Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Vaovao Soa Baka Amy Ndranahary!

 Fianara 11

Ino Iaby ty Raha Soa Azontsika Baka Amy Torolala Amy Baiboly Ao?

Ino Iaby ty Raha Soa Azontsika Baka Amy Torolala Amy Baiboly Ao?

1. Manino tsika ro mila ty fitariha Ndranahary?

Manao akory ty hanampea ty torolala amy Baiboly ao antsika hiamby soa avao amy ty raha ataontsika?SALAMO 36:9.

Hendry mandilatsy antsika azy namoro antsika iny. Mikarakara antsika manahaky baba soa fanahy io ie. Hainy fa mila torohevitsy baka aminy tsika fa tsy mahay manday ty fiainantsika. (Jeremia 10:23) Manahaky anakajà mila ty babany noho ty reniny io, le mitovy amy zay koa fa mila Ndranahary koa tsika hitariky antsika amy ty fiainantsika. (Isaia 48:17, 18) Fanomeza baka amy Ndranahary ty torolala baka amy Baiboly ao.—Vakio 2 Timoty 3:16.

Laha manoriky ty lalàna noho ty torolala Ndranahary tsika, le afaky hana fiaina soa manomboky henanizao sady ho velo tsy misy farany koa. Mila manoriky ty torolala Ndranahary tsika satria ie ro namoro antsika.—Vakio Salamo 19:7, 11; Apokalypsy 4:11.

2. Ino ro maha samby hafa ty torolala noho ty lalàna?

Azo ampiasà amy raha maromaro ty torolala. Tsy manahaky zay ty lalàna satria natao handrarà raha raiky na raha vitsivitsy voafaritsy soa. (Deoteronomia 22:8) Mila mampiasa soa ty saintsika tsika laha teantsika ty hahay mampiasa torolala amy ty raha anovintsika. (Ohabolana 2:10-12) Mampianatsy ohatsy ty Baiboly fa fanomeza baka amy Ndranahary ty fiaina. Lafa dinihintsika soa torolala io, le ho haintsika fa mila manao soa avao tsika, tsy no hahavy loza amy ty vatantsika noho amy ty olo hafa lafa an-trano ao na lafa miasa na lafa mandeha an-dala eny.—Vakio Asan’ny Apostoly 17:28.

 3. Ino ty torolala roe farany ze bevata?

Niresaky mikasiky torolala roe bevata Jesosy. Ho zao ty voalohany: Mila tea Jehovah iha. Midika raha zay fa mila mianatsy ty raha mikasiky azy tsika sady manompo azy soa hisy dikany ty fiainantsika. Manampy antsika amy ty raha anovintsika sanandro torolala io. (Ohabolana 3:6) Hifandramby soa amy Ndranahary, ho sambatsy noho ho velo tsy misy farany ze olo manoriky soa torolala io.—Vakio Matio 22:36-38.

Ho zao koa ty faharoe: Mila tea ty namanao iha. Midika raha zay fa mila miezaky hifandramby soa aminolo tsika. (1 Korintianina 13:4-7) Tea manao raha soa aminolo Ndranahary, manahaky azy tsika laha manoriky torolala faharoe io.—Vakio Matio 7:12; 22:39, 40.

4. Ino iaby ty raha soa azontsika baka amy torolala amy Baiboly ao?

Mahavy ty olo trano raiky hifankatea soa ty fanoriha torolala. (Kolosianina 3:12-14) Ho sambatsy koa ty olo trano raiky laha manoriky torolala hoe: Soa laha tsy misaraky ty mpivaly.—Vakio Genesisy 2:24.

Miaro antsika amy raha maro ty fanoriha torolala amy Baiboly ao. Teanolo ampiasà ohatsy ty olo manoriky torolala satria mazoto miasa noho tea manao raha marina. (Ohabolana 10:4, 26; Hebreo 13:18) Mampianatsy antsika hahay hiay amy ze raha ananantsika koa ty torolala. Mampirisiky antsika koa ie ho tea Ndranahary mandilatsy ty hanana.—Vakio Matio 6:24, 25, 33; 1 Timoty 6:8-10.

Mahavy antsika ho salama ty fanoriha torolala amy Baiboly ao. (Ohabolana 14:30; 22:24, 25) Volany amy Baiboly ao fa tsy mety ty mamo. Laha manoriky torolala zay tsika, le tsy ho maty ty arety niazo baka amy toaky na ho voadodo ty tonabily na loza hafa. (Ohabolana 23:20) Engà Ndranahary hino toaky tsika, fe tsy teany laha manao mamo. (Salamo 104:15; 1 Korintianina 6:10) Mampianatsy antsika hanao raha soa noho handiniky soa, ty torolala amy Baiboly ao. (Salamo 119:97-100) Tsy ty hahazoa raha soa avao ro mahavy ty Kristiana hanoriky torolala reo, fa ta hanome voninahitsy Ndranahary rozy.—Vakio Matio 5:14-16.