Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-41

Davida Noho Saoly

Davida Noho Saoly

Nitendreni-Saoly Mpanjaka ho mpitariky ty maramilany Davida, tafarani-namonoany ani-Goliata iny. Nanjary tean’olo Davida satria naharesy maramila maro. Lafa noly baka an’aly any amy zay Davida, le nisy ampela maromaro nitsena azy. Sady nitsinjaky ampela rey ro nihira ho zao: ‘Saoly nahafaty an’arivony, fa Davida nahafaty an’aliny!’ Nialona ani-Davida Saoly, ka nanjary ta hamono azy.

Nahay nititiky harpa Davida. Ndraiky andro, lafa nititiky harpa ho ani-Saoly ie, le nitorahiny lefo. Niolitsy Davida le rindry iny ro nivoa. Mbo niezaky namono ani-Davida imaro Saoly tafarani-zay. Farany nilay Davida, le nivony tan-diomonto any.

Nanday maramila 3 000 Saoly le nila ani-Davida. Nitafilitsy tamy lakato raiky zay rozy. Kay hondy Davida noho maramilany rey nivony tao. Nibisibisiky ho  zao azy niaraky tamy Davida rey: ‘Matinao amy zay ie henanio.’ Nitingatinga nana amy Saoly eny Davida, bakeo nanampahany ty akanjoni-Saoly. Tsy misy raha reni-Saoly zao! Naneny avao Davida bakeo, satria tsy nanaja ty voahosotsini-Jehovah. Tsy nengany hamono ani-Saoly lahilahy niaraky taminy rey. Hoy ty asany tamy Saoly: ‘Fa nimaty iha zay laha nivonoako.’ Nampiova ani-Saoly va raha zay?

Mbo nila ani-Davida avao ie. Ndraiky haly zay Davida nitingatinga nana amin-dry Saoly ao. Niaraky taminy koa Abisay anak’anabaviny. Niroro iaby ty tao. Ndre Abnera, azy mpiamby ani-Saoly iny aza niroro. Hoy ty asani-Abisay: ‘Matiko io laha engànao hovonoako.’ Le hoy Davida: ‘Engao fa Jehovah ro hanao ani-zay. Ndao halàntsika avao ty lefony noho ty fasiany rano, le ndao handeha.’

Niakatsy tamy vohitsy raiky narìny teo zay Davida, le nikorakoraky ho zao: ‘Abnera! Nanino iha tsy niaro ani-Saoly Mpanjaka? Aia zao ty fasiany rano noho ty lefony?’ Haini-Saoly hoe Davida zay, ka hoy ty asany: ‘Afaky namono ahy iha, fe tsy nivonoanao aho. Haiko fa iha ty ho mpanjakani-Israely.’ Nandeha noly Saoly. Soa avao fa tsy ty fianakaviani-Saoly iaby ro nalay ani-Davida.

“Laha azo atao, ka mbo mianky aminareo avao, le milongoa amin’olo iaby. Ka mamaly faty lahy longoko, fa ameo pilasy ty heloki-Ndranahary.”—Romanina 12:18, 19