Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-60

Fanjakà Tsy ho Rava Zisiky Farany

Fanjakà Tsy ho Rava Zisiky Farany

Nanonofy raha hafahafa Nebokadnezara ndraiky haly zay. Nampiasa loha azy marè raha iny ka tsy niazon-droro ie. Nikaihiny mpanao mazỳ rey le nivolaniny hoe: ‘Hazavao amiko nofiko zay.’ Namaly rozy hoe: ‘Ambarao anay, lahy mpanjaka, nofinao zao.’ Fe tsy nimety Nebokadnezara. Hoy ty asany: ‘Aha! Ambaraonareo ahy nofiko zao, laha tsy zay hovonoako nareo.’ Nivola taminy ndraiky rozy hoe: ‘Ambarao anay tse nofinao zao, soa hohazavaninay.’ Nivola amy zay ie hoe: ‘Kely ta hamerivery ahy iaby nareo? Ambarao ahy avao nofiko zay!’ Nivola tamy mpanjaka iny rozy hoe: ‘Tsy misy olombelo mahay ani-zay. Raha tsy vitan’olo mihintsy ampanovinao anay zao.’

Neloky biby tamy mpanao mazỳ rey Nebokadnezara, farany nampa- monoany iaby ze olo hendry tamy tany iny. Anatini-zay koa Daniela, Sadraka, Mesaka, noho Abednego. Fe nangataky amy mpanjaka Daniela mba handiny kelikely. Nivavaky tse rozy amy namany rey, ka nangataky amy Jehovah mba hanampy an-drozy. Ino ty nataoni-Jehovah?

Natoroni-Jehovah ani-Daniela tanaty fahità nofini-Nebokadnezara iny miaraky amy ty dikany. Nandeha amy mpanomponi-mpanjaka iny any amy zay Daniela, hamarain’iny. Nivola taminy ie hoe: ‘Ka vonoa olo hendry reo fa haiko ty manazava nofini-mpanjaka iny.’ Nandesini-mpanompo iny amy Nebokadnezara any Daniela. Nivola tamy mpanjaka Daniela hoe: ‘Ty raha hiseho afara any ro natoro-Ndranahary anao. Zao ty raha nihitanao tamy nofinao tao: Nahita sarivongana bevata biby raiky iha. Volamena ty lohany, volafoty ty tratrany noho ty tanany, saba ty trokiny noho ty feny, vy ty ranjony, le vy miharo fotaky ty tombony. Nisy vato nombota baka amy vohitsy raiky zay nidofotsy marè biby tamy tombony eo. Nitorotoro sarivongana iny, bakeo nandesin-tsioky. Nanjary vohitsy bevata biby koa vato iny, ka nameno tany toy iaby.’

 Bakeo nivola Daniela hoe: ‘Zao ty dikani-nofinao iny: Fanjakànao toy loha volamena iny, le ty fanjakà hisolo anao volafoty iny. Fanjakà hafa hanjaka amy tany toy iaby koa saba iny. Bakeo hisy fanjakà matanjaky biby manahaky vy io. Le amy farany, hisy fanjakà mizarazara satria misy tampany mahery manahaky vy io, le misy tampany malemy manahaky fotaky io. Tsy ino vato nanjary vohitsy io fa ty Fanjakà-Ndranahary. Hotorotoroany iaby fanjakà iaby reo fa ie haharitsy zisiky farany.’

Nandohaliky talohani-Daniela teo Nebokadnezara sady nihohoky tamy tany. Nivola ie hoe: ‘Ty Ndranaharinao ro nanambara nofy iny taminao. Tsy misy Ndranahary manahaky azy.’ Tsy nivonoani-Nebokadnezara Daniela fa nataony sefoni-olo hendry noho ty manam-pahefà iaby ta Babylona tao. Hitanao va hoe namaly vavakini-Daniela iny Jehovah?

“Le navorini-fanambarà zay ho amy pilasy kaihy amy safà hebreo hoe Hara-magedona rozy.”—Apokalypsy 16:16