Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-55

Niaro ani-Hezekia ty Anjelini-Jehovah

Niaro ani-Hezekia ty Anjelini-Jehovah

Sankeriba ty mpanjakani-Asyria. Niazon-drozy ty fanjakani-foko folo tan’Israely teo, fe mbo teani-mpanjaka io halà koa ty fanjakàni-Joda, azy misy foko roe iny. Fa niazony ty tanà sisany ta Joda any, fe Jerosalema ro tena teany. Tsy haini-Sankeriba fa miaro ani-Jerosalema Jehovah.

Hezekia ty mpanjakani-Joda tamy zay. Nameany drala maro biby Sankeriba soa tsy hanafiky ani-Jerosalema. Nalani-Sankeriba drala iny, fe mbo nirahiny hanafiky an-drozy avao maramilany rey. Navaka biby ty olo tamy tanà io tao lafa nihamarìny ty Asyrianina. Fe hoy Hezekia: ‘Ka matahotsy fa hataoni-Jehovah matanjaky mandilatsy an-drozy tsika.’

Nirahini-Sankeriba ho a Jerosalema any Rabsake, soa hikizakizaky ty olo any. Nitsanga tamonto ao amy zay Rabsake lafa niavy ta Jerosalema tany. Nikorakoraky ie hoe: ‘Tsy afaky manampy anareo Jehovah zao. Ka mety verevereni-Hezekia nareo fa tsy raha misy ndranahary afaky miaro anareo zao ty eo.’

Nanontany ani-Jehovah Hezekia hoe ino ty tokony hataony, le hoy Jehovah: ‘Ao nareo tsy hatahotsy ani-raha nivolanini-Rabsake iny fa tsy raha ho azoni-Sankeriba zao Jerosalema.’ Bakeo Hezekia nahazo taratasy baka amy Sankeriba nivola hoe: ‘Le mionona avao fa tsy raha afaky manavotsy anareo zao Jehovah.’ Nivavaky Hezekia hoe: ‘Zafady lahy Jehovah, mba avoto zahay soa ho haini-firenena iaby fa iha raiky avao ro Ndranahary marina.’ Le hoy Jehovah: ‘Tsy ho tafilitsy a Jerosalema etoa ty mpanjakani-Asyria satria harovako tanà toy.’

Fa nieritseritsy Sankeriba tamy zay hoe ho resiny Jerosalema. Fe nandefa anjely tamy Asyrianina reo tany Jehovah. Nivonoany iaby maramila 185 000 rey tamy haly iny! Nimaty iaby maramilani-Sankeriba rey, farany noly ie. Niaro  ani-Hezekia noho Jerosalema vatany Jehovah. Ho natoky ani-Jehovah koa va iha laha ta Jerosalema tany tamy fotoa io?

“Ty anjelini-Jehovah le mipetraky manodidy ze olo matahotsy Azy, le manavotsy azy.”—Salamo 34:7