Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-86

Nivelomini-Jesosy Lazarosy

Nivelomini-Jesosy Lazarosy

Nisy olo telo mianadahy rezay nama-Jesosy biby. Nipetraky ta Betania any rozy. Tsy ia zay fa Lazarosy, Maria noho Marta. Tampitani-Jordana any Jesosy ndraiky andro. Nahazo hafatsy baka amy Maria noho Marta ie hoe: ‘Mba miavia bakao malaky fa marary mafy Lazarosy.’ Fe mbo tsy nandeha tse Jesosy. Nandiny roe andro ie zay vo nivola tamy mpianatsiny rey hoe: ‘Ndao tsika hana a Betania any. Miroro Lazarosy ka hamoha azy aho.’ Nivola apostoly rey hoe: ‘Soa laha miroro ie amy zay ho salama.’ Farany nivolanini-Jesosy mazava hoe: ‘Maty Lazarosy.’

Niavy a Betania any amy zay Jesosy. Fa efatsy andro tamy zay ty nandevena ani-Lazarosy. Maro biby ty olo nanambitamby ani-Marta noho Maria. Lafa nireni-Marta hoe niavy Jesosy, le nandeha namonjy azy malaky ie. Nivola ie hoe: “Laha teto lahy iha Tompo, le tsy ho nimaty ty anadahiko.” Le hoy ty asani-Jesosy: ‘Ho velo ndraiky anadahinao ’o. Mino ani-zay va iha Marta?’ Namaly ie hoe: ‘Haiko fa ho velo ie lafa hovelomy ty maty.’ Le nivola Jesosy hoe: “Zaho ro fameloma ty maty noho fiaina.”

Bakeo nandeha amy Maria any Marta, le nivola taminy hoe: ‘Fa ao Jesosy.’ Nilay amy Jesosy eny Maria, le nanoriky azy vahoaky rey. Nandohaliky alohani-Jesosy eo ie, sady nitany avao. Nivola Maria hoe: ‘Laha teto iha Tompo, le mbo ho nivelo avao anadahiko iny!’ Nihitani-Jesosy fa nalahelo biby Maria, farany nitany koa ie. Lafa nahita ani-Jesosy nitany vahoaky rey, le nivola hoe: ‘Teany vatany aloha Lazarosy.’ Fe nitseriky ty olo sisany. Hoy rozy: ‘Ka nanino tsy navotany namany io?’ Ino ty hataoni-Jesosy?

Nandeha an-dolo eny Jesosy. Nisy vatobe ty amy filira eo. Nivola Jesosy hoe: ‘Alao any vato ’o.’ Le hoy Marta: ‘Fa mantsy zay. Fa efatsy andro any zay!’ Fe nalan-drozy avao vato iny, le bakeo nivavaky ho zao Jesosy: ‘Baba, misaotsy anao aho satria mijanjy ahy iha. Haiko fa mijanjy ahy avao iha, fe mivola marè aho soa ho hain’olo retoa fa iha ro naniraky ahy.’ Nikaiky marè amy zay ie hoe: “Lazarosy,  miboaha!” Bakeo nisy raha mahatseriky: Niboaky baka an-dolo ao Lazarosy, sady mbo nifonofono sikim-paty. Nivola Jesosy hoe: “Vahao ie, le engao handeha.”

Maro amin’olo nahita teo rey ro nanjary nino ani-Jesosy. Fa ty ilany nitantara tamy Fariseo rey tany. Nanomboky tamy zay, le teani-Fariseo rey hovonoa Lazarosy noho Jesosy. Nandeha amy Fariseo rey any ty raiky amy apostoly 12 rey, fe nivony. Tsy ia zay fa Jodasy Iskariota. Nanontaneany Fariseo rey hoe: ‘Hameanareo hotrino aho fa hatoroko anareo ty misy ani-Jesosy?’ Nifanaraky rozy fa hamea drala volafoty 30 ie. Nanomboky tamy zay, le nandiny avao Jodasy hoe lafa misy fotoa mety soa le hameany ani-Fariseo reo Jesosy.

“Azy Ndranahary marina iny ro Ndranahary mpanavotsy antsika. Le Jehovah, azy Tompo Fara Tampony iny, ro manafaky amy fahafatesa.”—Salamo 68:20