Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-49

Nivonoa Mpanjakavavy Raty Fanahy Iny

Nivonoa Mpanjakavavy Raty Fanahy Iny

A Jezirela any ty misy ani-Ahaba Mpanjaka. Jilo baka an-dafonetiny eo ty tanimboalobokini-lahilahy raiky kaihy hoe Nabota. Teani-Ahaba hovilỳ tanimboly io fe tsy nameani-Nabota, satria tsy azo avily hoasani-Jehovah ty lova. Nanao akory Ahaba tamy zay? Neloky biby ie. Tsy niboaboaky baka an-tranony ao ie, sady tsy nahefa nihinan-kany.

Raty fanahy biby Jezebela valini-Ahaba. Hoy ty asany tamy Ahaba: ‘Mpanjakani-Israely anè iha. Afaky mahazo ze raha teanao iha. Ao fa hameako anao tany zao.’ Bakeo nanoratsy taratasy amy anti-panahini-tanà io any Jezebela. Nivolaniny rozy hoe: ‘Asaraonareo hoe nanompa a Ndranahary Nabota, le toraho vato ie soa ho maty.’ Le nataoni-anti-panahy rey raha nampanovini-Jezebela zay. Hoy amy zay Jezebela tamy Ahaba: ‘Fa maty Nabota ie. Alao ho ahinao amy zay tanimboly io.’

Tsy Nabota raiky avao ty olo nivonoani-Jezebela. Maro ty olo tea ani-Jehovah nivonoany. Nanompo sampy ie sady maro ty raha raty nataony. Ino ty nataoni-Jehovah lafa nahita ani-raha rezay?

Lafa nimaty Ahaba, le Jorama anakilahiny ro nanjary mpanjaka. Nirahini-Jehovah amy zay ty lahilahy raiky kaihy hoe Jeho, mba hanasazy ani-Jezebela noho ty fianakaviany.

Nandeha nana amy tanà misy ani-Jezebela io any Jeho. Nitsena azy Jorama, sady nanontany hoe: ‘Mpinama va tsika?’ Le hoy Jeho: ‘Akory ty haha mpinama antsika kanefa Jezebela reninao manao raha raty avao?’ Nilay niaraky amy kalesiny iny Jorama fe nitifirini-Jeho kititsy, le nimaty.

 Nandeha amy tranoni-Jezebela any Jeho bakeon’iny. Lafa nireni-Jezebela hoe ho avy Jeho, le nanisy manja ie sady namboatsy volo. Bakeo ie nandiny azy tan-dafonetini-tranony anabo any iny. Niavy amy zay Jeho. Nasiaky Jezebela lafa niarahaba azy. Nivola tamy mpanompo tanilani-Jezebela teo rey Jeho hoe: ‘Atoseho baka anabo eny ie!’ Natosin-drozy amy zay Jezebela, le nitonta ambany any, farany nimaty.

Nivonoani-Jeho koa ty anakilahini-Ahaba 70 tafarani-zay, le nataony ze hahavy ty olo iaby tsy hivavaky amy Bala sasy. Haini-Jehovah vatany ty raha iaby, fe mandiny fotoa mety ie vo manasazy ani-ze manao raty!

“Laha fitiavan-kanana tse ro nahazoa lova, le tsy handay fitahia raha zay lafa afara any.”—Ohabolana 20:21