Hanenty ty anatiny ao

Ho amy fizarà anatiny any

Vavolombelo Jehovah

Vezo

Mpiasa An-tsitrapo Manomboky ty Asa Fanorena a Tuxedo Any

Mpiasa An-tsitrapo Manomboky ty Asa Fanorena a Tuxedo Any

Vo mangoantinana, amy fito latsaky fahefany, soa ty andro sady misy lagilasy matify manodidy ranovory kelikely a Tuxedo, a New York any iny. Ndrey misy lahilahy noho ampela maromaro manao akanjo noho kiraro fandesy miasa, militsy amy trano misy etazy efatsy ampita ranovory iny eo. Baka amy pilasy sankarazany olo reo, ao ty baka an-tranony any ty sisany baka amy hotely. Misy baka a Patterson, a Wallkill any, ty sisany baka a Brooklyn, 80 kilometatsy eo ho eo miala baka Tuxedo eo.

Tsy vo tamy andro io, fa fa elaela avao zay ty ankamaroan-drozy ro niala baka amy vazan-tany efatsy amy Etazonia, ho a New York ao. Nandeha any rozy mba hiasa an-tsitrapo. Ty sisany miasa anaty ty herinandro, ao ty vola raiky noho tampany, ty ilany mandilatsy any zay. Nianto-bata rozy tamy ty lian-drozy ho any, sady tsy mandramby karama amy ty asa atao any. Fe ndre zay, le falifaly avao rozy.

Tokotokony ho 120 eo ty mpiasa an-tsitrapo taminio, ndre mety mbo hiampy zay amy vola hoavy reo. Mana amy efitsy fihinana ao rozy, le manao kifolofolo saky latabo. Maro ty mino kafè. Rè ao ty hanitsy ty hena kosò atono baka an-dakozỳ any. Laha vo mipaiky ty amy 7, le manaraky fandiniha andinin-teny amy Baiboly ao amy ecran rozy. Folo limy amby minity afara raha zay, le misy mpanday sakafo mametraky hany an-databo eo. Mofo noho atoly voho avoany ro naharo amy henan-kosò natono iny. Hany soa zao!

Faràna amy vavaky tse fihinàna iny, bakeo samby ie mamonjy ty asany. Falifaly avao mpanao fanorena reo mifampiresaky sady mampitsatoky kasky fiarova loha, solomaso fiarova maso, manao akanjo malangy, noho sentira atsiky fiasà.

Ino moa asa ataon-drozy etoa io? Orinasa Iharoam-pirenena Mpanao Taratasy ro tetoa taloha, fe hovà ho pilasy fametraha ty fitaova noho ty raha ilà amy fanorena pilasy io, mba hanorena ty Foibe ty Vavolombelo Jehovah, a Warwick, tanà marinidriniky eny. Hamboara trano hipetraha, birò, trano fiasà, noho pilasy famoria fitaovam-piasà trano bevata fa tetoa reo. Nahazo lala baka amy ty manam-pahefa fanajaria tanà ty plan trano hanamboara Tuxedo, tamy talata 12 Marsa 2013.

Manao akory ty fandrambesa mpiasa an-tsitrapo reo lafa avy? Hoy William, baka New Jersey any: “Vo avy iha le fa atoro anao iaby ty raha tokony ho hainao, ohatsy hoe, efitsy misy anao, ty pilasy iaby ao noho ty fomba fampiasà lakilè. Lafa avy a Tuxedo etoa iha, le miresaky aminao ty mpiandraikitsy ty asanao afara ty fihinana maray. Hazavaniny aminao ze tokony hataonao.”

Ka manao akory ty miasa etoa? Namaly raha zay ty safà Yajaira. Baka Porto Rico any rozy morovaly, le manampy amy fanaova rindry plakôplatra noho raha hafa ty asan-drozy. Nivola ie hoe: “Mifoha amy 4.30 maray eo ho eo zahay, le mandamindamy trano, mino kafè, bakeo mana amy bisy mpanday anay iny any. Zahay aloha le vozaky lafa avy ty hariva! Fe tsy manahy satria falifaly iaby zahay, sady ataho raha tsy hovitavita ty hehinay.”

Atsiky ala ty manodidy Warwick mbeny. Manampy amy fanomana pilasy hanaova fanorena a Warwick any io Zach noho Beth valiny, baka Minnesota any. Lafa nanontanea rozy morovaly hoe nanino rozy ro nandeha atoy, le ho zao ty navaly Beth: “Mino zahay hoe ty manompo Jehovah ro raha farany ze soa amy ty fiaina. Ta hampiasa ty fahaizanay mba hanompoa azy zahay.”