Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-100

Paoly Noho Timoty

Paoly Noho Timoty

Nisy mpamaraky mana anara Timoty zay tamy fiangona ta Lystra tao. Grika ty babany, le ty reniny Jiosy. Eonika ty anarani-reniny io, le Loisa ty bebeny. Mbo nikely ie le fa nampianarin-drozy mikasiky ani-Jehovah.

Nitsidiky ani-Lystra ndraiky Paoly tafara atoy. Nihitany hoe tena tea ty olo amy fiangonan-drozy eo Timoty sady tena ta hanampy an-drozy. Farany ie nandesini-Paoly niaraky aminy. Lafa nandeha ty fotoa, le nampiofanini-Paoly ie soa hahay hitory noho hampianatsy ty vaovao soa.

Nitariky ani-Paoly noho Timoty avao ty fanahy masy. Nahita fahità Paoly ndraiky haly zay. Nahita lahilahy nivola ho zao ie: ‘Miavia a Makedonia atoy mba hanampy anay.’ Farany nandeha tany ry Paoly, Timoty, Silasy noho Lioka mba hitory noho hanory fiangona.

Misy tanà mana anara Tesalonika zay ty a Makedonia any. Maro biby ty olo nanjary Kristiana tao, ka nialona ani-Paoly noho namany rey ty Jiosy. Namory vahoaky rozy, le nandesin-drozy tamy manam-pahefà tany ry Paoly. Hoy rozy: ‘Manohitsy ty fanjakà romanina lahilahy retoa!’ Tamy haly iny avao, le nilay nana a Beria any ry Paoly noho Timoty tsy no ho maty avao.

Tena tean’olo ta Beria ao rey ty vaovao soa, ka nanjary mpino iaby ndre ty Grika ndre ty Jiosy. Fe nisy Jiosy baka a Tesalonika any rezay koa nanakoronta tao, ka niala tao Paoly. Nana a Atena any ie. Fe nijano ta Beria tao avao Timoty noho Silasy mba hampahery ani-rahalahy rey. Lafa nandeha ty fotoa, le nirahini-Paoly ta Tesalonika any Timoty mba hanampy ani-rahalahy rey satria nisy fanenjeha mafy ty tany. Nirahini-Paoly hitsidiky noho hampahery fiangona maro hafa koa Timoty tafara atoy.

 Hoy Paoly tamy Timoty: ‘Tsy maintsy henjehy ze olo ta hanompo ani-Jehovah.’ Nenjehy vatany Timoty sady nigadrà satria nanam-pinoa. Fe nifalifaly ie, satria afaky nampiseho hoe tsy nivaliky tamy Jehovah.

Nanoratsy tamy rahalahy ta Filipy any rey Paoly hoe: ‘Hirahiko aminareo any Timoty. Hampianariny anareo hoe manao akory mandeha amy fahamarina zao. Hampiofana anareo amy fanompoa ie.’ Tena natoky ani-Timoty Paoly. Mpinama biby rozy sady niaraky niasa tanatini-tao maro.

“Zaho tsy mahita olo hafa mitovy toetsy aminy, afaky hikarakara soa anareo. Satria ty hafa samby mila ze hahasoa ty vatany iaby, fa tsy ty ho ani-Jesosy Kristy.”—Filipianina 2:20, 21