aza. Nitrobo aho laha tsy teo tranonkala io.’—M. F., Amerika Antimo.