Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-89

Nandà ani-Jesosy Petera

Nandà ani-Jesosy Petera

Tamy Jesosy noho apostoliny reo tamy trano etazy tao iny, le nivola tamin-drozy ie hoe: ‘Hanenga ahy iaby nareo iaby androany haly.’ Nivola Petera hoe: ‘Tsy zaho zao! Tsy hanenga anao mihintsy aho, ndre manenga anao aza rozy iaby reo.’ Fe nivola taminy Jesosy hoe: ‘Mbo tsy maneno avao ty akoho, le fa hivola intelo iha hoe tsy mahay ahy.’

Lafa nandesini-maramila rey an-tranoni-Kaiafa any Jesosy, le nilay ty ankamaroani-apostoly rey, fa ty roe amin-drozy nanoriky anatin’olo maro ao. Petera ty raiky. Lafa tan-tokotanini-Kaiafa ao ie, le namindro. Nitarafini-afo iny amy zay ty tarehiny, farany nihitani-mpanompovavy raiky zay, le nivolaniny hoe: ‘Haiko iha fa niaraky amy Jesosy.’

Nivola Petera hoe: ‘Aha, tsy niaraky aminy aho! Tsy haiko raha volaninao zao!’ Bakeo ie nandeha am-bavahady eny. Bakeo ndraiky nisy mpanompovavy hafa koa nahita azy le nivola tamin’olo maro rey hoe: ‘Niaraky amy Jesosy lahilahy tia!’ Nivola Petera hoe: ‘Ndre Jesosy zao aza tsy haiko ka!’ Nivola lahilahy raiky zay hoe: ‘Naman-drozy iha! Haiko amy fivolananao zao fa olo baka a Galilia any iha, manahaky ani-Jesosy.’ Fe nifanta Petera hoe: ‘Tsy haiko iny!’

Tamy fotoa zay, le nisy akoho naneno. Nihitani-Petera hoe nitoliky aminy any Jesosy sady nanenty azy. Tiarony safàni-Jesosy iny, farany nilay amonto any ie le nikofìkofìky nitany.

Tanatini-fotoa zay, le nifanaraky ty Fitsarà Anabo Jiosy fa hitsara ani-Jesosy an-tranoni-Kaiafa ao. Fa nanapa-kevitsy hamono ani-Jesosy rozy, ka nila antony hamonoa azy. Fe tsy nihitan-drozy ty raha raty hanelofa azy. Farany nanontany ani-Jesosy Kaiafa hoe: ‘Iha va Anaki-Ndranahary io?’ Namaly Jesosy hoe: ‘Eka.’ Le hoy Kaiafa: ‘Fa tsy mila porofo hafa sasy tsika. Nanivativa a Ndranahary ie!’ Nanapa-kevitsy fitsarà iny hoe: ‘Tokony hovonoa lahilahy io.’ Nitakonan-drozy tse ty masoni-Jesosy. Nitampifin-drozy amy zay ie, nandoran-drozy  noho nikomondroan-drozy. Bakeo nivola rozy hoe: ‘Laha mpaminany iha, le volano hoe ia namango anao ’o!’

Lafa niavy ty maraindray, le nandesin-drozy amy trano Fitsarà Anabo Jiosy any ie bakeo nanontanean-drozy ndraiky hoe: ‘Iha va Anaki-Ndranahary io?’ Namaly Jesosy hoe: ‘Fa ie volaninareo zay.’ Nataon-drozy mpanivativa a Ndranahary amy zay ie, le nandesin-drozy an-dapani-Pontio Pilato governora romanina any. Bakeo nanao akory amy zay? Ndao hohenteantsika zay.

“Ho avy ty fotoa, eka, fa avy vatany ty fotoa hanaparitaha anareo ho amy ze misy anareo any, le henganareo raiky aho. Fe tsy raiky aho satria eo Babako.”—Jaona 16:32