Hanenty ty anatiny ao

Vavolombelo Jehovah

Hifily safà Vezo

Ino Watch Tower Bible and Tract Society Zao?

Ino Watch Tower Bible and Tract Society Zao?

Fikambàna ampiasàny Vavolombelo Jehovah mba hanaova ty asany amy tany toy iaby Watch Tower Bible and Tract Society of Pennsylvania zao (Fikambàna Tilikambo Fiambena.) Natsanga tamy 1884 raha io, mifanaraky amy Lalànany Pennsylvanie, an’Etazonia any. Tsy natao hilà drala fikambàna io, fa natao mba hampandehana soa ty asanay. Raiky amy asa atao fikambàna io ty fanamboara Baiboly, voho boky noho gazety ara-baiboly.

Voasoratsy amy taratasy mifehy any fikambàna io, fa ty “hivavaky noho hampianatsy voho hanao asa soa” ro raha kendrèny, sirtò ty “fampianara noho fitoria ty vaovao soa ty Fanjakà Ndranahary, andesy Kristy Jesosy.” Tsy ze olo manome drala be mba hanohana ty asa atao fikambàna io ro tafilitsy ho mpikamba ao, fa ze nahazo fanasà avao. Manampy ty Filan-kevi-pitantanany Vavolombelo Jehovah mpikamba ao reo noho ty mpandraikitsy an-drozy.

Miaraky Miasa amy Fikambàna Ara-dalàna Maromaro

Ankoatsy any Watch Tower Bible and Tract Society of Pennsylvania, le mampiasa fikambàna ara-dalàna maromaro amy tany samby hafa any koa ty Vavolombelo Jehovah. Ty anarany sisany amy fikambàna reo misy hoe “Watch Tower” na “Watchtower” (amy safà anglisy na amy safà an-tanà eo.)

Fikambàna ara-dalàna maromaro reo, ro mahavy anay mahavita raha maro. Retoa ty raha sisany vitanay:

  • Mamboatsy boky noho gazety. Namboatsy Baiboly 220 tapitrisa teo ho eo, noho gazety ara-baiboly 40 000 tapitrisa teo ho eo amy safà 700 mahery zahay. Mbo ao koa ty tanonkalanay jw.org. Misy amy safà 120 mahery tranokala io sady tsy mandoa drala iha fa afaky mamaky Baiboly ao amy zao avao. Mamaly fanontanea ara-baiboly maro koa ao, ohatsy hoe “Ino Fanjakà Ndranahary Zao?”

  • Mampianatsy. Mandamy sekoly sankarazany natao hianara Baiboly zahay. Vavolombelo Jehovah 8 000 mahery, ohatsy, ro fa nampiofany tamy Sekoly Ara-baiboliny Gileada, nanomboky tamy 1943. Ampiofany soa rozy mba hanjary misionera na ho afaky hampandroso ty asa ataonay amy tany toy iaby. Manao fivoria amy fiangona misy anay kiraidraiky any koa zahay sankerinandro, mba hianatsy Baiboly. Olo an-tapitrisany ro mamonjy fivoria io sady tsy Vavolombelo ty sisany amin-drozy. Misy sekoly fianara mamaky teny noho manoratsy koa alaminay sady fa nampiboaky boky fianara mamaky teny noho manoratsy amy safà 110 zahay.

  • Manao asa soa. Manampy olo tra-doza koa zahay. Mety ho loza vokatsy ty raha nataon’olombelo zay, manahaky adim-poko ta Rwanda tany tamy 1994 iny, na loza araky ty natiora, manahaky horohoron-tany ta Haïti tany tamy 2010 iny.

Mahavita raha maro zahay satria eo fikambàna ara-dalana ampiasànay reo. Fe ndre zay, le tsy fikambàna reo avao ro tamàninay. Manao ezaky bevata koa ty Kristianina kiraidraiky, ka manao ty asa nampanaovy Ndranahary, tsy ino zay fa ty fitoria noho fampianara mikasiky ty vaovao soa. (Matio 24:14; 28:19, 20) Matoky zahay fa an-dambosinay ao Ndranahary. Ie ro “mampitombo” anay sady mbo manoha anay zisiky farany.—1 Korintianina 3:6, 7.