Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ia ro Manao ty Raha Tea Jehovah Henanizao?

 Fianara 17

Manao Akory ty Anampea ty Mpiandraikitsy Faritsy Antsika?

Manao Akory ty Anampea ty Mpiandraikitsy Faritsy Antsika?

Malawi

Fivoria aloha ty fanompoa

Asa fitoria

Fivoria atao ty anti-panahy

Mimpolimpoly amy Soratsy Grika Kristiana ao ty anara Barnabasy noho ty anara apostoly Paoly. Mpiandraikitsy faritsy, nisafo ty fiangona nisy tamy voalohany tany rozy. Nanino rozy ro nanao raha zay? Satria mieritseritsy raha soa ho ahy ty kristiana naman-drozy avao rozy. Nivola Paoly fa mbo ta ‘himpoly hisafo rahalahy’ reo ie hanenteany hoe manao akory rozy any. Tsy nampanahy azy ty nandeha an-jatony kilometatsy maromaro soa ho afaky hifankahita amin-drozy noho hanampy an-drozy hana finoa matanjaky. (Asan’ny Apostoly 15:36) Mitovy amy zay avao koa ty raha tea ty mpiandraikitsy faritsy hatao henanizao.

Misafo anay rozy soa hana finoa matanjaky zahay. Mandeha amy fiangona fa ho 20 mahery ty mpiandraikitsy faritsy kiraidraiky. Anaty ty herinandro ie ro mijano amy fiangona raiky. In-droe anaty ty tao raiky ie ro manao raha zay amy fiangona reo any. Misy raha soa maro azonay noho ianaranay baka amy mpiandraikitsy reo noho ty valin-drozy laha manambaly rozy. Tean-drozy ho hay soa ty tanora noho ty olo be amy fiangona ao. Mazoto koa rozy mitory noho mampianatsy Baiboly miaraky aminay. Misafo anay miaraky amy anti-panahy koa mpiandraikitsy reo soa hampirisiky anay tsy ho kivy. Manao lahateny hahavy anay hana finoa matanjaky rozy amy fivoria noho fivoriambe any.—Asan’ny Apostoly 15:35.

Mikarakara ty raha hahasoa anay rozy. Tea ty mpiandrakitsy faritsy ho hay koa laha mifandramby soa amy Ndranahary ty fiangona kiraidraiky. Miaraky mivory amy anti-panahy noho mpanampy amy fanompoa rozy sady manome torohevitsy azo orihy amy fikarakara soa ty fiangona. Ampean-drozy koa ty mpisava lala soa hahita vokatsy amy fitoria noho fampianara. Tean-drozy ty mifankahay aminolo vaovao amy fivoria ao. Falifaly koa rozy maharè hoe miezaky manao ty raha tea Ndranahary olo reo. Mahafoy ty vatany rahalahy mpiandraikitsy reo manahaky olo ‘mpiaraky miasa mandiniky ze hahasoa anay.’ (2 Korintianina 8:23) Mana finoa mantanjaky noho tea manompo Ndranahary rozy, le ianaranay koa raha zay.—Hebreo 13:7.

  • Nanino ty mpiandrakitsy faritsy ro misafo fiangona?

  • Ino iaby ty raha soa azo lafa misafo ty mpiandrakitsy faritsy?