Hanenty ty anatiny ao

Ho amy fizarà anatiny any

Vavolombelo Jehovah

Vezo

Mitory amy Tanà Anivon-driaky Any

Mitory amy Tanà Anivon-driaky Any

Misy nosy kelikely maromaro miparitaky amy Riaky Avaratsy, andrefani- Schleswig-Holstein an’Alemaina any. Kaihy hoe Halligen rozy amy fitambarany. Tokotokony ho 300 eo ho eo ty olo mipetraky any. Manao akory ty haharèzan’olo any reo ty hafatsy baka amy Baiboly torini-Vavolombeloni-Jehovah?Matio 24:14.

Mandeha amy baky ty Vavolombelo mba hiavia amy sisany amy nosy rey eny. Mampiasa fomba hafa koa ty Vavolombelo vitsivitsy mba hiresaha amin’olo mipetraky amy nosy hafa. Mandeha amy tany maiky dimy kilometatsy eo ho eo rozy. Akory ty hampety ani-zay?

Lafa Maiky Riaky Iny

Saky lera eny, le mihena na miakatsy telo metatsy eo ho eo Riaky Avaratsy amy faritsini-Halligen any io! Ka lafa maiky ty riaky, le misy faritsy bevata azo ombà. Afaky mandeha an-tomboky ho amy nosy telo kelikely eny amy zay ty Vavolombelo.

Ka manao akory ty lia mbeo? “Maharitsy lera roe eo ho eo ty fandehana amy ty raiky amy nosy a Halligen io,” hoy Ulrich, mpitari-dala mahay mitariky an-drozy. “Tsy manao kapa zahay matetiky. Zay ty fomba farany ze soa sady tsy mamozaky. Manao boty zahay lafa manintsy ty andro.”

Tsy mampino ty raha hita amy manodidy eny. “Atao ho raha amy planety hafa zay iha,” hoy ty asani-Ulrich. “Misy sisany misy fotaky, ty ilany feno vatovato, le ty sisany misy lomotsy mitiry. Mahita voron-driaky miaraky maromaro koa iha, drakaky, noho biby hafa.” Kindraiky, le mandeha amy tany fotaky, kaihy hoe Priele amy safà Alemà rozy.

Miatriky raha sarotsy ze mandeha. Nivola Ulrich hoe: “Mety halaky trobo iha, sirtò lafa misy zavo baka an-driaky eny. Zay ro mahavy anay mampiasa fitaova mba hitari-dala anay. Manaraky fandaharam-potoa voafaritsy soa koa zahay mba tsy ho tratsini-riaky soro.”

Mitory amy ty raiky amy nosy a Halligen eny

Nisy vokany soa va ezaky rezay? Nitantara mikasiky lahilahy raiky 90 tao, mazoto mamaky gazety Ny Tilikambo Fiambenana noho Mifohaza! zay Ulrich. Hoy ty asany: “Ndraik’andro zay, le kelikely avao ty fotoa nanananay, ka tsy afaky nitsidiky lahilahy io zahay. Fe talohani-handehananay, le nania anay tamy bisikilety ie sady nivola hoe: ‘Tsy ameanareo gazety va aho?’ Falifaly biby zahay nanome azy ani-raha iny.”