Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Fanontanea 10 Mampiasa Loha ty Tanora

 FANONTANEA 7

Ino ty Hataoko Laha Misy Mitao Ahy Hanao Firaisa?

Ino ty Hataoko Laha Misy Mitao Ahy Hanao Firaisa?

SOA HO HAY

Tsy maintsy hisy vokany raty amy ty hoavinao avao laha manapa-kevitsy hanao firaisa iha.

INO TY HO NATAONAO?

Zao ty raha niseho: Vo roe vola ty niarahani-Hanitra noho Mamy, fe atao raha fa nifankahay fa ela io rozy. Mifandefa SMS sanandro rozy, le mifampiresaky ela biby amy telefony. Mbo tsy tampitsy ty safà ty raiky, le fa tohiza ty raiky koa. Fe fa tsy resaky sasy henanizao ro ilàni-Mamy fa raha hafa mihintsy.

Nifampitanjaky tana noho nifanoroky kelikely avao Hanitra noho Mamy, bakany zay. Mbo tsy ta hanao raha ankoatsini-zay Hanitra, fe tsy foiny koa Mamy. Ie raiky avao ro mba mivola aminy hoe ampelasoa ie, sady tsy misy manahaky azy. ‘Sady zahay koa anè mifankatea!’ hoy Hanitra.

Laha fa ampy tao hanambaly iha, ino ty ho nataonao laha iha ro tamy pilasini-Hanitra?

MIERITSERETA SOA TSE!

Fanomeza natoka-Ndranahary ho ahi-ty mpivaly ty firaisa. Laha manao firaisa alohani-hanambaleanao iha, le tsy manisy dikany ani-raha io, manahaky hoe namean’olo akanjo soasoa iha fe ataonao famafà raha maloto

Laha mitsamboko baka anaboni-hazo iha, ka manohatsy mitily manahaky voro rey, le tsy maintsy haratsy. Manao ho zay avao koa laha tsy orihinao ty lalàna-Ndranahary manahaky ani-toy: ‘Falio ty fijangajangà.’—1 Tesalonianina 4:3.

Hanao akory ty olo tsy manoriky ani-didy io? Hoy ty Baiboly: “Ty mpijangajanga le manota amy vatany avao.” (1 Korintianina 6:18) Tena marina va zay?

 Maro ty tanora fa nanao firaisa alohani-hanambaleany. Hitani-mpikaroky fa maro amin-drozy ty:

  • MANENY. Presky rozy iaby mihintsy ro mivola hoe maneny.

  • TSY MIFAMPATOKY. Samby mieritseritsy rozy lafa baka nanao firaisa hoe: ‘Hay ndre fa nisy olo hafa niaraky nandry aminy?’

  • DISO FANANTENÀ. Olo hiaro azy ro irìn’ajà ampela rey, fa tsy olo hanararaotsy azy. Fa tsy mahataitsy ty ankamaroani-mpamaraky ty ajà ampela fa nanaovany firaisa.

  • Tiarovo zao: Tsy manisy dikany ty vatanao iha laha manao firaisa alohani-hanambaleanao. (Romanina 1:24) Misy hajany ty vatanao fa ka ameamea olo avao!

Atorò hoe vitanao ty manoriky ty didy hoe ‘falio ty fijangajangà.’ (1 Tesalonianina 4:3) Mbo ho afaky hanao firaisa avao iha laha hanambaly ndraiky andro any. Tsy hiasa loha iha amy zay sady tsy haneny fa hahazo tavy, tsy manahaky olo manao firaisa alohani-hanambaleany rey.—Ohabolana 7:22, 23; 1 Korintianina 7:3.

 AKORY TY HEVITSINAO?

  • Tsy hidary anao noho ty fihetseham-ponao va ty olo raiky laha tena tea anao?

  • Hanimba ty fifandrambesanao amy Ndranahary va ty olo raiky laha tena tea anao?—Hebreo 13:4.