Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-19

Ty Loza Telo Voalohany

Ty Loza Telo Voalohany

Andevo ty Israelita ka niforoseva hiasa mafy. Naniraky ani-Mosesy noho Arona ho amy Farao any Jehovah hivola hoe: ‘Engao handeha hanompo ahy an-diomonto any ty oloko.’ Le hoy ty zestani-Farao: ‘Ahoako ino raha volanini-Jehovah zao! Tsy hengako handeha zao Israelita reo.’ Vomaiky niforosevany hiasa mafy rozy. Nanarini-Jehovah amy zay Farao. Hainao hoe ino ty nataony? Nisy Loza Folo nalefany ta Ejipta tao. Nivola tamy Mosesy Jehovah hoe: ‘Tsy mijanjy ahy Farao. Vonjeo ie fa ho amy Vavaranoni-Neily eo hamaray maraindray, le volano hoe hanjary lio iaby Vavaranoni-Neily toy satria tsy nenganao handeha oloko reo.’ Nandeha tamy Farao eny vatany Mosesy. Nihitani-Farao soa Arona namango Vavaranoni-Neily iny, le niova ho lio vavarano iny. Nimantsy rano iny, sady nimatimaty iaby ty fia. Tsy nihay nangalà rano hinomy Vavaranoni-Neily iny. Fe mbo tsy nengani-Farao handeha avao Israelita rey.

Fito andro tafarani-zay, nirahini-Jehovah ho amy Farao any ndraiky Mosesy mba hivola hoe: ‘Laha tsy alefanao oloko reo, le ho atsiky  tsaboketra Ejipta.’ Mbo tsy nengani-Farao handeha avao Israelita rey, farany natsangani-Arona anabo fitonony iny, le niatsiky tsaboketra ty tany. Nisy tsaboketra tan-tranon-drozy ao, tamy ty fandrean-drozy, ndre tamy fingan-drozy any iaby aza. Nifeno tsaboketra tanà iny! Nangataky tamy Mosesy Farao mba hangataky tamy Jehovah soa hampijano ani-loza iny. Nampitamà ie hoe hengany handeha amy zay Israelita rey. Najanoni-Jehovah amy zay loza iny, le nahoroni-ejipsianina reo fatini-tsaboketra rey. Nimantsy tanà iny. Fe mbo tsy nengani-Farao handeha avao ndraiky olo rey.

Nivola tamy Mosesy amy zay Jehovah hoe: ‘Volano Arona hoe paiho amy fitononao tany io, le hanjary moky bon-tany reo.’ Avy le nifeno moky tanà iny. Nisy Ejipsianina nivola tamy Farao hoe: ‘Loza baka amy Ndranahary toy.’ Fe mbo tsy nengani-Farao handeha avao ty Israelita.

“Hataoko amy toy ze hahaizan-drozy ty tanako noho ty heriko, eka, hataoko hain-drozy zay, le ho hain-drozy fa Jehovah ty anarako.”—Jeremia 16:21