Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-3

Tsy Nanoriky Safà-Ndranahary Adama Noho Eva

Tsy Nanoriky Safà-Ndranahary Adama Noho Eva

Ndraiky andro, tsy teo Adama. Nisy bibilava amy zay niresaky tamy Eva hoe: ‘Tsy engà-Ndranahary hihina amy voankazo iaby amy zariday atoa zao hoe nareo?’ Namaly Eva hoe: ‘Azonay hany iaby ty voankazo atoa laha tsy raiky toy avao. Laha zahay mihina amin’io, le ho maty.’ Le hoy ty vandini-bibilava iny: ‘Tsy raha ho maty zao nareo. Hanahaky a Ndranahary aza nareo laha mihina an’io ka!’ Nataoni-Eva ho marina raha zay. Nitombo nitombo avao ty faniriany ani-voankazo io saky hitany. Farany ie nihina, le nameany koa Adama. Adama amin’io mahay hoe ho maty rozy laha tsy manoriky ty safà-Ndranahary, fe nihaniny avao voankazo iny.

Lafa ho tsofotsy andro iny, le nanontaniani-Jehovah rozy hoe nanino rozy ro tsy nanoriky ty safàny. Eva ty nasarani-Adama azy, le bakeo koa Eva nanasara ani-bibilava iny. Niroasini-Jehovah tsy ho amy zariday iny ao sasy Adama noho Eva, satria tsy nanoriky ty safàny. Nasiani-Jehovah anjely noho meso lava mirehitsy amy lala militsy amy zariday iny any, soa tsy ho afaky himpoly any rozy.

Nivola Jehovah hoe hosazỳ koa azy namoro vandy tamy Eva iny. Tsy bibilava iny ro tena niresaky tamy Eva, satria tsy namoro bibilava mahay mivola Jehovah. Nisy anjely raty ta hamitaky ani-Eva tao. Satana Devoly ty ikaiha azy. Haripakini-Jehovah koa ie, satria ie nampiresaky ani-bibilava iny io. Tsy ho afaky hitao olo hanao raha raty sasy ie amy zay.

“Mpamono olo baka am-boalohany any [ty Devoly], sady tsy nivahatsy tamy ty marina, satria tsy aminy ao ty marina.”—Jaona 8:44