Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Vaovao Soa Baka Amy Ndranahary!

 Fianara 4

Ia Jesosy Kristy Zao?

Ia Jesosy Kristy Zao?

1. Ia ro namoro Jesosy?

Manino ty olo ro tsy navaka namonjy Jesosy?—MATIO 11:29; MARKA 10:13-16.

Anjely tan-danitsy any Jesosy taloha ty niaviany tan-tany etoy. (Jaona 8:23) Jesosy ro niforony Ndranahary voalohany. Ie ro nanampy Ndranahary tamy famorona kila raha iaby. Ie raiky avao ro niforony Jehovah mivanta, ka zay ro nikaiha azy hoe Anaky ‘lahitoka’ Ndranahary. (Jaona 1:14) Mpanday Safà Ndranahary ie, le natao koa hoe ‘ty Safà.’—Vakio Ohabolana 8:22, 23, 30; Kolosianina 1:15, 16.

2. Manino Jesosy ro niavy tan-tany etoy?

Nirahy Ndranahary ho an-tany etoy Jesosy. Nafindrany tan-kibo Maria, ampela mbo tsy niaraky tamin-dahilahy zay ty ay anany io. Midika raha zay fa tsy olombelo ty baba Jesosy. (Lioka 1:30-35) Raha telo ro niavia Jesosy tan-tany etoy: 1) hampianatsy ty marina mikasiky Ndranahary, 2) hanorihantsika ty raha nataony amy fanaova ty sitrapo Ndranahary, ndre misy aza ty raha manahira, 3) hanome ty ainy tsy misy fahotà ho ‘vilim-panavota.’—Vakio Matio 20:28.

3. Manino tsika ro mila vilim-panavota?

Drala na raha aloa mba hanavota ainolo ro atao hoe vilim-panavota. (Eksodosy 21:29, 30) Tsy niforony Ndranahary ho antitsy noho ho maty ty olo. Manino tsika ro mivola raha zay? Nivola tamy Adama Ndranahary hoe ho maty ie laha tsy manoriky ty safany. Laha nanoriky safà Jehovah Adama, le tsy ho nimaty mihitsy. (Genesisy 2:16, 17; 5:5) Mivola ty Baiboly fa Adama ro nahavy ty olombelo ho maty.  Namindra fahotà tamy ty taranakiny ie. Fahotà zay ro nahavy antsika ho maty. Mila vilim-panavota tsika soa ho afaky amy faty niazo baka amy Adama io.—Vakio Romanina 5:12; 6:23.

Ia ro afaky mandoa vilim-panavota io ho antsika? Tsy misy olo fa nanao fahotà, afaky mandoa vilim-panavota ho ahy ty olo hafa. Lafa maty tsika le ty vatantsika avao ro afaky amy fahotà.—Vakio Salamo 49:7-9.

4. Ino ro nahavy Jesosy ho maty?

Tsy misy fahotà Jesosy. Midika raha zay fa, tsy ty fahotany ro nahavy azy ho maty. Tsy mbo nanota ie ndre in-draiky. Ty fahotà ty olo ro nahavy Jesosy ho maty. Le vatany bevata ty fitiava Ndranahary antsika, le nirahiny tan-tany etoy Jesosy soa ho maty ho ahintsika. Tea antsika koa Jesosy ka naneky hirahy Ndranahary ie.—Vakio Jaona 3:16; Romanina 5:18, 19.

5. Ino ty raha anovy Jesosy henanizao?

Tamy Jesosy tan-tany etoy, le nanafaky arety noho namelo olo fa nimaty voho nanafaky ty olo amy ty raha raty. Hita baka amy raha nanovy Jesosy reo ty raha mbo hataony ho ahy ty olo manoriky ty safà Ndranahary. (Matio 15:30, 31; Jaona 5:28) Tafara ty nahafaty azy, le novelomy Jehovah ie, ka nampoliny ho fanahy ndraiky. (1 Petera 3:18) Nandiny tamy tana havana Ndranahary teo ie zisiky hanaova Jehovah azy ho Mpanjaka. (Hebreo 10:12, 13) Mpanjaka an-danitsy any Jesosy henanizao. Vaovao soa zay ro volany ty mpanoridia azy amy tany toy iaby.—Vakio Daniela 7:13, 14; Matio 24:14.

Sisa kely, le hampiasa ty heriny Jesosy Mpanjaka. Handrava ty fijalea noho ze olo nahavy raha zay ie. Laha atoronao fa mana finoa Jesosy noho manoriky ty safàny iha, le hahazo fiaina soa amy paradisa an-tany etoy.—Vakio Salamo 37:9-11.