Hanenty ty anatiny ao

Ho amy fizarà anatiny any

Vavolombelo Jehovah

Vezo

Teanao ho Hay va ty Marina?

Teanao ho Hay va ty Marina?

TY MARINA mikasiky ino? Mikasiky ty fanontanea bevata manahira ty sainolo bakany bakany zay. Vasa fa nieritseretinao hoe:

  • Midary antsika vatany va Ndranahary?

  • Mbo ho tampitsy avao va ty aly noho ty fijalea?

  • Manao akory tsika lafa maty?

  • Mbo ho hitantsika ndraiky va ty longontsika fa nimaty?

  • Manao akory ty hahazoako valim-bavaky?

  • Manao akory ty hahasambatsy ahy?

Aia ty hilànao ty valiny fanontanea reo? Mety hahita boky maro mamaly fanontanea reo iha. Fe matetiky mifanohitsy ty raha volanin-drozy. Ty ilany, le ataho raha ho marina tse androany, bakeo lany daty laha hamaray, farany ovà na soloa.

Fe ndre eo zay, le misy boky raiky, misy ty valiny azo atokisa. Mivola ty marina avao boky io. Nivavaky tamy Ndranahary nanao ho zao Jesosy Kristy hoe: “Ty safànao ro fahamarina.” (Jaona 17:17) Ty Baiboly Masy ro ikaiha safà io henanizao. Mamaly fanontanea anabo eo reo ty Baiboly sady marina noho mazava ty amaleany azy. Ho hitanao atoa ty sisany amy raha rezay.

 Midary Antsika Vatany va Ndranahary?

INO TY MAHAVY FANONTANEA ZAY? Fa manjeky marè ty haratia sainolo noho ty tsy rariny. Maro ty fivavaha mivola fa sitrapo Ndranahary ty hijaleantsika.

INO TY VOLANY TY BAIBOLY? Tsy misy raha raty baka amy Ndranahary. Mivola ty Joba 34:10 hoe: “Sanatria amy Ndranahary marina iny ty hanao raty, sady sanatria amy azy Farany Ze Mahery iny ty hanao ty tsy rariny.” Ie aza mba ta hanao raha soa amy tany toy ka. Zay ro nahavy Jesosy hampianatsy antsika hivavaky hoe: “Babanay an-danitsy any ... ho avy lahy ty fanjakànao! Hatao an-tany etoy lahy ty sitraponao, manahaky ty an-danitsy any.” (Matio 6:9, 10) Le vatany midary antsika Ndranahary, kanao niasa mafy mba hanatanteraha ty sitrapony.—Jaona 3:16.

Henteo koa ty Genesisy 1:26-28; Jakoba 1:13; noho 1 Petera 5:6, 7.

Mbo ho Tampitsy Avao va ty Aly noho ty Fijalea?

INO TY MAHAVY FANONTANEA ZAY? Mbo mamono olo maro avao ty aly zisiky henanizao. Mahazo antsika iaby koa ty fijalea.

INO TY VOLANY TY BAIBOLY? Mampitamà Ndranahary fa hataony milamy tany toy iaby. Tsy “hianatsy aly sasy” ty olo, lafa manday ty Fanjakàny. “Hanefy ty sabatsiny ho sarỳ” rozy. (Isaia 2:4) Horavà Ndranahary ty tsy rariny noho ty fijalea. Mivola ty Baiboly hoe: “Hofafàny ty ranomaso iaby amy ty mason-drozy, ka tsy hisy fahafatesa sasy, sady tsy hisy sasy ty alahelo, na ty fitaraina, na ty raha mahararirary, fa fa lasa ty raha taloha.”—Apokalypsy 21:3, 4.

Henteo koa ty Salamo 37:10, 11; 46:9; noho ty Mika 4:1-4.

Manao Akory Tsika Lafa Maty?

INO TY MAHAVY FANONTANEA ZAY? Maro ty fivavaha mivola fa misy fanahy mbo velo ty anaintsika ao, lafa maty tsika. Misy mino fa afaky manisy raty na mitahy ty velo ty maty. Eo koa ty mivola fa sazỳ Ndranahary amy afobe any zisiky farany ty olo raty fanahy.

INO TY VOLANY TY BAIBOLY? Lafa maty ty olo le maty. Tsy maharè na mahita ie, sady tsy afaky mivola na mieritseritsy. “Ty maty tsy mahay ndre ino ndre ino”, hoy ty Mpitoriteny 9:5. Midika zay fa tsy afaky manisy raty ty velo na manampy an-drozy ty maty.—Salamo 146:3, 4.

Henteo koa ty Genesisy 3:19 noho ty Mpitoriteny 9:6, 10.

 Mbo ho Hitantsika Ndraiky va ty Longontsika fa Nimaty?

INO TY MAHAVY FANONTANEA ZAY? Ta ho velo avao tsika, ka hahazo tavy ty fiaina miaraky amy ty longontsika. Ka ara-dalàna laha ta hahita longontsika fa nimaty rey ndraiky tsika.

INO TY VOLANY TY BAIBOLY? Hovelomy ndraiky ty ankamaroanolo fa nimaty. Nivola Jesosy fa ‘hiboaky ty olo an-dolo any.’ (Jaona 5:28, 29) Ho tanteraky ty raha tea Ndranahary ho natao tamy voalohany tany iny, satria ho afaky hiay amy Paradisa an-tany etoy olo rey. (Lioka 23:43) Fahasalamà noho fiaina zisiky farany ro mandiny ty olo manoriky safà. Mivola ty Baiboly hoe: “Ty olo marina handova ty tany, le hipetraky eo zisiky farany.”—Salamo 37:29.

Henteo koa ty Joba 14:14, 15; Lioka 7:11-17; noho ty Asan’ny Apostoly 24:15.

Manao Akory ty Hahazoako Valim-bavaky?

INO TY MAHAVY FANONTANEA ZAY? Presky mivavaky iaby lafa olo mana fivavaha. Fe maro ty mahatsapa hoe tsy mahazo valim-bavaky.

INO TY VOLANY TY BAIBOLY? Nampianary Jesosy tsika mba tsy hanao tsianjery lafa mivavaky. “Lafa mivavaky”, hoy ty asany, “nareo, le ka mampimpolimpoly raha mitovy avao.” (Matio 6:7) Tsy maintsy atao amy ty itiava Ndranahary azy ty vavaky ataontsika, soa ho janjininy. Mila haintsika tse ty sitrapo Ndranahary, bakeo mivavaky mifanaraky amy zay tsika. Hoy ty 1 Jaona 5:14: “Ndre ino ndre ino angatahintsika, ka mifanaraky amy ty [sitrapo Ndranahary], le mijanjy antsika ie.”

Henteo koa ty Salamo 65:2; Jaona 14:6, 14; noho ty 1 Jaona 3:22.

Manao Akory ty Hahasambatsy Ahy?

INO TY MAHAVY FANONTANEA ZAY? Maro ty mino fa mahasambatsy ty drala, laza, noho ty hasoa tarehy. Farany, ataon-drozy ze hanana raha reo. Fe mbo tsy hita avao hasambara zao.

INO TY VOLANY TY BAIBOLY? Nambara Jesosy hoe ino ty mahasambatsy. Nivola ie hoe: “Sambatsy ze mahatiaro hoe mila a Ndranahary.”(Matio 5:3) Tsy tena ho sambatsy tsika, laha tsy miezaky hahazo ty raha farany ze ilàntsika, tsy ino zay fa ty fahaiza marina a Ndranahary noho ty raha teany hatao ho ahintsika. Amy Baiboly ao ty misy marina zay. Lafa mahay marina io tsika, le hahay hanavaky ze vatan-draha vatany noho ze tsy vatan-draha. Hisy dikany ty fiainantsika, laha manoriky ty marina volany amy Baiboly ao tsika, lafa hanapa-kevitsy na hanao raha hafa.—Lioka 11:28.

Henteo koa ty Ohabolana 3:5, 6, 13-18 noho ty 1 Timoty 6:9, 10.

 Pakilany avao amy ty valiny baka amy Baiboly, amy fanontanea eny reo ro nihenteantsika. Mbo ta hahazo fanazavà fanampiny va iha? Azo antoky fa haneky iha, laha “mahatiaro hoe mila a Ndranahary.” Vasa mbo teanao ho hay, ohatsy, hoe: ‘Laha midary antsika vatany Ndranahary, nanino ro engàny hisy avao ty raha raty noho ty fijalea zisiky henanizao? Manao akory ty hahasoasoa ty fiharoanay trano raiky?’ Manome valiny feno noho mahafa-po amy fanontanea reo noho ty maro hafa ty Baiboly.

Fe maro ty misalasala handiniky Baiboly. Bevata marè zao hoe raha io, sady sarotsy azo ty raha volaniny kindraiky. Ho teanao va laha misy olo manampy anao, mba hahita ty valy ty fanontaneanao amy Baiboly ao? Afaky manampy anao ty Vavolombelo Jehovah.

Azon-drozy amea boky Ino Marina ro Ampianary ty Baiboly? iha. Mety soa ho ahinolo tsy manam-potoa malalaky boky io, mba hanampy azy hahita ty valiny mazava amy fanontanea bevata sisany, baka amy Baiboly ao. Manasa olo hiaraky mianatsy Baiboly aminy tsy andoavan-drala koa ty Vavolombelo Jehovah. Azo atao an-tranonao any raha zay, na amy ze pilasy teanao. Vavolombelo za-draharaha mipetraky tsy lavitsy anao ro hiaraky mandiniky Baiboly aminao tselatsela, sankerinandro. Fa nahasoa olo an-tapitrisany amy tany toy iaby raha zay. Maro amin-drozy ro vaky resaky hoe: “Nahita ty fahamarina aho.”

Ty fahamarina amy Baiboly ao ro vatan-draha marè. Io ro manafaky antsika amy finoanoa fahatany noho tahotsy. Tsy ho angoay tsika, fa manan-draha tamàny noho manan-draha kendrè sady falifaly. Nivola Jesosy hoe: “Ho hainareo ty marina, le ty marina hanafaky anareo.”—Jaona 8:32.