Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Fanontanea 10 Mampiasa Loha ty Tanora

 FANONTANEA 9

Nisy Namoro va Kila Raha Iaby Zao?

Nisy Namoro va Kila Raha Iaby Zao?

SOA HO HAY

Laha ohatsy ka tsy nisy namoro kila raha iaby zao, le tsy misy raha kendrè zany ty fiaina. Fa laha nisy namoro vatany ty raha iaby, le ho haintsika hoe ino ty antony mahavelo antsika noho ty hoe ino ty raha hiseho amy hoavy.

INO TY HO NATAONAO?

Zao ty raha niseho: Nino Vonjy bakany zay hoe Ndranahary ro namoro ty raha iaby. Fe nafana fo biby mpampianatsy siansy an-drozy iny nanazava hoe voaporofoni-manam-pahaiza fa marina ty evolisiona. Mikoronta amy zay ty saini-Vonjy. Matahotsy ie tsy no hatao hoe gegigegy laha tsy maneky ani-zay. Mieritseritsy ie hoe: ‘Ty manam-pahaiza aza fa nahita porofo hoe nisinisy ho azy avao ty raha iaby, ka zaho koa moa ty ia ro hizizo?’

Laha iha ro tamy pilasini-Vonjy, hekènao va hoe marina ty evolisiona satria hoe misy boky manamarina azy?

MIERITSERETA SOA TSE!

Lafa mialy hevitsy ty olo mino ty evolisiona noho ty olo mino a Ndranahary, le samby mivola avao hoe ino ty hevitsiny, fa tsy hainy iaby hoe ino ty antony inoany ani-raha iny.

  • Mino avao ty olo sisany hoe nisy namoro ty raha iaby, satria zay ty nampianary azy tan-deglizy any.

  • Mino ty evolisiona avao ty olo sisany, satria zay ty nampianary azy tan-dakilasy any.

 DINIHO SOA FANONTANEA ENY RETIA

Hoy ty Baiboly: “Nisy namboatsy ty trano iaby, fa ty namboatsy ty raha iaby, le Ndranahary.” (Hebreo 3:4) Marina va zay?

Laha misy olo mivola hoe tsy misy ty Mpamoro, le sahala mivola ie hoe tsy nisy namboatsy ty trano raiky

MISY MIVOLA HOE: Nisy raha nipoaky tampoky, le nanjary nisy ty raha iaby.

1. Ia na ino ro nahavy ani-raha io hipoaky?

2. Aia ty hitanao hoe azo inoa: Nisinisy ho azy ty raha iaby sa nisy olo raiky niaviany?

MISY MIVOLA HOE: Baka amy biby ty olombelo.

3. Laha ohatsy ka baka amy rajako vatany ty olo, nanino ro mifanalavitsy biby amy ty ahi-ty rajako ty fahaizan’olombelo?

4. Nanino ro be kalakalaony ndre ty rahamananay atao hoe farany ze “tsotra” aza?

MISY MIVOLA HOE: Voaporofo fa marina ty evolisiona.

5. Fa nanamarina ani-porofo io va ty olo nivola ani-zay?

6. Firy ty olo lasa mino evolisiona satria nisy nivola taminy avao hoe mino ani-zay iaby ty manam-pahaiza?

“Laha mahita trano plansy soasoa anaty ala any va iha, le hieritseritsy hoe: ‘Mba raha le nahay niravoky koa hazo reo! Le nahavita trano soasoa ho io moa lahy ka.’ Tsy hanao ani-zay iha, satria raha tsy hisy mihintsy zay. Ka ino koa moa zany ty antony hieritseretantsika hoe nisinisy ho azy teo avao kila raha iaby zao?”—Julia.

“Eritsereto hoe nisy olo nivola taminao hoe nisy raha nipoaky marè biby tamy trano raiky fanaova pirinty tao, le niparitaky tamy rindry noho amy plafond eny iaby ankra rey, le bakeo nanjary diksionera. Hinoanao va zay?”—Gwen.

 TENA MISY VA NDRANAHARY?

Mampirisiky anao ‘hampiasa ty sainao’ ty Baiboly. (Romanina 12:1) Midika zay hoe mila mandiniky soa iha vo mino a Ndranahary, fa tsy hoe...

  • ANDESINI-FIHETSEHAM-PO AVAO (Ataho raha misy Ndranahary mahery zay avao mbanimbany)

  • MANARAKY TY ATAON’OLO AVAO (Mpivavaky iaby ty olo aminay atoy)

  • AMPIRISIHIN’OLO AVAO (Tsy hanao akory moa aho, satria fa zay ty nitezàni-babako noho reniko ahy)

Tokony hana antony soa mahavy anao hino ani-zay iha.

“Lafa manazava mikasiky ty vatan’olombelo ramosenay, le avy le resy lahatsy aho hoe misy ty Mpamoro. Samby mana ty asany iaby ty raha amy vatantsika ao, ndre ty farany bevata, ndre ty farany kelikely. Fe matetiky ro tsy rentsika hoe miasa raha reo. Mahatseriky vatany!”—Teresa.

“Lafa mahita trano be aho, na sambo be, na tomabily, le mieritseritsy hoe: ‘Ia lahy ty namboatsy ani-toy e?’ Laha tomabily, ohatsy, le tsy maintsy olo manam-pahaiza vo mahavita azy, satria maro ty kalakalaon-draha anatiny ao. Tsy mandeha ie laha tsy mety soa iaby raha reo. Ka laha ty tomabily aza nisy namboatsy, handraky moa ty olombelo?”—Richard.

“Arakaraky ty nianarako siansy ro nahitàko hoe tsy marina ty evolisiona... Le aleo mora amiko ty ‘mino’ hoe misy ty Mpamoro tozay hino ty evolisiona.” —Anthony.

DINIHO TOY

Mbo tsy mitovy avao ty hevitsini-mpahay siansy mikasiky ty evolisiona, ndre fa am-polony tao aza zay ty nanaovan-drozy fikaroha. Ka laha ty mpahay siansy aza tsy mitovy hevitsy kanefa atao hoe manam-pahaiza, ho diso koa va iha laha tsy mino ty evolisiona?