Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-103

“Ho Avy Lahy ty Fanjakànao”

“Ho Avy Lahy ty Fanjakànao”

Nampitamà Jehovah hoe: ‘Tsy hisy hitany sasy, tsy hisy sasy ty hijaly, harary, na ho maty. Hofafako ty ranomaso iaby amy ty mason-drozy. Ho halino iaby ze raha raty taloha tany.’

Napetrakini-Jehovah tamy zariday Edena tao Adama noho Eva. Niada rozy sady nisambatsy biby. Tokony ho nivavaky tamy Baban-drozy an-danitsy any iny rozy, le tokony hameno ani-tany toy koa ty taranakin-drozy. Tsy nanoriky ty safàni-Jehovah Adama noho Eva. Fe tsy nampiova ty fikasàny raha zay. Nihitantsika tamy boky toy ato hoe tanteraky iaby ze raha nampitamanini-Jehovah. Handay raha soa maro amy tany toy iaby ty Fanjakàny, satria fa nampitamaniny ani-Abrahama raha zay.

Tsy hisy olo raty sasy ty etoy, sady tsy ho eo sasy Satana noho demoniany rey. Hivavaky amy Jehovah iaby ty olo amy zay. Tsy harary  sasy tsika sady tsy ho maty. Vomaiky aza tsika hatanjaky noho ho falifaly avao saky mifoha maraindray! Ho paradisa tany toy. Hana hany noho trano soa iaby ty olo. Ho soa fanahy ty olo fa tsy ho satà sasy. Tsy hatahotsy antsika sasy ty bibinala, le tsika koa tsy havaka an-drozy.

Ho falifaly biby tsika lafa hovelomini-Jehovah ndraiky ty maty. Ho hitantsika olo fa nimaty taloha any rey. Manahaky an-dry Abela, Noa, Abrahama, Saraha, Mosesy, Rota, Estera, noho Davida. Hanova ani-tany toy ho paradisa miaraky amintsika rozy. Maro biby ty asa mahafalifaly hatao amy zay.

Teani-Jehovah ho ao iha. Hahay azy soa iha amy zay. Miezaha avao hinama marè amy Jehovah sanandro. Ho namany zisiky farany iha laha manao ani-zay!

“Maeva handramby voninahitsy noho haja voho hery iha Jehovah Ndranaharinay, satria iha ro namoro kila raha iaby.”—Apokalypsy 4:11