Hanenty ty anatiny ao

Vavolombelo Jehovah

Hifily safà Vezo

Fampisehoa JW.ORG Tamy Foara Mikasiky Boky Natao ta Toronto Any

Fampisehoa JW.ORG Tamy Foara Mikasiky Boky Natao ta Toronto Any

Nisy Foara Iharoam-pirenena Mikasiky ty Boky tamy trano be raiky fanaova fivoria a Toronto any tamy 13 zisiky 16 Novambra 2014. Maro ty boky natoro tao, ty sisany boky vita pirinty ty hafa tamy pozy elektroniky. Naharitsy efatsy andro foara iny, ka olo 20 000 mahery ro niavy.

Nana standy tamy foara io tao koa ty Vavolombelo Jehovah, le natao malangy biby ty lokony. Nisy latabo nahità tablette ty tao, mba hampisehoa amin’olo hoe manao akory ty fampiasà jw.org zao.

Hoy ty asany raiky amy tompon’andraikitsy tamy foara iny: “Moderina biby tranonkalanareo toy.” Tokony hangalatahaky ty fomba fampizelanareo raha, mpampizela hafa reo. Nitsidiky tamy standy iny tao olo raiky zay, le hoy ty asany, mahay ty olo namoro tranonkala io, mora ampiasà raha io, sady mamaly ze fanontanea manahiran-tsay. Tseriky koa rozy satria manampy ty olo hiatriky raha manahira noho tsy hiasa loha marè tranonkala iny.

Niresadresaky tamin’olo nitsidiky standy fampizelà iny ty Vavolombelo niasa an-tsitrapo nijano teo, le nahita hoe mbo tsy naharè mikasiky jw.org mihintsy ty ankamaroan’olo rey. Matetiky rozy le naneky handramby karatsy jw.org na taratasy mivalo hoe Aia ty Ahità ty Valiny Fanontanea Manahira Antsika Rey? Maro ty nivola fa mbo hanenty tranonkala io ndraiky. Ty sisany aza nangataky hotsidihy ty Vavolombelo Jehovah an-tranony any.

Natao “andron’ajà” ty andro zoma tamy foara iny. Bakeo nisy Vavolombelo nanoro kisarisary tamy jw.org tao. Nisy ajà maromaro niaraky tamy mpampianatsy azy nijano sady nanenty any raha zay.

Natao fampizelà tao koa Ny Soratra Masina—Fandikan-tenin’ny Tontolo Vaovao. Falifaly biby lahilahy raiky baka a Chicago any zay nahita ty hasoany Baiboly iny. Mpiasa amy orinasa raiky mpanao pirinty Baiboly koa ie. Ta hifandramby amy mpanao pirinty ty Baibolintsika ie, ka namea azy karatsy jw.org iny.

Misy amy safà 700 mahery ty tranonkalantsika, le ty 16 amy raha zay ro nihentea mpitsidiky rey. Anatiny zay ty safà amharique, Bengali, anglisy, espaniola, fransè, grika, hindi, koreanina, ourdou, portogey, soedoà, sinoa, tamoul, Tigrigna, le vietnamianina.

Tsapany Vavolombelo raiky nandramby mpitsidiky tamy standy fampizelà iny teo, fa tsy mitovy mihintsy ty hoe miresaky amin’olo mikasiky tranonkala iny noho ty hoe mampiseho azy amin-drozy. Hoy ty asany: “Falifaly biby zahay fa afaky mampiseho any tranonkala iny amin’olo.”