Hanenty ty anatiny ao

Ho amy fizarà anatiny any

Vavolombelo Jehovah

Vezo

Akory ty Fahitani-Vavolombeloni-Jehovah ani-Fombafomba amy Faty Rey?

Akory ty Fahitani-Vavolombeloni-Jehovah ani-Fombafomba amy Faty Rey?

Ze raha ampianarini-Baiboly avao ro ataonay noho ekenay lafa misy faty. Retoa ty sisany amy raha rezay:

  • Tsy diso ty olo laha malahelo lafa maty longo. Nalahelo mpianatsini-Jesosy rey, lafa nimaty ty longo na ty naman-drozy. (Jaona 11:33-35, 38; Asan’ny Apostoly 8:2; 9:39) Lafa misy maty, le tsy eritseretinay ho fanaova fety na fifalifalea fotoa zay. (Mpitoriteny3:1, 4; 7:1-4) Fa tokony ho fiaraha malahelo amin’olo maty longo iny.Romanina 12:15.

  • Tsy mahay ndre ino ndre ino ty maty. Misy fombafomba mampiseho hoe mbo mahatiaro ty maty sady afaky mifandramby amy ty velo. Fe tsy mifanaraky amy Soratsy Masy fombafomba rey ka tsy ataonay. (Mpitoriteny 9:5, 6, 10) Retoa ty sisany aminy: Ari-tory, fety, famadiha, fanaova soro, miresaky na mangataky fitahia amin’olo maty, noho ty fombafomba fataon’olo maty valy. Halavirinay fombafomba reo, satria manoriky raha volanini-Baiboly toy zahay: “Misaraha aminy, . . . le ka mikasiky raha maloto sasy.”2 Korintianina 6:17.

  • Mbo hovelomy ndraiky ty maty. Ampianarini-Baiboly fa mbo hovelomy ndraiky ty maty sady tsy hisy sasy ty fahafatesa. (Asan’ny Apostoly 24:15; Apokalypsy 21:4) Ty fitamananay ani-raha zay ro manampy anay tsy hanao raha lisatsy loatsy lafa misy maty. Tsy nanao raha lisatsy loatsy koa ty Kristiana voalohany.1 Tesalonianina 4:13.

  • Mivola ty Baiboly fa ilà ty miambany. (Ohabolana 11:2) Tsy ataonay ho fotoa “fampizelazelà” hanana na ho fireharehà ty faty. (1 Jaona 2:16) Ka tsy manao fandevena maresaky biby zahay mba hampifalifalea olo. Tsy mivily na mampamboatsy vatam-paty lafo biby koa zahay, sady tsy manao fisikina maninto mason’olo.

  • Tsy forosevanay hanaraky ty raha inoanay ty olo hafa. Hoy ty Baiboly: “Samby mbo hatao-Ndranahary ankety tsika kiraidraiky.” (Romanina 14:12) Fe ndre zay, le miezaky manazava ty raha inoanay amin’olo avao zahay, sady ataonay “amim-pahalemeam-panahy noho amim-panajà laliky” raha zay.1 Petera 3:15.

Akory ty ataoni-Vavolombeloni-Jehovah lafa mikarakara fandevena?

Pilasy: Laha mangataky lahatenim-pandevena tompon-dongo maty iny, le mety hatao amy Efitrano Fanjakà any raha zay na an-tranon-drozy any na amy pilasy anaria ani-faty iny any na an-dolo any.

Lahatenim-pandevena: Atao lahateny io mba hampahereza ani-fianakavian’olo maty iny. Hohazavany hoe ino ty raha volanini-Baiboly mikasiky ty maty noho ty fameloma ty maty. (Jaona 11:25; Romanina 5:12; 2 Petera 3:13) Mety horesahy ao koa ty toetsy soa nananan’olo maty iny na ty ohatsy soa nengany tamy fanompoa a Ndranahary.—2 Samoela 1:17-27.

Mety hisy hira miory amy Soratsy Masy koa hohirà amy fotoa io. (Kolosianina 3:16) Hisy vavaky mampahery hatao lafa tampitsy lahateny iny.Filipianina 4:6, 7.

Rakitsy na karama: Tsy mitaky drala amy ty mpiaraky mivavaky aminay zahay lafa manao fotoam-pivavaha, tafilitsy amy zay ty lahatenim-pandevena. Tsy mitanty rakitsy koa zahay lafa miaraky mivory mba hianatsy Baiboly.Matio 10:8.

Mpanatriky: Afaky manatriky iaby ty olo tsy Vavolombeloni-Jehovah lafa misy lahatenim-pandevena atao amy Efitrano Fanjakà any. Manahaky fivoria hafa ataonay rey, le afaky manatriky iaby ty olo iaby.

Manatriky ty fandevena karakarani-fivavaha hafa va ty Vavolombeloni-Jehovah?

Ty kiraidraiky ro manapa-kevitsy na handeha ie na tsy handeha. Ty feoni-fieritseretany nampiofanini-Baiboly ro arahiny amy fotoa zay. (1 Timoty 1:19) Fe tsy mandramby anjara amy fombafomba ara-pivavaha mifanohitsy amy ty raha volanini-Baiboly zahay.2 Korintianina 6:14-17.