Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-33

Rota Noho Naomy

Rota Noho Naomy

Nisy fotoa nisy mosary tan’Israely tany, ka nifindra ta Moaba any ty ampela raiky kaihy hoe Naomy, miaraky amy valiny noho anakilahiny roe rey. Tafara atoy, le nimaty valini-Naomy iny. Nanambaly ani-Rota noho Orpa anakilahiny rey. Moabita ampela reo. Mampalahelo fa nimaty koa anakilahini-Naomy rey tafara atoy.

Lafa nireni-Naomy hoe tsy nisy mosary sasy tan’Israely tany, le nanapa-kevitsy holy ie. Niaraky taminy Rota noho Orpa, fe lafa tan-dala teny le nivolanini-Naomy rozy hoe: ‘Nahita valy soa lahy anakilahiko rey nahita anareo. Soa laha manambaly ndraiky nareo. Aleo nareo mimpoly a Moaba any.’ Le hoy rozy roe vavy: ‘Aha! Tsy mahafoy anao zahay!’ Tsy nimety avao Naomy, farany Orpa nandeha noly, fa Rota mbo nijano teo. Le hoy Naomy: ‘Henteo Orpa! Nandeha noly aminareo any noho amy ndranaharinareo rey any ie. Ndany koa iha!’ Fe hoy Rota: ‘Zaho hoasako hiaraky aminao. Hipetraky aminareo any aho, le ty Ndranaharinareo ro hivavahako.’ Mety nifalifaly biby zao Naomy naharè ani-zay ein?

Niavy tan’Israely ao Rota noho Naomy lafa nanomboky nanampaky vary orza ty olo. Nandeha nitimpo vary orza tavela tamy tanimbarini-Boaza teo Rota, ndraiky andro zay. Boaza io anakilahini-Rahaba. Nireni-Boaza hoe Moabita Rota, fe tsy nahafoy ani-Naomy. Farany nivolaniny ty mpiasany mba hanenga kelikely amy varin-drozy rey, soa hotimponini-Rota.

 Nanontaneani-Naomy Rota lafa hariva ty andro hoe: ‘Niasa taia iha nandroany?’ Namaly Rota hoe: ‘Tamy tanimbarini-lahilahy mana anara Boaza zay.’ Le hoy Naomy: ‘Ein, longoni-valiko Boaza iny. Aleo iha miaraky amy somonjara reo avao. Miasà amy tanimbariny eny avao nareo, soa tsy hisy hankadala.’

Niasa tamy tanimbarini-Boaza teo avao Rota, zisiky nitamperani-fanampaha vary. Hitani-Boaza hoe nazoto niasa Rota sady tena soa fanahy. Tamy fotoa zay, laha misy ampela maty valy, fe tsy manan’anakilahy, le ty longoni-valiny iny ro hanambaly azy. Farany nanambaly ani-Rota Boaza, le niteraky ani-Obeda rozy. Dadabeni-Davida mpanjaka Obeda io. Nifalifaly iaby nama-Naomy rey ka nivola hoe: ‘Nameani-Jehovah anao tse Rota soa hikarakara anao, bakeo nahazo zafy koa iha henanizao. Ho! Mahay raha lahy Jehovah.’

“Misy nama mivahatsy mandilatsy ty rahalahy.” —Ohabolana 18:24