Hanenty ty anatiny ao

Ho amy fizarà anatiny any

Vavolombelo Jehovah

Vezo

Manino ty Vavolombelo Jehovah ro Tsy Mankalaza Krismasy?

Manino ty Vavolombelo Jehovah ro Tsy Mankalaza Krismasy?

Hevitsy diso eritseretinolo

Diso: Tsy mankalaza Krismasy ty Vavolombelo Jehovah satria tsy mino Jesosy.

Marina: Kristiana zahay. Mino zahay fa amy alala Jesosy Kristy raiky avao ro ahazoa fanavota.—Asan’ny Apostoly 4:12.

Diso: Mampisaratsaraky fianakavia nareo lafa mampianatsy ty olo tsy hankalaza Krismasy.

Marina: Vatan-draha aminay ty fianakavia, ka mampiasa ty Baiboly zahay mba hahavy ty fianakavia hifankatea.

Diso: Maty antoky nareo satria tsy hainareo ty raha soa misy amy Krismasy. Ao ty fazotoa manome, ty filongoa, noho ty fifanampea.

Marina: Miezaky marè zahay sanandro mba ho tea manome noho hilongo aminolo. (Ohabolana 11:25; Romanina 12:18) Manaraky torohevitsy Jesosy toy, ohatsy, ty fivoria noho ty asa fitoria ataonay: “Fa nahazo tsy nisy takalony nareo, ka manomeza tsy misy takalony.” (Matio 10:8) Ankoatsy zay, le atoronay ty olo fa ty Fanjakà Ndranahary ro azo tamàny hampisy filongoa an-tany etoy.—Matio 10:7.

Manino ty Vavolombelo Jehovah ro tsy mankalaza Krismasy?

  • Ty nahafatesany, fa tsy ty nahaterahany ro nandidia Jesosy hankalazà.—Lioka 22:19, 20.

  • Tsy nankalaza Krismasy ty apostoly noho ty mpianatsy Jesosy voalohany. Hoy ty Bokim-pahaia Katolika Vaovao: “Tafara ty tao 243 [Afara Kristy] vo nisy ty fankalazà ty Andro Nahateraha Jesosy.” Fa zato tao mahery tafara ty nifateza ty farany amy apostoly reo raha zay.

  • Tsy misy porofo hoe teraky tamy 25 Desambra Jesosy. Tsy voasoratsy amy Baiboly ao ty daty nahaterahany.

  • Mino zahay fa tsy ekè Ndranahary ty fankalazà Krismasy satria baka amy ty fombafomba noho fety fatao ty mpanompo sampy.—2 Korintianina 6:17.

Manino ro imaroa resaky ty Krismasy?

Olo maro ro mbo mankalaza Krismasy avao, ndre fa hainy aza hoe baka amy mpanompo sampy raha io sady tsy ampirisihy ty Baiboly. Mety hametraky fanontanea retoa rozy: Manino ty Kristiana sisany ro mifily hanaraky hevitsy halanolo maro? Manino ty Krismasy ro ialia hevitsy?

Mampirisiky antsika ‘hampiasa ty saintsika’ noho hahay hanapa-kevitsy ho ahy ty vatantsika ty Baiboly. (Romanina 12:1, 2) Ampianariny koa tsika mba tsy hanao ambanin-draha ty fahamarina. (Jaona 4:23, 24) Ka, ndre teantsika hieritseritsy raha soa mikasiky antsika aza ty olo hafa, le orihintsika avao ty torolala ty Baiboly, ndre ho maro aza ty mpalay antsika.

Fe, ndre tsy mankalaza Krismasy aza zahay, le manaja ty zo ty olo kiraidraiky hanapa-kevitsy mikasiky raha zay. Tsy manakantsaka olo tsy hankalaza Krismasy zahay.