Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Vaovao Soa Baka Amy Ndranahary!

 Fianara 5

Ino ty Raha Tea Ndranahary Hatao Amy Tany Toy?

Ino ty Raha Tea Ndranahary Hatao Amy Tany Toy?

1. Nanino Ndranahary ro namoro tany toy?

Namoro tany toy ho ahy ty olombelo Ndranahary. Midika raha zay fa lafa namoro Adama noho Eva ie le tsy nataony hiay an-danitsy any rozy. Ty anjely ro nataony hiay any. (Joba 38:4, 7) Napetra Ndranahary tamy zariday soasoa mana anara hoe Edena, ty olombelo. (Genesisy 2:15-17) Tea Jehovah hana fiaina soa tsy misy farany amy tany toy eto ty olo.—Vakio Salamo 37:29; 115:16.

Zariday Edena io avao tseky ro niparadisa tamy voalohany. Nivola tamy Adama noho Eva Jehovah hiteraky noho hameno tany toy. Ho niasa noho nikarakara zariday io rozy, ka lafa nandeha ty fotoa, le ho nanjary paradisa iaby tany toy. (Genesisy 1:28) Tsy ho rava mihitsy tany toy. Hisy olo hiay avao ty etoy.—Vakio Salamo 104:5.

2. Manino ro tsy paradisa tany toy henanizao?

Tsy nanoriky safà Ndranahary Adama noho Eva, ka le niroasiny tsy hipetraky tamy zariday io ao. Simba paradisa iny, sady tsy nisy olo nahavita nampipoly azy sasy. Nanomboky tamy fotoa zay, le nanjary feno olo raty fanahy tany toy.—Vakio Genesisy 3:23, 24.

Midika va raha zay, fa nengà Jehovah raha teany hatao amy tany toy iny? Tsy zay! Ie ro mana hery faratampony. Mahavita ze raha teany hatao ie. (Isaia 45:18) Mbo hataony paradisa ndraiky tany toy, sady ho sambatsy ty olo.—Vakio Salamo 37:11, 34.

3. Fomba akory ro hahavy tany toy ho Paradisa?

Ho paradisa tany toy lafa Jesosy ro handay azy satria ie ro Mpanjaka nofily Ndranahary. Handripaky ze olo manohitsy Ndranahary Jesosy noho ty anjeliny, amy aly atao hoe  Hara-magedona. Lafa bakeo le hogadrà anaty ty 1 000 tao Satana. Ho avotsy ze olo tea Ndranahary satria harova Jesosy. Hana fiaina soa tsy misy farany amy Paradisa an-tany etoy rozy.—Vakio Apokalypsy 20:1-3; 21:3, 4.

4. Ombia vo tsy hisy sasy ty fijalea?

Ombia vo halà Ndranahary ty fijalea an-tany etoy? Nisy famantara namea Jesosy soa hahità, fa famariny ty farany. Mihamaro ty raha mampijaly ty olombelo henanizao. Hita baka amy raha zay, fa sisa kely, le fa tsy hisy sasy ty fijalea.—Vakio Matio 24:3, 7-14, 21, 22.

Handay tany toy baka an-danitsy any Jesosy, anaty ty 1 000 tao. Hataony tsy hisy sasy ty fijalea amy fotoa zay. (Isaia 9:6, 7; 11:9) Mpanjaka noho Mpisoro Be Jesosy. Hampiasa fahefà zay ie, hanafaha ty fahotà ze olo tea Ndranahary. Midika raha zay, fa hampiasà Ndranahary Jesosy soa tsy hampisy ty arety noho ty olo antitsy, voho ty faty.—Vakio Isaia 25:8; 33:24.

5. Ia ro hiay amy Paradisa ao?

Olo tea Ndranahary noho mianatsy manao ty raha teany ro ho hitanao amy Efitrano Fanjakà any

Ze olo manoriky ty safà Ndranahary ro hiay amy Paradisa ao. (1 Jaona 2:17) Naniraky ty mpanoridia azy Jesosy, hila noho hampianatsy ty olo hanoriky ty safà Ndranahary. Fa maro henanizao ty olo nampea Jehovah soa ho afaky hiay amy Paradisa an-tany etoy. (Zefania 2:3) Ianara amy trano fivavaha Vavolombelo Jehovah any, kaihy koa hoe Efitrano Fanjakà ty hoe manao akory ty hahavy ty rae noho ty reny hahay hiteza soa ty anany. Ianara ao koa ty hahavy ty mpivaly hifanaraky soa. Miaraky mianatsy amy baba noho ty reniny ao koa ty ajà, soa ho afaky hana fiaina soa.—Vakio Mika 4:1-4.