Hanenty ty anatiny ao

Ho amy fizarà anatiny any

Vavolombelo Jehovah

Vezo

Tablò Fampizelà Mandilatsy ty 165 000

Tablò Fampizelà Mandilatsy ty 165 000

Ty fitoria santrano ro tena ahaiza ty Vavolombelo Jehovah. Fe hita mitory anjavalala koa rozy henanizao miaraky amy tablò fampizelà soasoa.

Nahazo vahatsy fomba fitoria io tato ho ato mba hanampea olo hahay ty raha volany ty Baiboly. Nanomboky nampiasa latabo noho tablò fampizelà io ty Vavolombelo a New York any, tamy Novambra 2011. Nahità vokatsy raha io, ka tsy ela le nanao koa ty tanà hafa.

Tamy Marsa 2015, le nandefasa tablò 165 390 ty fiangona ty Vavolombelo Jehovah amy tany toy iaby. Nahazo latabo noho standy voho kioska an’arivony koa rozy.

Fe ndre zay, le mbo fitoria santrano avao ro fomba farany ze bevata ampiasà ty Vavolombelo Jehovah mba hanambarà ty fahamarina amy Baiboly ao. Fe hita fa nahità vokatsy koa ty fampiasà tablò fampizelà. Retoa misy ohatsy vitsivitsy:

Mipetraky a Peroa any Raul. Nahita Vavolombelo Jehovah tanila tablò fampizelà raiky ie, le namonjy an-drozy sady nivola hoe: “Taia avao nareo? Fa telo tao zay ty nilàko anareo. Ka laha vo nahita tablònareo toy aho, le nisaotsy a Ndranahary.”

Mitory amy faritsy misy any Raul any matetiky ty Vavolombelo Jehovah, fe tsy tratsy an-trano mihintsy ie ndre andavanandro ndre amy farany herinandro. Nivola Raul fa, fa nianatsy Baiboly tamy Vavolombelo ie taloha, ka mbo ta hanohy. Nalamy soa ty fotoa mba hahafahany hianatsy ndraiky.

Nangalaky boky Tsiambaratelon’ny Fahasambaram-pianakaviana tanabo latabo fampizelà ty mpivaly tanora raiky a Boligaria any. Nimpoly ndraiky rozy herinandro tafara atoy, le nangalaky boky hoe Boky Misy Tantara Baka amy Baiboly noho ty hoe Mianara Amin’ilay Mpampianatra Lehibe. Nanontany an-drozy Vavolombelo nitsanga teo iny hoe firy ty anan-drozy. Hoy ty asan-drozy: “Mbo tsy mana zahay, fe lafa mana zahay le teanay hampianary mikasiky Ndranahary rozy. Tena ilànay boky reto.”

Nivonjè lahilahy raiky nanao akanjo maramila, mipetraky a Ukraine any zay koa ty Vavolombelo tanila latabo fampizelà raiky. Hoy ty asany: “Nao rolahy, ombia avao Hara-magedona zao?” Nandramby anjara tamy aly nisy ta Ukraine ao ie vo tsiela. Nandiniky ty raha misy amy tany toy iaby ie, ka resy lahatsy fa ho avy tsy ho ela ty Hara-magedona. Fe niasa loha koa ie hoe nanino Ndranahary ro mbo tsy nanao raha. Nampiasa Baiboly mpitory rey mba hanazavà aminy fa misy antony soa kanao Ndranahary mbo mandìny, fe tsy ho ela le haripakiny ty raty fanahy. Nandramby nahoda iny lafa namea gazety Ny Tilikambo Fiambenana noho Mifohaza! noho ty boky hoe Misy Mpamorona Iray Miahy Anao Ve?

Mipetraky a Macédoine any mpamaraky raiky toy. Nivola tamy Vavolombelo tanila latabo fampizelà teo rey ie hoe, fa mpamaky ty gazetin-drozy. Fa ty boky Ino Marina ro Ampianary ty Baiboly? koa henanizao ro teany ho azo. Handeha ho amy tranom-boky any aho ho asany, mba hamaky azy.

Nimpoly tamy Vavolombelo rey teo mpamaraky iny, lafa afaky lera roe teo ho eo. Fa nivakìny zisiky amy pejy 79 any boky iny. Hoy ty asany: “Manova olo boky toy. Kay hondy diso iaby ty ankamaroa ty raha ninoako! Hitako hoe marina iaby ty fanazavà atoa. Tena nanova ty raha haiko mikasiky ty fiaina raha toy.”