Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-52

Maramilani-Jehovah Rey

Maramilani-Jehovah Rey

Tsy nieny Beni-hadada mpanjakani-Syria, fa nanafiky ani-Israely avao. Fe saky ho avy ie, le nivolanini-Elisa sandrany ty mpanjakani-Israely ka afaky nivony. Farany ie nikinia ani-Elisa. Hainy hoe a Dotana any Elisa, ka nirahiny ho any ty maramila syrianina hanambotsy azy.

Niavy haly ta Dotana any Syrianina rey. Lafa nifoha maraindray ty mpanomponi-Elisa, le niboaky tamonto any. Nihitany amy zay hoe nisy maramila maro biby manodidy ani-tanà iny. Navaka biby ie ka nikorakoraky hoe: ‘Elisa! Ino ty hataontsika?’ Le hoy Elisa: ‘Mbo maro biby mandilatsy ani-reo ty miaraky amintsika.’ Nampahitani-Jehovah ani-mpanomponi-Elisa iny amy zay hoe feno soavaly noho kalesy afo ty amy vohitsy manodidy ani-tanà iny.

Lafa hanambotsy ani-Elisa maramila rey, le nivavaky ie hoe: ‘Anovo jiky lahy rozy Jehovah!’ Avy le nataoni-Jehovah jiky rozy. Fe tsy hoe tsy nahita sasy rozy fa tsy nihain-drozy avao hoe taia rozy io. Nivolanini-Elisa rozy hoe: ‘Diso lala nareo. Oriho aho fa hatoroko  anareo olo ilànareo zao.’ Nanaraky ani-Elisa zisiky a Samaria any rozy, kanefa any ty misy ani-mpanjakani-Israely.

Fa niavy a Samaria ao maramila rey vo taitsy, fe fa tara. Nanontany ani-Elisa mpanjakani-Israely iny hoe: ‘Vonoako va rozy?’ Nanararaotsy ani-zay va Elisa ka namaly faty? Ho zao ty navaliny: ‘Aha, ka vonoa rozy fa ameo hany, bakeo engao holy.’ Farany nanao fety be ho ahin-drozy mpanjaka iny, bakeo rozy nampolìny.

“Zao ty toky ananantsika amy Ndranahary: Ndre ino ndre ino angatahintsika, ka mifanaraky amy ty sitrapony, le mijanjy antsika ie.”—1 Jaona 5:14