Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-97

Nahazo Fanahy Masy Kornelio

Nahazo Fanahy Masy Kornelio

Nisy sefoni-maramila romanina zay ta Kaisaria tao. Kornelio ty anarany. Tsy Jiosy ie, fe nanaja azy soa ty Jiosy. Tea manampy ty olo sahira noho mahantra ie. Nino ani-Jehovah ie ka nivavaky aminy tsy tampaky. Ndraiky andro, le nisy anjely niseho taminy ka nivola hoe: ‘Fa nijanjy ty vavaky nataonao Ndranahary. Maniraha olo ho a Jopa any fa any Petera. Ampandehano aminao atoy ie.’ Mety ho 48 kilometatsy eo ho eo antimoni-Kaisaria any ty misy ani-Jopa. Fe tonga de naniraky lahilahy telo ho any Kornelio.

Tamy fotoa zay koa Petera nahita fahità. Nahita biby tsy azoni-Jiosy reo hany ie, fe nisy feo nivola taminy hoe: ‘Hano reo!’ Tsy nimety Petera, ka nivola hoe: ‘Mbo tsy nihina biby maloto mihintsy aho liany niainako.’ Le hoy feo iny: ‘Ka ataonao maloto zao biby reo fa fa nidiovi-Ndranahary.’ Mbo nivola koa feo iny hoe: ‘Misy lahilahy telo ty am-baravaranao ao. Mandehana miaraky amin-drozy.’ Namonjy an’olo rey amy zay Petera, le nanontaneany rozy hoe: ‘Ino va ataonareo atoy io?’ Nivola rozy hoe: ‘Nirahini-Kornelio sefoni-maramila romanina iny zahay. Ilàny ho aminy a Kaisaria any zao hoe iha.’ Nivolanini-Petera tse rozy mba hiroro aminy ao. Lafa hamarain’iny amy zay Petera nandeha  niaraky amin-drozy a Kaisaria any. Niaraky amin-drozy koa ty rahalahy sisany a Jopa eo.

Laha vo nahita ani-Petera Kornelio, le nandohaliky taminy teo. Fe nivolanini-Petera ie hoe: ‘Mitsangana, fa olo manahaky anao avao koa anè aho. Nampandehani-Ndranahary an-tranonao atoy aho, ndre tsy mahazo militsy an-tranon’olo tsy Jiosy aza zahay Jiosy io. Ka mba volano amiko amy zay lahy hoe ino ty antony ilànao ahy.’

Hoy Kornelio: ‘Nivavaky tamy Ndranahary aho, fa efatsy andro lasa zay, le nisy anjely naniraky ahy hampiavy anao atoy. Mba ampianaro ty safàni-Jehovah lahy zahay.’ Le hoy Petera: ‘Hitako vatany henanizao fa tsy mitingy volon’olo Ndranahary. Rambesiny soa iaby ze olo ta hanompo azy.’ Nampianarini-Petera raha maro mikasiky ani-Jesosy amy zay rozy. Bakeo nahazo fanahy masy Kornelio noho olo niaraky taminy teo rey, le natao batisa rozy iaby.

“Amy firenena iaby, ze olo matahotsy [a Ndranahary] ka manao ty marina ro mahazo hatò aminy.”—Asan’ny Apostoly 10:35