Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-99

Lasa Kristiana Mpiamby Iny

Lasa Kristiana Mpiamby Iny

Nisy ajà ampela nisy demonia zay ta Filipy tany. Nahay nivola ty hoavy ie, ka nahazo drala maro biby ty tompony. Lafa niavy ta Filipy ao amy zay Paoly noho Silasy, le nanaraky an-drozy avao ajà ampela iny sady nivola hoe: “Mpanompo-Ndranahary Farany Anabo iny lahilahy reo.” Farany nivola tamy demonia iny Paoly hoe: ‘Amy anarani-Jesosy, miboaha!’ Le niala tamin’ajà iny demonia iny.

Neloky biby ty tomponi-ajà ampela iny, satria tsy hahazoan-drozy drala sasy ajà io. Nandesin-drozy tamy manam-pahefà any Paoly noho Silasy, le hoy rozy: ‘Tsy manoriky lalàna lahilahy retoa sady manakoronta an-tanà etoa!’ Nivangoa amy zay Paoly noho Silasy, bakeo nampiliry am-prizon. Nataoni-mpiamby iny tamy farany anatiny any rozy. Naìky biby ty tao, fe mbo nahily anaty hazo ty tomboky noho ty tanan-drozy, soa tsy ho afaky hihetsiky.

Nihira fiderà ani-Jehovah ry Paoly noho Silasy, le nijanjy soa gadra ilany rey. Lafa niavy ty sasakaly, le nisy horohoron-tany tampoky ty tao. Nihozonkozo marè biby prizon iny, ka nivoha iaby varavarany rey sady nivaha iaby ty seny noho ze raha nameheza ani-gadra rey. Nilay nana any malaky mpiamby iny. Henteany varavara rey nivoha iaby, ka nieritseritsy ie hoe nilay gadra rey. Nalany amy zay mesony iny, le fa ho namono fo ie.

Nivola malaky Paoly hoe: ‘Ka mamono fo lahy iha fa atoa iaby zahay!’ Namonjy ani-Paoly noho Silasy malaky ie, le nandohaliky teo. Hoy ty asany: ‘Ino lahy ty hataoko mba hahavotsy ahy e?’ Le hoy rozy: ‘Mila mino ani-Jesosy iha, le manahaky ani-zay koa ty fianakavianao.’ Bakeo nampianarini-Paoly noho Silasy ty safàni-Jehovah rozy. Natao batisa amy zay mpiamby iny noho ty fianakaviany iaby.

“Hanambotsy noho hanenjiky anareo ty olo, ka hanolotsy anareo amy synagoga noho am-prizon any, sady handay anareo amy mpanjaka noho governora reo eo, satria manday ty anarako nareo. Ho afaky hitory aminy nareo amy zay.”—Lioka 21:12, 13