Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Vaovao Soa Baka Amy Ndranahary!

 Fianara 12

Mila Manao ino Iha Laha ta Hamonjy Ndranahary?

Mila Manao ino Iha Laha ta Hamonjy Ndranahary?

1. Mijanjy ze kila vavaky va Ndranahary?

Tea Ndranahary hivavaky aminy ty olo ndre aia ndre aia ty misy azy. (Salamo 65:2) Fe tsy ze kila vavaky ro janjininy. Tsy janjininy ohatsy ty vavaky ataonolo mampijaly ty valiny. (1 Petera 3:7) Lafa nanao raha raty koa ty Israelita, le tsy nijanjy ty vavaky nataon-drozy Ndranahary. Fe ndre zay, laha vatany mifona aminy ty olo nanao fahotà bevata, le mijanjy ty vavaky ataony Ndranahary. Voninahitsy bevata ty mivavaky.—Vakio Isaia 1:15; 55:7.

2. Ino iaby ro mila atao lafa mivavaky?

Jehovah raiky avao ro mila ivavaha satria ie ro Ndranahary namoro antsika. (Matio 4:10; 6:9) Mila anovy amy anara Jesosy koa ty vavaky satria mpanota tsika. Ie ro nahafoy ty ainy ho ahintsika. (Jaona 14:6) Tsy tea Jehovah hatao tsianjery na vakia amy taratasy ty vavaky. Teany laha baka amy fo ty vavaky ataontsika.—Vakio Matio 6:7; Filipianina 4:6, 7.

Re Jehovah avao ndre mivola aneritseritsy tsika lafa mivavaky. (1 Samoela 1:12, 13) Teany hivavaky avao tsika, ndre maray io, ndre hariva, ndre lafa hihina, ndre lafa misy manahira, ndre amy fotoa ino ndre amy fotoa ino.—Vakio Salamo 55:22; Matio 15:36.

3. Manino ty Kristiana ro miaraky mivory?

Maro ty olo tsy midary Ndranahary henanizao sady mikizaky rozy lafa iresaha ty raha ampitamany Ndranahary mikasiky ty hoe hisy fiaina soa an-tany etoy. (2 Timoty 3:1, 4; 2 Petera 3:3, 13) Midika raha zay fa ilà ty miaraky mivory  soa hifanampy tsy ho kivy noho tsy hiala amy Ndranahary.—Vakio Hebreo 10:24, 25.

Manampy anao hamonjy Ndranahary ty mifandramby aminolo teany. Hahavy anao tsy hiala amy Jehovah ty fandehana mivory miaraky amy Vavolombelo Jehovah, satria hahita olo mana finoa mantanjaky iha lafa any.—Vakio Romanina 1:11, 12.

4. Mila manao ino iha soa hamonjy Ndranahary?

Mamonjy Jehovah iha, lafa dinihinao soa ty raha nianaranao baka amy Baiboly ao. Eritsereto soa ty raha fa nataony noho ty torohevitsy ameany voho ty raha ampitamaniny. Laha mivavaky noho mandiniky soa iha, le ho hainao fa be fitiava noho hendry Jehovah.—Vakio Josoa 1:8; Salamo 1:1-3.

Mamonjy Ndranahary koa iha, laha atokisanao noho inoanao ie. Manahaky fambolea io ty finoa, ka tsy mitombo laha tsy tondrahy. Mampitombo ty finoanao koa iha, laha dinihinao soa avao ty raha inoanao noho ty nahavy anao hino raha io.—Vakio Matio 4:4; Hebreo 11:1, 6.

5. Ino ty raha soa azonao lafa mamonjy Ndranahary?

Mikarakara noho miaro ze olo tea azy Jehovah. Hampeany iha soa hana finoa matanjaky avao sady ho velo tsy misy farany. (Salamo 91:1, 2, 7-10) Laha manoriky ty safany iha, le tsy hanao raha hahavy anao harary na tsy ho sambatsy. Mampianatsy anao hana fiaina farany ze soa koa ie.—Vakio Salamo 73:27, 28; Jakoba 4:4, 8.