Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-16

Ia Joba Zao?

Ia Joba Zao?

Nisy lahilahy raiky zay ta Oza any. Nanompo ani-Jehovah ie. Joba ty anarany. Mpanarivo biby ie sady nanan’anaky maro. Soa fanahy ie, le nampeany ty olo mahantra, ty ampela maty valy, noho ty ajà kamboty. Nanao raha soa avao ie. Fe tsy nana raha nanahira va zany ie?

Tsy nihaini-Joba hoe mandiniky azy avao Satana Devoly. Hoy Jehovah tamy Satana: ‘Hitanao va Joba mpanompoko? Tsy misy manahaky azy ty an-tany eny. Mijanjy ahy ie sady manao raha soa avao.’ Namaly Satana hoe: ‘Manoriky ty safànao vatany aza Joba. Arovanao noho tahinao moa lahy ie ka manjary maro ty biby harèny. Mba alao iaby moa reo vasa mbo hanompo anao ie.’ Le hoy Jehovah: ‘Alefaso moa. Fe ka vonoa ie.’ Nanino ro nengani-Jehovah hanao ani-zay Satana? Satria natoky ie hoe tsy hivaliky Joba.

Nisy loza nifanesisesy amy zay nataoni-Satana mba hitsapà ani-Joba. Nataony tse ze hahavy ty Sabeanina hangalatsy ty aombini-Joba noho ty ampondrany. Bakeo, nisy afo nandrava ani-aondriny rey. Nisy Kaldeanina maromaro koa nangalatsy ty ramevany. Nimatimaty iaby ty mpanompo niaraky ani-bibiny reo. Nisy loza bevata koa. Nanao fety ty anakini-Joba fe nivorotrahani-trano iny, le nimaty tao iaby. Nalahelo biby Joba, fe mbo nanohy nanompo ani-Jehovah avao.

Vomaiky teani-Satana hijaly marè Joba. Nifenoany bay ty vatani-Joba, ka tena nijaly vatany ie. Tsy nihaini-Joba hoe nanino ie ro niazoni-raha reo. Fe ndre zay, le mbo nanompo ani-Jehovah  avao ie. Nifalifaly vatany Ndranahary lafa nahita raha iaby nataoni-Joba rey.

Nisy fitsapà hafa ndraiky. Nisy lahilahy telo nalefani-Satana tamy Joba any, le nivola hoe: ‘Tsy maintsy nisy fahotà nataonao tany, fe navoninao. Sazì-Ndranahary amy zay iha henanio.’ Hoy Joba: ‘Tsy nanao raha raty zao aho.’ Fe nanjary nieritseritsy ie hoe Jehovah ro nahavy ani-raha raty nahazo azy rey. Nivola aza ie hoe tsy rariny ty raha natao-Ndranahary azy.

Nisy mpamaraky raiky kaihy hoe Eliho zay nijanjy soa ani-ze resaky teo. Bakeo nivola ie hoe: ‘Tsy marina iaby raha volaninareo zao. Tsy araky ty ieritseretantsika azy ty hasoani-Jehovah. Sanatria azy ty hanao raha raty. Hitany iaby kila raha miseho, le ampeany ty olo lafa tojiky raha manahira.’

Bakeo Jehovah niresaky tamy Joba hoe: ‘Taia moa iha tamy zaho namboatsy ty lanitsy noho ty tany? Manino iha ro mivola hoe tsy rariny ty ataoko? Mivola avao iha, fa tsy hainao iaby ty raha miseho.’ Nieky Joba hoe diso. Hoy ty asany: ‘Diso aho. Fa rereko avao ty mikasiky anao, fa henanizao aho vo tena mahay anao. Tsy misy raha tsy vitanao vatany. Azafady lahy amy raha nivolaniko rey.’

Nitampitsy avao fitsapà rey. Nataoni-Jehovah salama soa ndraiky Joba sady nataony maro biby mandilatsy ty taloha ty hananany. Niela velo Joba sady nisambatsy. Nitahini-Jehovah ie satria nijanjy azy avao ndre nisarotsy taminy raha zay. Hanahaky ani-Joba va iha? Hanompo ani-Jehovah avao va iha ndre ino ndre ino raha miseho?

“Fa nirenareo ty niaretani-Joba, le fa hainareo koa ty fitahia nameani-Jehovah azy.”—Jakoba 5:11