Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Vaovao Soa Baka Amy Ndranahary!

 Fianara 9

Manao Akory ty Hahasambatsy Anareo Trano Raiky?

Manao Akory ty Hahasambatsy Anareo Trano Raiky?

1. Manino ty mpivaly ro mila misoratsy?

Mana vaovao soa ho ahinolo trano raiky Jehovah. Ndranahary falifaly ie, ka teany ho falifaly noho ho sambatsy koa ty olo trano raiky. (1 Timoty 1:11) Ie ro namoro ty fanambalea. Mila misoratsy ty mpivaly soa hifanaraky soa noho hifankatea sady ho voaro ty anan-drozy. Tokony hisoratsy ty Kristiana lafa hanambaly satria manaraky lalàna.—Vakio Lioka 2:1, 4, 5

Manao akory ty fahità Ndranahary ty fanambalea? Teany hiaraky zisiky farany ty mpivaly. Hala Jehovah ty olo maromaso. (Hebreo 13:4) Tsy teany laha misaraky ty mpivaly. (Malakia 2:16) Fe afaky mifily ty hisaraky ty mpivaly laha nandranto ty valiny. Afaky manambaly olo hafa ie bakeo laha teany.—Vakio Matio 19:3-6, 9.

2. Mila manao ino ty mpivaly soa ho sambatsy?

Natao Jehovah lahilahy noho ampela ty olo, soa hifanampy lafa mifanambaly. (Genesisy 2:18) Ty lahilahy ro mitariky amy tokantrano ao. Mila manome ze raha ilà ty valiny noho ty anany ie, mila mampianatsy an-drozy mikasiky Ndranahary koa ie. Mila tea marè ty valiny ie. Mila mifanaja noho mifankatea ty mpivaly. Mila tsy mità heloky rozy lafa misy raha tsy nifanaraha, zay ro lakilè hahasambatsy ty tokantrano.—Vakio Efesianina 4:31, 32; 5:22-25, 33; 1 Petera 3:7.

 3. Mety va ty miala amy ty valinao lafa misy raha manahira?

Mety hisy raha manahira amy ty fanambaleanareo. Fe ndre zay le mila soa fanahy amy ty valinareo avao nareo. (1 Korintianina 13:4, 5) Tsy mampirisiky ty olo hiala amy ty valiny ty Baiboly ndre misy ty raha manahira.—Vakio 1 Korintianina 7:10-13.

4. Tea Jehovah hanao akory ty ajà?

Tea Jehovah ho sambatsy iha. Atoro Jehovah anao ze raha mila anovinao, soa ho falifaly avao iha. Teany hanoriky ty safà ty rae noho ty reninao koa iha, soa hahihitsy. (Kolosianina 3:20) Tea Jehovah ho hainao fa mahasambatsy ty manompo azy noho manoriky ty safà Anany iny.—Vakio Mpitoriteny 11:9–12:1; Matio 19:13-15; 21:15, 16.

5. Mila manao ino nareo rae noho reny soa ho sambatsy ty ananareo?

Mila miasa marè nareo soa hanome hany, trano noho siky ho ahy ty ananareo. (1 Timoty 5:8) Fe mila ampianarinareo ho tea noho hanoriky ty safà Ndranahary koa rozy soa ho sambatsy. (Efesianina 6:4) Mila tea Ndranahary nareo soa horihin-drozy koa raha zay. Ty safà Ndranahary ro ampiasao lafa mananatsy an-drozy. Hanao raha soa avao rozy laha zay ro ataonareo.—Vakio Deoteronomia 6:4-7; Ohabolana 22:6.

Mila ampirisihy hanao raha soa avao ty ajà. Isaora ie lafa nisy raha soa vitany. Fe mila anary koa rozy. Hiaro an-drozy tsy hana fiaina raty raha zay. (Ohabolana 22:15) Fe ka masiaky marè loatsy lafa mananatsy an-drozy.—Vakio Kolosianina 3:21.

Mampiboaky boky maro natao hanampea ty rae noho ty reny voho ty anaky ty Vavolombelo Jehovah. Hevitsy baka amy Baiboly ao ro hita amy boky reo ao.—Vakio Salamo 19:7, 11.