Hanenty ty anatiny ao

Ho amy fizarà anatiny any

Vavolombelo Jehovah

Vezo

Fizarà Diploma Tamy Sekoly Faha-138 amy Sekoly Mifototsy amy Baiboly ahy Gileada

Fizarà Diploma Tamy Sekoly Faha-138 amy Sekoly Mifototsy amy Baiboly ahy Gileada

Tamy 14 Marsa 2015 ro nizarà tamy mpianatsy Sekoliny Gileada kilasy faha-138 ty diploman-drozy. Natao tamy foibem-pampianara ty Vavolombelo Jehovah a Patterson, a New York any raha zay. Nisy 14 000 mahery ty mpanatriky, tafilitsy amy zay azy nanaraky tamy video tamy pilasy samby hafa any. Nisy hira vaovao efatsy nihirà tao sady ty feony hira reo avao koa ro natao moziky fanokafa tamy fandahara iny tao. *

Geoffrey Jackson, anaty ty Filan-kevi-pitantana ty Vavolombelo Jehovah, ro mpanolotsy fandahara. Nampirisihiny mpianatsy reo mba tsy ho tanjahan-drozy ho ahin-drozy avao raha nianaran-drozy rey, fa mba ho zaràn-drozy amin’olo hafa koa, amy zay mba mahazo tombony koa ty hafa.—2 Timoty 2:2.

Niresaky mikasiky Mosesy Rahalahy Jackson. Ty tranolainy Mosesy tse ho asany ro foibe ty fivavaha tamy Jehovah tamy andron’Israely. Fe lafa tafara atoy, le ty tranolay masy koa ro nanjary foibe ty fivavaha marina tamy Jehovah. Nisy pilasy raiky kaihy hoe Masy Marè tamy tranolay io tao, ka ty mpisoro avao ro mahazo militsy ao. Tsy nahazo nilitsy tao Mosesy, fa ty mpisorobe avao ro tokony hilitsy ao. Arona ro nivoatendry ho mpisorobe. Fe tsy mivola ty Baiboly hoe tsy nazoto Mosesy lafa tsy nahazo nilitsy tao. Nanoha any Arona avao ie tamy andraikitsy vaovao zay. (Eksodosy 33:7-11; 40:34, 35) Ino ty azontsika ianara baka amy zay? Hoy Rahalahy Jackson: “Ataovo vatan-draha ze tombontsoa anananareo, fe ka tanjaha ho ahinareo ambatanareo avao.”

“Feon-dravinkazo va le Hampatahotsy Anareo?” Io ro lahateny natao Kenneth Flodin, anaty ty mpanampy ty Komitiny Fampianara amy Filan-kevi-pitantana eo. Nivola ie fa mety hisy raha hampatahotsy any mpianatsy reo, ohatsy hoe fanenjeha na raha sarotsy hafa. Nangalaky hevitsy baka amy Levitikosy 26:36 ao ie, ka nampirisihiny mpianatsy reo mba hihevitsy any raha manahira rey manahaky feon-dravinkazo maiky avao. Tsy tokony hieritseritsy rozy hoe tsy ho vitan-drozy mihintsy ty hiatriky raha rey. Bakeo nazavany Rahalahy Flodin soa ty ohatsy nenga apostoly Paoly. Nivola ie fa nahavita niaritsy raha sarotsy maro Paoly satria natoky any Jehovah avao.—2 Korintianina 1:8, 10.

“Raha Manao Akory ty Ilànareo?” Mark Sanderson, anaty ty Filan-kevi-pitantana ro nanao lahateny io. Toro lala amy Ohabolana 13:12 ao iny ro niresahiny tamy zay. Ho zao ty volany ao: “Marary ty fo laha mihemotsy avao ty fahatanteraha ty raha tamàny.” Mampalahelo fa maro biby ty olo diso fanantenà satria nanakatsy raha tsy ho takatsy, ohatsy hoe ta ho mpanarivo na ta halaza.

Diso hevitsy mikasiky any Jaona Mpanao Batisa ty olo sisany tamy andro Jesosy. (Lioka 7:24-28) Mety nieritseritsy ohatsy rozy hoe hanome fampianara mampiala voly an-drozy na fampianara sarotsy azo manahaky fatao filozofy reo Jaona. Fe diso fanantenà rozy satria tsotra noho mazava ty raha nampianariny. Ty sisany mety nieritseritsy hoe hiavaky biby ty fisikìna noho ty pozy Jaona. Fe siky tsotra fanisian’olo mahantra ro nisikìna Jaona. Eo koa ty nitamà fa mpaminany ie. Tsy diso fanantenà ze nieritseritsy ho zay, satria mpaminany vatany Jaona sady nisava lala any Mesia.—Jaona 1:29.

Nampirisiky mpianatsy reo koa Rahalahy Sanderson mba hila raha soa avao. Tsy tokony hila laza rozy na hitamà hoe hasondrotsin’olo, fa ty raha azon-drozy atao mba hanampea olo ro tokony hifantohan-drozy. Akory ty hanaova raha zay? Tokony hozaràn-drozy amin’olo ty raha nianaran-drozy tamy sekoly any. Tokony ho tean-drozy rahalahy noho anabavy reo sady ampean-drozy mba hana finoa matanjaky avao. Hoy Rahalahy Sanderson: “Miezaha hiambany avao ka manompoa any rahalahy noho anabavy reo. Manompoa any Jehovah avao ka ze farany soa marè baka aminareo ro ameo, le tsy ho diso fanantenà nareo.”

“Fahano Ze Mosary.” Io ro lahateny natao James Cauthon, raiky amy mpampianatsy amy sampan-draharahany sekoly a Patterson any reo. Nivola ie fa samby maniry ty ho tiavy, hankasitraha voho hamea safà fiderà ty olo kiraidraiky. Ndre Jesosy aza mba nila any reo koa, ka lafa natao batisa ie, le nivola taminy Jehovah fa teany ie sady mahazo hatò aminy.—Matio 3:16, 17.

Azontsika atao ty mampahery noho manatanjaky ty hafa amy ty raha volanintsika, sady tea Jehovah ty hanaovantsika raha zay. (Ohabolana 3:27) Hoy Rahalahy Cauthon: “Miezaha hifantoky amy toetsy soan’olo sady ka misalasala midera an-drozy.” Laha midera any mpiara-manompo amintsika reo amy fontsika tsika, le ho tsapan-drozy fa tsy very fahatany avao ty ezaky ataon-drozy amy fanompoa.

“Nahafoy ty Vatany Zisiky Farany.” Mark Noumair, anaty ty mpanampy ty Komitiny Fampianara, ro nanao ty lahateny manaraky. Niresaky ty ohatsy nenga apostoly Paoly ie mba hampirisiha mpianatsy reo hanao marè fa tsy hieny amy ze takỳ amin-drozy avao. Tokony hanao soro ty vatan-drozy manahaky natao Paoly rozy mba hanampea ty hafa. Hahitan-drozy fifalea raha zay.—Filipianina 2:17, 18.

Tsy kivy Paoly ndre teo ty raha manahira. Hita hoe tena nahafoy ty vatany zisiky farany Paoly satria nanao marè tamy fanompoa avao zisiky nahafaty azy. Nahasaky nivola ie hoe: “Fa nahavita ty korsa laiko aho.” (2 Timoty 4:6, 7) Nampirisihy Rahalahy Noumair mpianatsy rey bakeo mba hanahaky Paoly, ka hanoha any Fanjakà iny zisiky farany avao amy ty tany nanendrea an-drozy any.

Fitantarà. Niresadresaky tamy mpianatsy vitsivitsy Michael Burnett, raiky amy ty mpampianatsy. Nampanaoviny fampisehoa an-drozy ty raha nihitan-drozy tamy fanompoa teny, tamy rozy ta Patterson ao.

Nahita vokatsy soa mpianatsy reo satria nanararaotsy nitory saky afaky nanao raha zay. Niezaky nampiasa fivolanan-drazan’olo nitorian-drozy koa rozy lafa nitory ty fahamarina. Naharè, ohatsy, mpianatsy raiky zay hoe maro olo mampiasa safà espaniola ty amy faritany nieritseretiny hitoria any. Ino ty nataony? Nianatsy safà espaniola vitsivitsy baka amy JW Language ao ie, talohany handehanany hanompo. Ino tokoa ty raha niseho tamy andro io? Nahita lahilahy espaniola tan-dala teny ie. Nampiasàny safà vitsivitsy nianarany rey, mba hanomboha resaky. Vokatsy raha zay, le naneky hianatsy Baiboly lahilahy iny niaraky amy ty longony efatsy.

Fanadikadìna. Bakeo nanadihady mpianatsy efatsy William Turner, anaty ty mpanampy ty Komitiny Fanompoa amy Filan-kevi-pitantana eo. Nampitantaraniny an-drozy ty raha niainan-drozy talohany Sekoly io noho ty vokatsy fampiofana iny tamin-drozy.

Nivolany mpianatsy rey ze hevitsy nampahery an-drozy tamy fianara iny. Nisy raiky tamin-drozy, ohatsy, niresaky ty raha nianarany baka amy tantara amy Lioka toko 10 ao. Falifaly mpianatsy 70 rey lafa baka nirahy Jesosy hitory, satria nahita vokatsy soa. Falifaly nanahaky an-drozy koa Jesosy. Fe nivola Jesosy fa tsy ty vokatsy hitan-drozy ro tokony hahafaly an-drozy marè, fa ty hatò baka amy Ndranahary vokatsy ty ezaky marè nataon-drozy. Falifaly koa tsika satria mahazo hatò amy Jehovah.

Nivolany Rahalahy Turner tamy mpianatsy reo bakeo ty Filipianina 1:6. Nameany toky rozy fa “nanomboky asa soa” tamin-drozy eo Jehovah, ka hanampy an-drozy avao zisiky farany.

“Jehovah Avao ro Henteo.” Io ro lahateny fototsy natao Samuel Herd, anaty ty Filan-kevi-pitantana. Nivola ie hoe tsy afaky mahita any Jehovah ara-bakiteny tsika. Ka manao akory ty hanenteantsika azy avao?

Manenty any Jehovah tsika laha mandiniky ty raha niforoniny, satria manampy antsika hahay azy raha rey. ‘Natao Jehovah mahita’ koa ty ‘masony fontsika.’ (Efesianina 1:18) Laha mamaky Baiboly avao tsika, le vomaiky hihamahay any Jehovah. Ka lafa mahay azy soa tsika, le manjary tsapantsika fa mariny antsika ie.

Ilàntsika ianara marerè ty raha amy Filazantsara ao, satria tena manampy antsika hahay soa any Jehovah raha zay. Volany ao ty raha natao noho nivolany Jesosy, ka manampy antsika hahay hoe manao akory Jehovah. Nahay soa any Jehovah Jesosy, ka afaky nivola hoe: “Ze nahita ahy, le nahita any Baba koa.”—Jaona 14:9.

Nampirisiky mpanatriky reo Rahalahy Herd mba hanahaky Jehovah noho Jesosy, fa tsy hianatsy mikasiky an-drozy avao. Niezaky nanome ze raha nilàn’olo, ohatsy, Jesosy. Tokony hiezaky mafy koa tsika mba hizara ty sakafo ara-panahy azontsika.

Ino ty ho vokatsiny laha manenty any Jehovah avao tsika? Ho tsapantsika ty raha nitsapa mpanao salamo toy hoe: “Nataoko talohako teo avao Jehovah. Tsy hihozonkozo aho satria ankavanako eo ie.”—Salamo 16:8.

Famaràna. Lafa tampitsy ty fizarà diploma, le nisy raiky tamy mpianatsy reo namaky taratasy fankasitraha baka amin-drozy kilasy raiky. Nivola Rahalahy Jackson bakeo fa tsy tokony hieritseritsy mpianatsy reo hoe tsy maintsy vaovao noho laliky ty raha ampianarin-drozy mpiara-manompo reo. Laha ty marina, raha fa hainy mpiara-manompo reo avao ty ankamaroa raha nianara mpianatsy reo, fa fampitiarova avao ro ilàn-drozy. Nivola koa Rahalahy Jackson fa tena ilà ty miambany. Tokony hisariky ty sain’olo amy Baiboly noho boky voho gazety mpianatsy reo, fa tsy amy ty vatan-drozy na amy ty fiofàna niazon-drozy ta Gileada any. Tsy tokony hataon-drozy mihintsy ze raha mety hahakivy ty olo tsy afaky manao Sekoliny Gileada. Ty hampahery noho hanampy olo rey hahazo tombony baka amy fandahara ara-panahy azon-drozy atrehy ro tokony hatao mpianatsy reo. Nampahery any mpanatriky rey fandahara iny, ka parè rozy hanampy ty olo finoa raiky amin-drozy.

^ feh. 2 Fa nahazo any hira iny herinandro mialoha ze hanatriky fandahara iny.

^ feh. 32 Tsy ty tany iaby ro aseho amy sarintany eo io.

^ feh. 34 Tsy ty mpianatsy iaby ro aseho atoa.