Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Fanontanea 10 Mampiasa Loha ty Tanora

 FANONTANEA 5

Akory Laha Misy Manerisery Ahy ty An-dakilasy Any?

Akory Laha Misy Manerisery Ahy ty An-dakilasy Any?

SOA HO HAY

Arakaraky ty fihetsikinao ro hampilamy na hampanjeky azy.

INO TY HO NATAONAO?

Zao ty raha niseho: Fa tsy ta ho an-dakilasy any sasy Tovo. Fa telo vola zay ty nampiparitahani-mpiaraky mianatsy aminy reo vandivandy mikasiky azy. Nipetahan-drozy anara kizaky iaby ie. Dosirin-drozy kindraiky ty kahiè an-tanany eny soa ho latsaky. Kindraiky koa misy midofotsy azy marè baka afara ao. Mitolitoliky Tovo fe tsy hainy hoe ia io. Fa tsy nizakany sasy faneriserea zay, lafa nisy nampitahotsy azy tamy Internet tao nomaly.

Laha iha ro tamy pilasini-Tovo, ino ty ho nataonao?

MIERITSERETA SOA TSE!

Tsy hoe tsy afaky manao raha iha! Afaky manohitsy azy iha fe tsy voatery hamango azy. Amy fomba akory?

  •   KA DAREA. Mivola ty Baiboly hoe: ‘Ty olo tsy mandiniky mampiboaky ty helokiny iaby, fa ty hendry manindry fo zisiky farany.’ (Ohabolana 29:11) Tsy hahoany sasy iha laha kalma avao. Tanjatanjaho avao ty ainao.

  • KA MAMALY FATY. Mivola ty Baiboly hoe: “Ka mamaly raty amy ty raty.” (Romanina 12:17) Vomaiky loza laha mamaly faty iha.

  • MANDINIHA TSE. Mivola ty Baiboly hoe: “Mahihitsy ty olo raiky laha mahajilo loza ka mivony.” (Ohabolana 22:3) Ialao lavitsy ty mpanerisery, na ty pilasy mety hisy an-drozy.

  • VALEO MORAMORA AVAO IE. Mivola ty Baiboly hoe: “Mahakalma olo meloky marè ty valin-teny mampiseho hasoa fanahy.” (Ohabolana 15:1) Mba ampihehezo moa ie! Laha kizahiny, ohatsy, iha hoe vondraky biby, le afaky mamaly avao hoe: “Tsy le manahaky eponzy malemilemy rey!”

  • MIALÀ TEO. Hoy Nora, 19 tao: “Hita hoe matotsy noho be herim-po iha laha tsy mamaly. Hita koa hoe mahafehy tena iha. Tsy ho zay mihintsy mpanerisery rey.”—2 Timoty 2:24.

  • MIEZAHA HATÒKY TENA. Mora arakini-mpanerisery rey hoe tsy matoky tena ty olo raiky, ka hararaotin-drozy raha zay. Fa laha iha matoky tena, le hiala teo ie.

  • MIRESAHA AMIN’OLO HAFA. Nisy mpampianatsy fa retirety raiky nivola hoe: “Ampirisihiko hanasisy ze ajà misy manerisery. Tokony hanao ani-zay ie soa tsy hisy ajà hafa hosereserèn’olo sasy.”

Hatanjaky mandilatsy ani-mpanerisery rey iha laha matoky tena