Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-34

Resini-Gideona Midianita Rey

Resini-Gideona Midianita Rey

Niala tamy Jehovah ndraiky ty Israelita lafa tafara atoy. Nivavaky tamy ndranahary diso rozy. Tanatini-fito tao, le nangalatsy ty bibin-drozy noho nanimba ty raha nambolen-drozy Midianita reo. Nivony tanaty lakato amy zay rozy soa tsy ho azo. Nangataky tamy Jehovah rozy mba hanavotsy an-drozy. Naniraky anjely amy zay Jehovah hiresaky amy lahilahy raiky kaihy hoe Gideona. Nivola anjely iny hoe: ‘Iha ro nifilini- Jehovah hanavotsy ani-Israely.’ Namaly Gideona hoe: ‘Olo manahaky ahy toy va le hahavita hanavotsy ani-Israely?’

Akory ty nahaizani-Gideona hoe nifily azy vatany Jehovah? Nangalaky volon’aondry ie le nataony amy tany eo, bakeo nivola amy Jehovah ie hoe: ‘Laha len’ando volon’aondry io hamaray maraindray, fa tany io maiky, le ho haiko hoe zaho ro teanao hanavotsy ani-Israely.’ Nilen’ando vatany volon’aondry iny hamaray maraindrain’iny, fa tany iny nimaiky. Fe mbo nangataky tamy Jehovah ndraiky Gideona hoe: ‘Mba anovo len’ando koa tany io hamaray maraindray, fa volon’aondry io anovo maiky.’ Lafa niseho raha zay, le nihaini-Gideona hoe nifily azy vatany Jehovah. Navoriny amy zay ty maramilany, soa hialy amy Midianita reo.

 Hoy Jehovah tamy Gideona: ‘Hataoko ze hampandresy ty Israelita. Fe maro marè maramilanao reo ka angalao. Tsy no hieritseritsy avao nareo hoe nandresy satria mahery. Ampandehano moly ze matahotsy.’ Noly iaby ty 22 000 amy maramila rey, ka 10 000 avao sisa tavela. Le hoy Jehovah: ‘Mbo maro avao maramilanao reo. Andeso an-drano eny rozy, le ampinomo rano. Henteo soa rozy, ka ze minon-drano sady mitolitoliky manenty ty fahavalo ro andeso miaraky aminao.’ Lahilahy 300 avao ro niamby soa lafa ninon-drano. Nampitamà an-drozy Jehovah fa ho resin-drozy maramila midianita 135 000 rey.

Lafa nihariva ty andro, le nivola tamy Gideona Jehovah hoe: ‘Ndao tafiho amy zay Midianita reo!’ Nameani-Gideona antsiva maramilany rey. Nameany gorogoro fasia rano bevata koa rozy, le nisy jiro navoniny tanatini-raha rey tao. Nivolaniny rozy hoe: ‘Henteo aho, le manaova manahaky ahy.’ Nitsofini-Gideona tse antsiva taminy teny iny, bakeo nivakiny gorogoro iny, le nahelankelany anabo amy zay jiro iny, sady nikoràky marè ie hoe: ‘Sabatsini-Jehovah noho Gideona!’ Nanao manahaky ani-zay koa 300 lahy niaraky taminy rey. Natahotsy biby Midianita rey, ka samby nanantatsy ty lay amy ze teany hilaisa. Nikoronta marè rozy, farany nifamono. Nampeani-Jehovah handresy ty fahavalon-drozy ndraiky Israelita reo.

“Soa ho baka amy Ndranahary ty hery fanampiny, fa tsy baka aminay.” —2 Korintianina 4:7