Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-61

Tsy Nety Niankohoky Rozy

Tsy Nety Niankohoky Rozy

Elaela tafarani-nofini-Nebokadnezara mikasiky sarivongana iny, le namboatsy sary olo volamena bevata biby ie. Nataony amy sakasakani-Dora any raha iny, bakeo nikaihiny ty manam-pahefà amy tany iny mba hivory alohani-raha iny eo. Tafilitsy amy zay ry Sadraka, Mesaka, noho Abednego. Zao ty didini-mpanjaka: ‘Laha vo maharè feoni-antsiva, harpa, noho sody nareo, le miankohofa amy sary io! Hatoraky anaty laforo misy afo mirehitsy ze tsy miankohoky.’ Hiankohoky amy sary io koa va Hebreo telo lahy rey, sa hivavaky amy Jehovah raiky avao?

Nampandefasini-mpanjaka iny amy zay moziky iny. Niankohoky iaby ty olo sady nivavaky amy sarivongana iny. Sadraka, Mesaka, noho Abednego avao ro tsy niankohoky. Nahita an-drozy ty lahilahy sisany le nanasisỳ tamy mpanjaka hoe: ‘Tsy nety niankohoky lahy Hebreo telo lahy reo!’ Naniraky olo amin-drozy eny mpanjaka mba hivola hoe: ‘Ndao fa hampoliko ndraiky moziky iny. Fa laha mbo tsy mivavaky amy sarivongana io nareo, le hatoraky anaty laforo misy afo mirehitsy any. Tsy misy ndranahary hahavita hiaro anareo zao.’ Namaly rozy hoe: ‘Fa soa avao lahy mpanjaka, ka ampoly moziky zao. Afaky miaro anay ty Ndranaharinay. Fe ndre tsy miaro anay aza ie, le tsy hivavaky amy sarivongana io zahay.’

Neloky biby Nebokadnezara. Nivola ie hoe: ‘Afanao impito mandilatsy sanandro rey laforo ’o!’ Bakeo nandidy ani-maramilany rey ie hoe: ‘Rohizo rozy, le atoraho anaty laforo ao!’ Nafana biby laforo iny, ka  tonga de nimaty maramila rey lafa nanoraky an-drozy ao. Latsaky anaty afo ao Hebreo telo lahy rey. Fe lafa nihenteani-Nebokadnezara ty anaty laforo iny ao, le lahilahy efatsy ro nihitany mandehandeha tao fa tsy telo. Natahotsy biby ie, farany nanontany ani-manam-pahefà rey hoe: ‘Tsy olo telo va natorakintsika tanaty afo tao iny? Ka manino ro efatsy ty hitako? Sady atao ho anjely ty raiky amin-drozy!’

Namonjy amy laforo iny eny Nebokadnezara, bakeo nikaiky hoe: ‘Miboaha lahy nareo, mpanomponi-azy Ndranahary Fara Tampony iny!’ Tseriky iaby ty olo lafa nahita ani-Sadraka, Mesaka, noho Abednego niboaky baka anaty afo ao. Tsy nanahy rozy! Tsy nisy nimay ndre ty vatan-drozy, ndre ty volon-drozy noho ty sikin-drozy, sady tsy nahareza fofon’afo rozy.

Nivola Nebokadnezara hoe: ‘Bevata ty Ndranaharini-Sadraka, Mesaka, noho Abednego. Naniraky ty anjeliny ie mba hiaro an-drozy. Tsy misy ndranahary mitovy aminy.’

Tsy nivaliky amy Jehovah mihintsy Hebreo telo lahy rey ndre nisy raha sarotsy aza. Ta hanahaky an-drozy koa va iha?

“Jehovah Ndranahari-nao ro tsy maintsy iankohofanao, le ho azy raiky avao ro tsy maintsy anaovanao fanompoa masy.”—Matio 4:10