Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-25

Pilasy Nivavaha amy Jehovah

Pilasy Nivavaha amy Jehovah

Tamy Vohitsy Sinay teny Mosesy tamy zay. Nivola tamy Mosesy Jehovah mba hanamboatsy pilasy hivavahani-Israelita reo Aminy. Tranolay masy ty fikaiha raha io. Natao hay andesy raha io, satria mbo nifindrafindra rozy.

Hoy Jehovah: ‘Volano vahoaky reo mba hanome ze foin-drozy hanamboara ani-tranolay masy io.’ Nanome volamena, volafoty, ravaky noho safira maro sankarazany Israelita reo. Ty ilany nanome volon’aondry, lamba rongony, angozy, noho raha maro hafa. Natariky biby rozy, ka nivola Mosesy hoe: ‘Fa soa zay! Ampy reo fa ka manome sasy.’

Nisy lahilahy noho ampela maro biby namboatsy ani-tranolay masy io. Tena nahay rozy satria nampeani-Jehovah, ka ty ilany nanao kofehy, namboatsy lamba, na nanao peta-kofehy. Tao koa ty namboatsy raha tamy vato, volamena, na hazo.

Tena manahaky azy nivolanini-Jehovah iny mihintsy ty namboaran-drozy ani-tranolay masy iny. Nisy efitsy Masy noho Masy Marè, le nasia ridò soasoa nampisaraky ani-efitsy roe reo. Tamy Masy tao nisy fasia jiro volamena, latabatsy, noho alitara fanoroa emboky manitsy. Le tamy Masy Marè tao ro nametraha ty vata misy ty fifanekea. Namboary tamy hazo akasia noho volamena raha io. Tanaty lakoro ao amy zay nisy kovetabe saba noho alitara bevata. Vata misy ty fifanekea iny ro nahatiarovani-Israelita reo hoe fa nampitamà ani-Jehovah rozy hoe hanoriky ty safàny avao. Hainao va fifanekea zao? Fifanekea zao mbo fampitamana avao.

 Arona noho anakilahiny rey ro nifilini-Jehovah hanao ty asani-mpisoro amy tranolay masy ao. Rozy ro nikarakara ani-raha io noho nanao fanatitsy ho ani-Jehovah. Arona ty mpisorobe, le ie raiky avao ro nahazo nilitsy tamy Masy Marè ao, fe indraiky santao avao. Nanao soro ie lafa nilitsy ao, soa hengà ty hadisoa nataony noho ty ani-fianakaviany voho ty ani-firenenan’Israely iaby.

Nahavita ani-tranolay masy iny Israelita reo, tao raiky tafarani-nialan-drozy ani-Ejipta. Nana pilasy hivavaha amy Jehovah amy zay rozy!

Nifalifaly Jehovah fa nivita tranolay masy iny ka nasiany rahona tanabony teo. Tsy nandeha mihintsy Israelita reo, laha mbo tanaboni-tranolay masy iny teo rahona iny. Fa lafa niala teo rahona iny, le hain-drozy hoe tokony handeha amy zay rozy. Niravan-drozy tranolay masy iny, le nandesin-drozy niaraky amin-drozy.

“Tamy zay aho le naharè feo marè baka amy sezi-mpanjakà teo nivola hoe: ‘Amin’olombelo eo ty tranolai-Ndranahary, le ie hiaraky mipetraky amin-drozy, le rozy ho olony, ka Ndranahary mihintsy ro ho amin-drozy eo.’”—Apokalypsy 21:3