Hanenty ty anatiny ao

Vavolombelo Jehovah

Hifily safà Vezo

Miova Hevitsy Mikasiky ty Fampilira Lio ty Dokotera

Miova Hevitsy Mikasiky ty Fampilira Lio ty Dokotera

Fa liany ela ty Vavolombelo Jehovah ro injìnjỳ ty olo satria tsy maneky hampilira lio. Ty torolala ty Baiboly hoe ‘mifaly ty lio’ ro mahavy an-drozy tsy haneky raha zay. (Asan’ny Apostoly 15:29) Fe lasa disadisa amin-drozy noho amy ty dokotera raha zay, satria mihevitsy ty dokotera fa ty fampilira lio ro fomba soa marè hitsaboa ty marary.

Fe mihamaro henanizao ty dokotera za-draharaha mivola ty antony mahasoa ty tekniky fitsaboa tsy ampiasà lio.

Nampiboaky tatitsy manoka mikasiky ty lio ty gazety Stanford Medicine Magazine, tamy 2013. Misy pakilany amy tatitsy io manday ty lohateny hoe “Mihamaro ty Miala amy Mahazatsy ka Tsy ta Hampilira Lio Sasy.” Nivola Sarah Williams, azy nanoratsy lahatsoratsy io hoe: “Nisy fikaroha natao tamy lapotaly amy tany toy iaby, tanaty ty folo tao farany. Hita tamy raha zay fa mampiasa lio matetiky noho imaro kokoa mandilatsy ty ilà ty marary ty dokotera, ndre amy efitsy fandrasa any zay ndre amy efitsy firoroa ty marary any.”

Nitalily ty safà Patricia Ford, mpanory noho direktera ty Foibe ho ahy ty Fitsaboa Tsy Ampiasà Lio, amy Lapotaly Pennsylvania ao, Sarah Williams. Hoy Dr. Ford: “Fa masaky an-tsay ty dokotera ty hoe homaty ty olo laha tsy ampy ty liony, sady ty lio ro manavotsy ay ... Misy maha marina azy avao raha zay, * fe laha hentea amy ty ankamaroa ty marary noho ty raha misy, le tsy marina raha zay.”

Vavolombelo Jehovah 700 eo ho eo santao ro tsaboiny Dr. Ford. Nivola avao ie hoe: ‘Maro tamy ty dokotera niresaky tamiko ro nana hevi-diso hoe tsy ho avotsy mihintsy ty marary laha tsy ampilira lio. Ndre zaho aza fa mba nieritseritsy nanahaky zay koa. Fe nanjary hitako hoe afaky mitsabo soa ty marary iha laha mampiasa tekniky tsotra vitsivitsy.’

Nisy fikaroha natao tanaty 28 tao tamy ty marary natao operasiò fo, tamy lapotaly raiky zay tao. Nampiboaky ty valy raha zay ty gazety Archives of Internal Medicine tamy aogositra 2012. Hita fa mora janga kokoa ty Vavolombelo Jehovah laha ampitovizy amy ty marary hafa. Kelikely ty raha sarotsy miseho amin-drozy anaty fitsaboa iny sady azo tamàny ty hahaveloman-drozy afara fandrasà iny. Samby mety ho velo anaty ty 20 tao afara fandrasa iny, ndre rozy ndre ty marary nampilira lio.

Tamy 8 Avrily 2013, le nivola ty lahatsoratsy raiky tamy Gazety The Wall Street Journal hoe: ‘Fa an-taony maro ty nanaova fandrasa tsy ampiasà lio tamy ty marary tsy maneky hampilira lio no ho ty fivavahany. Mihamaro henanizao ty lapotaly manao raha zay. Mivola ty dokotera mpandrasa manoha ty fandrasa tsy ampiasà lio, fa mampihena ty drala lany ty lapotaly mba hivilia lio, hanajaria noho hikarakarà azy, sady hanaova analizy noho hampilira azy amy ty marary tekniky io. Ankoatsy zay, tsy atahora ho voa ty arety na ty raha manahira hafa azo baka amy fampilira lio ty marary tsy ampilira lio, ka tsy voatery mijano ela an-dapotaly ao.’

Tsy mahatseriky laha nivola, Robert Lorenz, direktera ty sampan-draharaha miandraikitsy ty lio amy lapotaly raiky a Cleveland, Etazonia any hoe: “Avy le mieritseritsy iha hoe manday fanampea ho ahy ty marary lafa mampilitsy lio aminy ... Fe ty mifanohitsy amy zay ro ie, lafa hentea ty vokany raha zay afarafara any.”

^ feh. 5 Laha ta hahay ty fomba fahità ty Vavolombelo Jehovah ty lio, le henteo ty lahatsoratsy hoe “Fanontanea Fapetrakin’olo: Manino Nareo ro Tsy Maneky Fampilira Lio?