Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Hahay Raha Maro ze Mianatsy Baiboly

 FIANARA FAHA-66

Nampianatsy ty Lalàna-Ndranahary Ezra

Nampianatsy ty Lalàna-Ndranahary Ezra

Fa 70 tao teo ho eo zay ty ankamaroani-Israelita ro noly ta Jerosalema any. Fe mbo nipetraky tamy faritsy samby hafa amy Fanjakà Persianina any ty ilany amin-drozy. Raiky amy zay Ezra mpisoro. Nampianatsy ty Lalànani-Jehovah ie. Ta handeha a Jerosalema any ie mba hanampy olo any rey, satria nireny hoe tsy nanoriky ty Lalàna rozy. Nivola taminy Artaksersesy mpanjakani- Persa hoe: ‘Nanome anao fahendrea Ndranahary mba hahafahanao mampianatsy ty Lalànany. Mandehana, le andeso koa ze ta handeha any.’ Nivory miaraky amin’olo iaby ta himpoly a Jerosalema any rey amy zay Ezra. Nivavaky tamy Jehovah rozy mba harovany amy lala iny, le bakeo rozy nandeha.

Efa-bola tafara atoy, le niavy ta Jerosalema any rozy. Nivola tamy Ezra andriana tao rey hoe: ‘Tsy nanoriky ty safàni-Jehovah Israelita reo fa nanambaly ampela mpanompo sampy.’ Ino ty nataoni-Ezra? Nandohaliky ie, le nivavaky talohani-vahoaky rey teo hoe: ‘Maro Jehovah ty raha nataonao ho anay, fe le mbo nanota taminao avao zahay.’ Nifona olo rey, fe mbo nanao raha raty avao. Farany Ezra nifily anti-panahy noho mpitsara mba handamy ani-raha zay. Lafa afaky telo vola, le niroasy ze tsy nanompo ani-Jehovah.

Folo roamby tao tafarani-zay, le navorini-Ezra amy tany malalaky eny ty olo, mba hamakiany ty Lalàna-Ndranahary. Fa nivita lakorobeni-Jerosalema iny tamy zay. Laha vo nisokafiny boky iny, le nitsanga iaby olo rey. Nidera ani-Jehovah ie, le nanaraky koa olo rey ka natsangan-drozy ty tanan-drozy. Bakeo nivakini-Ezra ty Lalàna sady nihazavaniny, le nijanjy soa olo rey. Nieky rozy hoe nivaliky tamy Jehovah ndraiky, farany nitany. Mbo nanohy namaky Lalàna iny tamin-drozy Ezra, hamarain’iny. Nihain-drozy amy zay fa tokony hankalaza ty Fetini-Trano Rantsankazo rozy, sady fa marìny raha io. Nanoma ani-fety iny malaky rozy.

Tanatini-fito andro nanaova ani-fety iny, le nifalifaly ty olo sady nisaotsy ani-Jehovah satria nahavokatsy. Tamy  Josoa mbo teo ro nanaovan-drozy Fetini-Trano Rantsankazo ho zay farany. Nivory raiky vahoaky rey lafa nitampitsy fety iny, le nivavaky hoe: ‘Nanavotsy anay baka amy fanandevoza any iha Jehovah. Nameanao hany zahay tan-diomonto any, le mbo nameanao anay koa tany soasoa toy. Fe mbo tsy nanoriky ty safànao avao zahay matetiky. Naniraky mpaminany iha mba hivola anay, fe tsy nijanjy zahay. Mbo nandefitsy avao iha. Tsy nihalinonao ty raha nampitamaninao ani-Abrahama. Mampitamà anao zahay fa hanoriky ty safànao.’ Nisoratin-drozy raha nampitamanin-drozy iny, bakeo nalani-andriana noho Levita voho mpisoro rey, le nasian-drozy tombo-kase.

“Ze mijanjy ty safà-Ndranahary noho manoriky ani-raha zay ro sambatsy!”—Lioka 11:28