Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-78

Nitory Mikasiky Fanjakà iny Jesosy

Nitory Mikasiky Fanjakà iny Jesosy

Tafara kelikelini-batisany iny Jesosy, le nitory hoe: ‘Fa marìny ty Fanjakà-Ndranahary.’ Nanaraky azy mpianatsiny rey lafa ie nana Galilia noho Jodia any. Bakeo ie nimpoly ta Nazareta, amy tanà nahabe azy io any. Lafa niavy tany ie, le nandeha tamy synagoga tao. Nisokafiny ty boky mihoroni-Isaia, le nivakiny marè ho zao: ‘Nameani-Jehovah fanahy masy aho ka afaky mitory vaovao soa.’ Ino ty teany hovolany? Ta hivola ie hoe ndre tena tean’olo aza ie lafa manao fahagagà, le tsy zay ty tena nanomeza fanahy masy azy fa ty hitory vaovao soa. Bakeo hoy ty asany: ‘Tanteraky nandroany faminania io.’

Bakeo Jesosy nana amy Riakini-Galilia eny, ka nifankahita tamy Petera, Andrea, Jakoba, noho Jaona. Mpihaza iaby mpianatsiny efatsy reo. Nitaominy rozy hoe: ‘Ndao hanaraky ahy fa hataoko mpihaza olo nareo.’ Avy le nengan-drozy teo haraton-drozy rey, ka nanaraky ani-Jesosy rozy. Nitorian-drozy mikasiky ty Fanjakàni-Jehovah iaby faritsini-Galilia iny. Nitory tamy synagoga tao rozy, tam-bazary eny, le tan-dala teny koa. Nisy olo maro biby nanaraky ze nomban-drozy avao. Nalaza tamy faritsy maro ty mikasiky ani-Jesosy, ndre tamy faritsy lavitsy a Syria any aza.

Nameani-Jesosy hery mpanori-dia azy rey tamy zay, soa ho afaky hitaha olo noho handroaky demonia. Niaraky taminy avao ty ilany amin-drozy lafa nitory ie, ndre santrano zay ndre tam-bohitsy eny. Nisy ampela maro biby koa nino ani-Jesosy, ka nikarakara azy noho mpianatsiny rey. Anatini-zay Maria Magdalena, Johana, noho Sosana.

Nampiofanini-Jesosy tse mpianatsiny rey, bakeo nirahiny hitory. Lafa nandeha nitety ani-Galilia rozy, le maro koa ty nanjary mpianatsiny ka natao batisa. Maro biby ty olo naniry ho mpianatsini-Jesosy ka nampitoviziny tamy vokatsy fa tokony havory. Hoy ty asany: ‘Maro marè vokatsy io, ka mivavaha amy Jehovah soa ie haniraky mpiasa hamory azy.’ Bakeo nampiarahiny kiroeroe ty mpianatsiny 70, le nirahiny hitory mikasiky Fanjakà iny a Jodia any.  Nampianatsy olo sankarazany rozy. Lafa nimpoly rozy, le fa tsy linin-drozy ty hitantaràna amy Jesosy ty raha niseho tany. Tsy afaky nanaka ty asa fitoria mihintsy ty Devoly.

Vatan-draha ty asa fitoria, ka nataoni-Jesosy azo antoky soa hoe ho afaky hanohy ani-asa io avao ty mpianatsiny lafa miakatsy an-danitsy any ie. Hoy ty asany: ‘Torio amy tany toy iaby ty vaovao soa. Ampianaro an-drozy ty Safà-Ndranahary, le anovo batisa rozy.’

“Tsy maintsy mitory ty vaovao soani-Fanjakà-Ndranahary amy tanà hafa any koa aho, satria zay ro naniraha ahy.”—Lioka 4:43