Hanenty ty anatiny ao

Ho amy fizarà anatiny any

Vavolombelo Jehovah

Vezo

Ahavità Azy Avao va Roe Vola Zay?

Ahavità Azy Avao va Roe Vola Zay?

Falifaly iaby ty fianakaviany Betela ta Etazonia ao, tamy zoma 5 Jolay 2013, lafa nivola ho zao Anthony Morris, anaty ty Filan-kevi-pitantana: “Vita ty fifanaraha amy famarota trano bevata eny reo, tafilitsy amy zay 117 Adams Street noho 90 Sands Street a Brooklyn etoa. * Tsy maintsy miala amy Trano bevata Voalohany zisiky Faha-5 reo ao tsika, aloha ty fisasahany vola Aogositra ho avy zao.”

Asa be raha io, satria mitovy habè amy terrain fanaova laboly 11 ty velaran-tany misy any trano bevata limy reo. Fe ndre zay, le tsy maintsy niala tamy trano reo ao tanaty ty roe vola ty fianakaviany Betela.

Nisy masìny fanaova pirinty noho fanamboara boky tamy trano bevata limy reo tanaty ty tao maro. Fe nafindra tamy pilasiny vaovao ta Wallkill, a New York any masìny reo tamy 2004.

Tafara atoy, le natao pilasy fanajaria enta noho fikarakarà raha mba haharitsy, trano bevata reo. Ty fitaova ampiasà amy fanamboara noho fitaova am-birò voho ty raha hafa ilà amy tetikasa fanamboara a Etazonia noho an-tany hafa ro natao ao.

Nilà ty fahaiza mandamin-draha mba hahafaha hiala tamy trano bevata reo ao amy fotoa nifanaraha. Natao lista tse ty enta iaby tamy trano reo tao, mba hahità ze enta havily na haria na hohajarỳ. Bakeo nisy fandahara maromaro natao mba hialà malakilaky tamy trano reo tao. Fe ndre zay, le nitandrina soa koa mba tsy hisy loza hiseho.

Niasa mafy ty fianakaviany Betela tamy fifindrà iny. Nisy mpiasa an-tsitrapo tsy maharitsy 41, baka amy faritsy maro a Etazonia any, kinaiky mba hanampy an-drozy. Mpamaraky tsy manam-baly sady fatratsy ty ankamaroa mpiasa an-tsitrapo reo. Kinaiky mba hiasa tamy Betela any tanaty ty vola raiky noho tampany zisiky amy roe vola noho tampany rozy. Nienga fianakavia, nama, noho asa rozy mba hanaova raha zay. Ino ty tsapan-drozy?

Hoy Jordan, mpamaraky 21 tao baka amy Fanjakà Washington any: “Laha nihaiko fa nalefako fa ela ty fangatahako.”

Baka a Texas any Steven, 20 tao. Hoy ty asany: “Tsapako hoe anaty ty fianakaviambe iharoam-pirenena mazoto miasa noho falifaly aho!”

Hoy Justin, mpamaraky 23 tao: “Le nainako aho ho amy Betela eto avao. Soa fanahy noho hendry ty olo etoa sady mpinama iaby.”

Baka a Porto Rico any Adler, 20 tao. Hoy ty asany: “Tsy mora tamiko aloha ty nifoha maray! Fe nahazo nama vaovao aho lafa tatoy, sady ho mpinama zisiky farany zahay.”

Hoy William, 21 tao: “Nofinofiko liany nahakely ahy, ty ho amy Betela atoa. Nieritseritsy aho hoe ho trobo any aho sady ho morimoritsy. Fe diso eritseriko zay. Mbo tsy nisy raha niteako mandilatsy ty raha tamy Betela tatoa mihintsy! Tsy misy raha soa mandilatsy ty hoe manompo etoa.”

Nivita mpiasa mazoto reo tamy fotoa nifanaraha iny avao va asa iny? Roe vola latsaky aza ty namitan-drozy azy, satria 55 andro le fa vita fifindrà iny.

^ feh. 2 Amy 2017 vo zay ialà trano bevata amy 90 eo iny.