Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Fanontanea 10 Mampiasa Loha ty Tanora

 FANONTANEA 3

Akory ty Hiresahako amy Baba Noho Neny?

Akory ty Hiresahako amy Baba Noho Neny?

SOA HO HAY

Vomaiky hahazo tavy ty fiainanao iha laha mifandramby soa amy baba noho reninao.

INO TY HO NATAONAO?

Zao ty raha niseho: Mpamaraky 17 tao Davida. Fa vita iaby ty raha nataony ndraiky Larobia hariva, le mba nitofatofa ie. Nivelominy tele iny, bakeo ie niampatsy anaboni-sezy teany biby iny eo.

Le amy ie mipetraky eo iny soa, militsy bakany Babany sady sosotsosotsy.

Nivola ie hoe: “Nao koahy! Le soa avao iha ato manenty tele, kanefa fa hainao fa tokony hampeanao amy devoarany iny zainao’o. Mahery volany aza koahy iha!”

Nimenimeny amy zay Davida hoe: “Avini-nahoda ty ndraiky zay!”

“Ino soa aka?” hoy Babany.

“Aha, tsy nivola aho” hoy Davida mifoay sady manao henty raty.

Vomaiky neloky Babany, ka nivola hoe: “Zaho leroa ka anaovanao safà ho zao tsy no...”

Laha iha ro tamy pilasini-Davida, ino ty ho nataonao mba tsy hisiani-fifamalea?

MIERITSERETA SOA TSE!

Sahala hoe manday tomabily iha lafa miresaky amy baba noho reninao. Laha misy raha manakantsaka ty lalanao, le hila lala hafa hombànao avao iha.

 TOY MISY OHATSY:

Nivola Lina hoe: “Mahakamo mihintsy ty miresaky amy babako! Fa mivola elaela tena kindraiky vo taitsy ie hoe: ‘An! Akory hoe?’”

MANA SAFIDY TELO LINA.

  1. Milelalela amy babany.

    Mivola marè biby Lina hoe: “Mba raha tsy janjìninao aho’o. Vatan-draha ani-zao!”

  2. Tsy miresaky amy babany.

    Tsy tantaràni-Lina amy babany sasy ty raha mahazo azy.

  3. Mandìny fotoa mety, le miresaky ndraiky.

    Miresaky mivanta amy babany Lina, na manoratsy taratasy mba hivolana ty raha manahira azy.

Aia amy reo ro hitanao hoe tokony hataony?

ERITSERETO ZAO: Tandrena biby babani-Lina, ka tsy mahita hoe fa meloky ie. Laha Safidy 1 io ro filini-Lina, le mety tsy ho azoni-babany hoe ino ty antony mampilelalela azy. Mety tsy hijanjy azy koa babany, satria hitany fa tsy manaja azy ie. (Efesianina 6:2) Tsy mety zany Safidy 1 io.

Misy fomba azonao iresaha amy baba noho reninao avao, manahaky tomabily mahita lala hombà ndre misy manakantsaka io

Mety ho mora atao Safidy 2 io, fe tsy mahasoa. Ino ty antony? Mila miresaky amy babany Lina laha teany ho voalamy ty raha manahira azy. Mila mahay ty raha mahazo azy koa babany vo afaky manampy azy. Midika zay fa tsy mandamy raha ty tsy miresaky.

Ka laha Safidy 3 io ty filini-Lina? Mampirisiky azy hiezaky hiresaky amy babany amy fotoa mety raha io fa tsy misaka azy tsy hiresaky. Mety ho azoazony soa ty ainy laha manoratsy taratasy ho ani-babany ie.

Mety ho tafaboakiny soa koa ty raha teany hovolany laha manoratsy ie. Ka lafa mamaky ani-taratasy iny amy zay babany, le hazava soa aminy hoe ino raha mahazo azy io. Mahasoa an-drozy roe Safidy 3 io, ndre atao mivanta ndre an-taratasy, satria manaraky ty fampirisihani-Baiboly mba “hiezaky hampisy filongoa.”—Romanina 14:19.

Ino koa ty raha azoni-Lina atao?

Sorato laha mahita iha. Bakeo diniho koa ty mety ho vokatsini-safidy io.

 DINIHO SOA TY RAHA HOVOLANINAO

Tiarovo fa mety ho hafa ty fandrambesani-baba noho reninao ty raha volaninao.

TOY MISY OHATSY:

Manontany anao rozy morovaly hoe: “Manino va aka iha mimontsomontso avao’o?” Mamaly amy zay iha hoe: “Tsy manino zao aho!”

Mety ho zao ty fandrambesan-drozy azy: “Tsy ta hiresaky aminareo aho, fa tsy raha hahavita hanampy ahy nareo. Aleoko miresaky amy ty namako.”

Mba eritsereto amy zay hoe misy raha manahira anao, le mivola babanao noho reninao hoe ta hanampy anao. Fe iha manao hoe: “Vitako ty mandamy an’io!”

  • Akory ty mety ho fandrambesan-drozy azy?

  • Ino ty tokony hovolaninao?