Hanenty ty anatiny ao

Ho amy fizarà anatiny any

Vavolombelo Jehovah

Vezo

Manino ty Vavolombelo Jehovah ro Tsy Maneky Fampilira Lio?

Manino ty Vavolombelo Jehovah ro Tsy Maneky Fampilira Lio?

Hevitsy diso eritseretinolo

Diso: Tsy mino ty Vavolombelo Jehovah fa mahajanga ty fanafody na ty fitsaboa.

Marina: Mila ze fitsaboa farany ze soa ho ahy ty vatanay noho ty fianakavianay zahay. Lafa tsy salama zahay, le mamonjy dokotera mahay mitsabo noho mandrasa tsy mampiasa lio. Teanay ty mahita ty fandrosoa vita amy resaky fitsaboa. Misy aza henanizao, fitsaboa tsy ampiasà lio, natao hanampea ty marary Vavolombelo Jehovah, fa ampiasà ho ahy ty olo iaby. Mahazo mifily tsy hampilira lio henanizao ty marary amy tany maro, mba hialà amy ty vokany raty manahaky ty arety mifindra amy alala ty lio, tsy fahampea ty hery fiarova, eo koa ty fahadisoa amy maha olombelo.

Diso: Mino ty fitahà amy alala ty finoa ty Vavolombelo Jehovah.

Marina: Tsy mitaha amy alala ty finoa ty Vavolombelo Jehovah.

Diso: Mandany drala ty fitsaboa tsy misy fampilira lio.

Marina: Mora ty fitsaboa tsy misy fampilira lio. *

Diso: Vavolombelo Jehovah maro ro maty santao, tafilitsy amy zay ty ajà, satria tsy maneky hampilira lio.

Marina: Tsy marim-pototsy mihintsy safà reo. Mandrasa fo, taola, noho mamindra taova matetiky ty mpandrasa, fe tsy mampiasa lio. * Salama soa mitovy na mandilatsy ty olo naneky hampilira lio ty marary tsy nampilira lio tafilitsy amy zay koa ty ajà. * Tsy zay avao, fa tsy misy olo afaky matoky tsy misy fisalasalà hoe ho maty ty olo raiky laha tsy maneky hampilira lio fa ho velo laha maneky.

Manino ty Vavolombelo Jehovah ro tsy maneky hampilira lio?

Tsy resaky fitsaboa ro mahavy raha zay, fa mikasiky finoa. Samby ahità didy mazava soa mampifaly lio ty amy Testamenta Taloha noho amy Testamenta Vaovao ao. (Genesisy 9:4; Levitikosy 17:10; Deoteronomia 12:23; Asan’ny Apostoly 15:28, 29) Mitovy amy ay ty fahità Ndranahary ty lio. (Levitikosy 17:14) Midika raha zay, fa tsy ty fanorihanay ty safà Ndranahary avao ro mahavy anay ho faly lio, fa ty fanajanay Ndranahary koa, satria ie ro Mpanome ay.

Maro ty olo miova hevitsy

Azo atao sady afaky ho vita soa tsy misy fampilira lio ndre ty fandrasà sarotsy.

Mpiasa ty fahasalamà maro ro nieritseritsy hoe fa lositsy marè ty raha atao ty olo tsy maneky hampilira lio. Famonoa fo aza ho asan-drozy ty fitsaboa tsy ampiasà lio. Fe niova hevitsy rozy tafara tatoa. Mivola ohatsy ty gazety raiky mikasiky fianara mitsabo tamy 2004 fa “hanjary fitsaboa mahazatsy ty tekniky natao hitsaboa ty Vavolombelo Jehovah afarafara ao.” * Nisy gazety hafa koa, tamy 2010, nivola fa “tsy tokony hatoka ho ahy ty Vavolombelo Jehovah avao ty ‘fandrasà tsy ampiasà lio’ fa tokony ho tampany raiky bevata hampiasà amy ty fandrasà hafa iaby.”(gazety Heart, Lung and Circulation)

Dokotera anarivony amy tany toy iaby henanizao ro mampiasa ty fitsaboa mitsitsy lio lafa manao fandrasà sarotsy sady tsy misy fampilira lio. Mampiasa fitsaboa solo ty fampilira lio reo ndre ty tany mandroso. Maro koa ty marary tsy Vavolombelo Jehovah mitaky hanaova karaza fitsaboa reo.

^ feh. 8 Henteo ty boky Transfusion and Apheresis Science, Boky faha-33, No. 3, p. 349.

^ feh. 10 Henteo The Journal of Thoracic and Cardiovascular Surgery, Boky faha-134, No. 2, p. 287-288; Texas Heart Institute Journal, Boky faha-38, No. 5, p. 563; Basics of Blood Management, p. 2; noho Continuing Education in Anaesthesia, Critical Care & Pain, Boky faha-4, No. 2, p. 39.

^ feh. 10 Henteo The Journal of Thoracic and Cardiovascular Surgery, Boky faha-89, No. 6, p. 918; noho Heart, Lung and Circulation, Boky faha-19, p. 658.

^ feh. 14 Continuing Education in Anaesthesia, Critical Care & Pain, Boky faha-4, No. 2, p. 39.