Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ia ro Manao ty Raha Tea Jehovah Henanizao?

 Fianara 3

Manao Akory ro Nahaiza Ndraiky ty Raha Marina Amy Baiboly Ao?

Manao Akory ro Nahaiza Ndraiky ty Raha Marina Amy Baiboly Ao?

Mpianatsy Baiboly tamy 1870

Ny Tilikambo Fiambenana niboaky voalohany, tamy 1879

Ny Tilikambo Fiambenana amy henanizao

Nivola ty Baiboly fa lafa maty Kristy, le hisy mpampianatsy raha diso amy Kristiana voalohany reo ao. Hanome fanazava diso baka amy Baiboly ao rozy. (Asan’ny Apostoly 20:29, 30) Zay vatany ro niseho tafara atoy. Naharon-drozy amy fanompoa sampy ty raha nampianary Jesosy, le zay ro nampisy ty Kristiana sandoky. (2 Timoty 4:3, 4) Akory ro ahaizantsika fa marina soa ty raha ampianary antsika amy Baiboly ao henanizao?

Niavy ty fotoa nanambarà Jehovah ty raha marina. Fa nivola ie hoe amy ‘andro farany le hitombo marè ty fahaizanolo ty raha marina.’ (Daniela 12:4) Nisy olo maromaro nila ty raha marina tamy 1870. Naneky rozy fa misy fivavaha maro mampianatsy raha tsy baka amy Baiboly ao. Nanomboky teo le nilan-drozy amy zay ty fampianara marina. Nitahy an-drozy Jehovah, ka nanjary hain-drozy ty raha marina tamy Baiboly ao.

Nisy lahilahy maromaro nandiniky soa ty Baiboly. Nisy Mpianatsy Baiboly maromaro talohanay. Dinihin-drozy kiraidraiky ty foto-kevitsy amy Baiboly ao. Ho zay avao koa ro anovinay henanizao. Lafa misy andinin-teny tsy mazava soa amin-drozy, le mila andinin-teny hafa baka amy Baiboly ao rozy hanazavà raha io. Lafa hitan-drozy fa mifanaraky soa amy andinin-teny iaby amy Baiboly ao raha nidinihin-drozy io, le zay ro hevitsy rambesin-drozy. Hita baka amy raha zay fa ty Baiboly avao ro nampiasan-drozy hahità ty marina. Nanjary nihain-drozy ty marina mikasiky ty anara Ndranahary noho ty Fanjakany, ty raha teany hatao ho ahinolo noho tany toy, ty marina mikasiky ty olo fa nimaty noho ty fameloma ndraiky an-drozy. Niafaky tamy finoa raha diso noho fanoriha fomba diso rozy lafa nahay ty marina.—Jaona 8:31, 32.

Nanomboky tamy 1879 le fa nihay Mpianatsy Baiboly reo fa mila ambara aminolo iaby ty marina. Tamy tao io avao le nanomboky nampiboaky gazety Ny Tilikambo Fiambenana Manambara ny Fanjakan’i Jehovah rozy. Mbo gazety io avao koa ro zaranay henanizao. Mampianatsy Baiboly amy tany mahery ty 240 zahay. Atao amy fivolana fa ho 750 eo ho eo raha zay. Mbo tsy nitombo marè manahaky amy henanizao ty fahaizanolo ty raha marina!

  • Nanao akory ty raha marina amy Baiboly ao lafa nimaty Kristy?

  • Manao akory ro nahaizanay ty raha marina baka amy Baiboly?