Hanenty ty anatiny ao

Ho amy fizarà anatiny any

Vavolombelo Jehovah

Vezo

Nampahery ty Vavolombelo ta Rosia noho Ukraine any ty Filan-kevi-pitantana

Nampahery ty Vavolombelo ta Rosia noho Ukraine any ty Filan-kevi-pitantana

Nitsidiky ta Ukraine any Rahalahy Stephen Lett, anaty ty Filan-kevi-pitantana ty Vavolombelo Jehovah, tamy 10 noho 11 Mey 2014. Nisy 165 000 ty Vavolombelo naharè ty lahateniny tamy fotoa io. Namaky taratasy raiky Rahalahy Lett, ka lafa naharè taratasy iny ampela raiky zay, le hoy ty asany: “Tsapanay fa anehoa fitiava zahay!”

Nadika tamy safà limy ty lahateny noho ty famakia taratasy iny sady nalefa mivanta tamy Efitrano Fanjakà 1 100 teo ho eo erany Ukraine.

Tamy farany herinandro io avao, le nitsidiky any Rosia koa Mark Sanderson, anaty ty Filan-kevi-pitantana. Nisy fandahara natao ho ahy ty rahalahy ta Rosia any tamy zay, ka nivakỳ tao koa taratasy iny. Nadika tamy safà 14 fandahara iny, ka Vavolombelo 180 413 baka amy fiangona 2 500 mahery a Bélarus noho Rosia any ro nahajanjy mivanta.

Natao ty Filan-kevi-pitantana ho ahy ty fiangona iaby ta Rosia noho Ukraine any taratasy iny. Vinaky Rahalahy Sanderson tamy safà rosianina taratasy iny, ka hoy ty biròny sampana a Rosia any: “Faly biby zahay satria mahatiaro anay ty Filan-kevi-pitantana. Sahala hoe nandrakoky anay kiraidraiky rozy.”

Natao hampahereza ty Vavolombelo mipetraky amy faritsy misy koronta ara-politiky taratasy iny. Nampirisiky any rahalahy reo ‘tsy hiharo amy zao tontolo zao’ raha io, ka tsy hilitsy amy politky mihintsy.—Jaona 17:16.

Nampirisiky Vavolombelo any reo ty Filan-kevi-pitantana mba hiezaky hifandramby amy Jehovah avao, ka hivavaky noho hianatsy voho hametsivetsy soa ty Safà Ndranahary. Nampitiaroviny any Vavolombelo reo koa fa ndre ino ndre ino ty fitsapà mety hahazo an-drozy, le marina avao raha nampitamany Ndranahary amy Isaia 54:17 ao iny hoe: “Tsy hahavoa raha ze fialia amboary hamangoa anao.”

Ho zao ty namaràna ty Filan-kevi-pitantana any taratasy iny: “Tea anareo biby zahay. Aminareo any avao ty sainay sady mivavaky ho ahinareo avao zahay.”

Nanoratsy taratasy mikasiky fitsidiha iny ty biròny sampana ahy ty Vavolombelo Jehovah a Ukraine any: “Falifaly rahalahy reo satria tsapany hoe maneho fitiava an-drozy vatany ty Filan-kevi-pitantana sady midary an-drozy. Hita tamy fitsidiha natao Rahalahy Lett noho Sanderson iny hoe miharo raiky ty vahoaky Ndranahary sady mikarakara an-drozy iaby Jehovah noho Jesosy. Avy amy fotoa ilà azy fitsidiha iny, ka tapa-kevitsy zahay fa hanohy fanompoa any Jehovah avao ndre ino ndre ino ty raha hiseho.”