Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-83

Nanome Hany Olo Maro Biby Jesosy

Nanome Hany Olo Maro Biby Jesosy

Tao 32 tamy zay. Fa ho avy ty Paska. Vo baka nitory tamy tanà maro apostoly rey ka nivozaky biby. Farany nandesini-Jesosy amy botry nana Betsaida any rozy mba hitofatofa tse. Fe lafa ho niavy an-tety eny botry iny, le nihitani-Jesosy fa nisy olo maro biby fa nandiny an-drozy teny. Mba ta ho nitofatofa niaraky tamy apostoly rey Jesosy, fe nirambesiny soa avao olo rey. Nitahany ze narary, bakeo nampianariny mikasiky ty Fanjakà-Ndranahary rozy. Lafa nihatsofotsy andro iny, le namonjy azy apostoliny rey ka nivola hoe: ‘Fa mosarè zay olo reo. Ampandehano rozy soa hila raha ho hanin-drozy.’

Hoy Jesosy: ‘Tsy mila mandeha zao rozy fa ameo hany.’ Nanontany apostoly rey hoe: ‘Teanao va laha mivily mofo ho an-drozy zahay?’ Le hoy koa Filipo: ‘Ndre nanan-drala be aza tsika, le tsy ho nahavoavily mofo ho an’olo maro retoa.’

Nanontany Jesosy hoe: ‘Misy mofo firy ty ao?’ Namaly ho zao Andrea: ‘Anaka mofo limy noho fia roe avao.’ Le hoy Jesosy: ‘Andeso bakao mofo noho fia zay.’ Nampipetrahiny olo rey, le navoriny kidimampolo dimampolo na kizatozato. Nalani-Jesosy mofo noho fia rey, niandra anabo any ie, le nivavaky. Nameany ani-apostoly rey amy zay hany iny, le nizaran-drozy tamy lahilahy 5 000 noho ampela miaraky amy ajà teo rey. Nihina rozy iaby, le nivintsy. Navorini-apostoly reo amy zay ty sisan-drozy mba tsy hisera. Nahafeno sobiky 12 raha rey! Fahagagà vatany zao! Sa manao akory?

 Nieky ani-Jesosy iaby ty olo, ka nitean-drozy hatao mpanjaka ie. Fe haini-Jesosy fa mbo tsy niavy ty fotoa teani-Jehovah hanaova azy mpanjaka. Farany nampolìny olo rey, le nampandehaniny ampitani-Riakini-Galilia eny apostoliny rey. Niondra botry amy zay rozy, fa Jesosy nandeha raiky anabo vohitsy eny. Nanino ie ro nijano? Satria ta hivavaky amy Babany ie. Ndre nimaro biby aza ty raha nataoni-Jesosy le nanoka fotoa hivavaha avao ie.

“Ka miasa hahazoa hany mety simba, fa miasà mba hahazoa hany maharitsy manday fiaina zisiky farany, tsy ino zay fa ty hany hameani-Anak’olo anareo.”—Jaona 6:27