Hanenty ty anatiny ao

Ho amy fizarà anatiny any

Vavolombelo Jehovah

Vezo

Mino ty Testamenta Taloha va ty Vavolombelo Jehovah?

Mino ty Testamenta Taloha va ty Vavolombelo Jehovah?

Eka. Mino zahay fa “baka amy hery ty fanahy masy Ndranahary, sady mahasoa” ty raha iaby amy Baiboly ao. (2 Timoty 3:16) Anaty raha zay ty Testamenta Taloha noho ty Testamenta Vaovao, araky fikaiha ty olo an-drozy. Fa zahay mikaiky an-drozy hoe Soratsy Hebreo noho Soratsy Grika Kristiana, mba tsy hieritsereta hoe fa lany daty na tsy ilà sasy ty pakilany sisany amy Baiboly.

Manino ro samby ilà ty Kristiana iaby ndre ty Testamenta Taloha ndre ty Testamenta Vaovao?

Nampanoraty Ndranahary apostoly Paoly hoe: “Ze raha iaby voasoratsy taloha, le nisoraty ho fianara ho ahintsika.” (Romanina 15:4) Midika zay, fa misy fianara ho ahintsika amy Soratsy Hebreo ao. Ao ty tantara andrambesa fianara noho ty torohevitsy mahasoa.

  • Tantara andrambesa fianara. Tantaràny amy Soratsy Hebreo ao amy an-tsipiriany ty tantara ty famorona noho ty raha nahavy ty olombelo hanota. Laha tsy teo fanazavà zay, le tsy ho nihaintsika ty valy fanontanea manahaky hoe: Nanao akory ty nampisy antsika? Ino ro mahavy ty olombelo ho maty? (Genesisy 2:7, 17) Volany amy Soratsy Hebreo ao koa ty fomba nifandrambesa Jehovah Ndranahary tamy ty olo nanan-draha naha falifaly noho ty olo nanan-draha nanahira, manahaky antsika.—Jakoba 5:17.

  • Torohevitsy mahasoa. Misy torohevitsy tsy mety lany daty amy bokiny Ohabolana noho Mpitoriteny ao, anaty ty Testamenta Taloha boky reo. Volany amy boky reo ao hoe manao akory ty hahasambatsy ty fianakavia (Ohabolana 15:17), manao akory ty ahaiza mandanjalanja amy resaky asa (Ohabolana 10:4; Mpitoriteny 4:6), noho manao akory ty azo ty tanora ampiasà ty fiainany amy ty fahatanorany (Mpitoriteny 11:9–12:1).

Mahazo raha soa koa tsika, lafa mianatsy ty lalàna Mosesy amy Torah ao (boky limy voalohany amy Baiboly ao). Tsy feheziny Lalàna io sasy ty Kristiana. Fe misy toro lala mahasoa manampy antsika ho sambatsy ty ao.—Levitikosy 19:18; Deoteronomia 6:5-7.