Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-98

Nitory Tamy Firenena Maro ty Kristiana

Nitory Tamy Firenena Maro ty Kristiana

Nanoriky ty didy nameani-Jesosy apostoly rey, ka maro ty tany nitorian-drozy. Tamy tao 47, le nirahini-rahalahy ta Antiokia ao hitory amy faritsy maro Paoly noho Barnabasy. Nazoto nitory ta Azia Minora tany rozy roe lahy, ka niavy zisiky a Derbe, Lystra, noho Ikonioma any.

Nitory tamin’olo iaby Paoly noho Barnabasy, ndre mpanarivo zay ndre mahantra, ndre tanora ndre antitsy. Maro ty olo naneky ty fahamarina mikasiky ani-Kristy. Niezaky nisaka ani-Paoly noho Barnabasy ambiasa raiky zay, lafa rozy nitory tamy Sergio Paolo, governora ta Sipra tao. Nivola taminy amy zay Paoly hoe: ‘Hasiani-Jehovah iha.’ Tonga de tsy nahita ambiasa iny. Lafa nahita ani-zay Sergio Paolo, le nanjary mpino.

Nitoriani-Paoly noho Barnabasy iaby lafa atao pilasy nisy olo. Nitory santrano rozy, tam-bazary, mban-dala eny noho tamy synagoga rey any. Nitaha lahilahy raiky kombo zay rozy ta Lystra tany. Ho nivavaky tamin-drozy ze nahita ani-raha iny, satria nieritseritsy hoe ndranahary rozy. Fe tsy nety Paoly noho Barnabasy, ka nivola hoe: ‘Ndranahary avao ro ivavaho! Olo manahaky anareo avao anè zahay.’ Bakeo nisy Jiosy sisany niavy, le nataon-drozy ze hahavy ty olo hanohitsy ani-Paoly. Nitoratorahin-drozy vato ie, le nitaritaritin-drozy tambalikini-tanà iny any, bakeo nengan-drozy any soa ho maty. Fe mbo nivelo Paoly! Tonga de niavy olo finoa raiky aminy rey nanavotsy azy, bakeo nandesin-drozy nilitsy an-tanà ao ie. Nimpoly ta Antiokia any Paoly, tafarani-zay.

Nandeha nitory tamy faritsy hafa ndraiky Paoly tamy tao 49. Lafa baka nitsidiky ty fiangona ta Azia Minora any ie, le nitory tamy faritsy  Eoropa any. Nandeha ta Atena, Efesosy, Filipy, Tesalonika, noho tan-tanà hafa any koa ie. Niaraky taminy koa Silasy, Lioka, noho mpamaraky raiky mana anara Timoty zay. Niaraky nanory noho nampahery fiangona rozy. Nijano ta Korinto any tao raiky noho tampany Paoly mba hampahery ty fiangona any. Nitory ie, nampianatsy, le nanoratsy taratasy ho ani-fiangona maro. Mpamboatsy tranolay ty asany tamy zay. Nimpoly ta Antiokia any ndraiky Paoly, tafara atoy.

Nandeha nitory tamy faritsy hafa ndraiky Paoly, tamy tao 52. Azia Minora tse ty faritsy nandehanany voalohany. Nandeha zisiky avaratsini-Filipy any ie, bakeo nana a Korinto any. Nijano elaela ta Efesosy any Paoly, le nampianatsy noho nitaha olo sady nanampy fiangona tany. Nanao lahateny tamy tranobe tan-dakilasy any koa ie sanandro. Maro ty olo niova lafa nijanjy azy. Nandeha a Jerosalema any amy zay Paoly, lafa baka nitory ty vaovao soa tamy tany maro.

“Ka le mandehana, anovo mpianatsy ty olo amy firenena iaby any.”—Matio 28:19